Yoswa 14

Kalebe waronde Hebroni

1Ndipo ivi ndi vihara vyo ŵaYisraele ŵanguronde mu charu cha Kanani, vyenivyo Eleazara mzukuru, ndi Yoswa mwana waku Nuni, ndi ŵarongozgi ŵa nyumba za auskeu ŵa mafuku gha ŵaYisraele ŵanguŵagaŵiya. 2Vihara vyawo vyenga vya mphenduzga, pa mafuku ghankhonde ndi ghanayi ndi nusu, nge ndimo Ambuya angulanguliya Mosese, 3pakuti Mosese wangupaska chihara cha kusirgha ku Yordane ku mafuku ghaŵi ndi fuku la nusu, kweni ku ŵaLevi kuti wangupaska chihara mukati mwawo cha.

4Chifukwa ŵina Yosefe ŵenga mafuku ghaŵi, laku Manase ndi Efraimu; pengavi chigaŵa cho chingupaskika ku ŵaLevi mu charu, kweni misumba pe yakujamo ndiyo ndi charu cha chipozwa cha ng'ombe zawo ndi usambasi wawo.

5ŴaYisraele ŵanguchita nge ndimo Ambuya angulanguliya Mosese; ŵangugaŵa charu.

6Sono ŵanthu ŵaku Yuda ŵanguza kwaku Yoswa pa Gilgala; ndipo Kalebe mwana waku Yefuni mu Kenizi wangunena nayo, “Iwe uziŵa cho Ambuya angurongoro ndi Mosese munthu waku Chiuta pa Kadeshe-barnea paku iwe ndi ine. 7Ndipo nde wa virimika machumi ghanayi wachindituma Mosese mteŵeti wa Ambuya kutuwa ku Kadeshe-barnea kwa chiskola charu, ndipo ndingumuwezge mazu mo ghanguŵiya mu mtima wangu. 8Kweni ŵabali wo ŵanguruta pamoza nane ŵangusongonoska mitima ya ŵanthu; ine kwakufikapo ndingurondo Ambuya Chiuta wangu. 9Ndipo Mosese wangurapa pa zuŵa liya, kuti, ‘Ndineneska charu cho rundi lako lakandapo chikaŵanga chihara chako ndi ŵana ŵako muyaya, chifukwa kwakufikapo warondo Ambuya Chiuta wangu.’ 10Sono ehe, Ambuya andisunga ŵamoyo, nge ndimo angukambiya, virimika ivi machumi ghanayi ndi vinkhonde (45) kutuliya pa nyengo yo Ambuya angukambiya mazu yagha kwaku Mosese, po Yisraele wenga weche kwenda mu bozwa; ndipo sono; alereni pa zuŵa lino ndendi virimika, machumi ghankhonde ndi ghatatu pachanya vinkhonde (85). 11Ndeche wanthazi nyengo yinu nge ndimo ndinguŵiya pa zuŵa lo Mosese wanditumiyanga, mo nthazi zangu zinguŵiya pa nyengo yiya ndimo ziliri ndasono pano zakurwiya nkhondo, pa kuruta ndi pakuwe. 12Viyo sono ndipaske charu cha mtunthu ichi cho Ambuya angunena pa zuŵa liya; pakuti ugujivwiya zuŵa liya mo ŵina Anakimi ŵanguŵiyako, ndi misumba yikuru ya malinga: kokuli Ambuya akaŵanga nane, ndipo ndikaŵatuzgangamo uli ndimo Ambuya angunene.”

13Viyo Yoswa wangumutumbika ndipo wangupaska Hebroni kwaku Kalebe mwana waku Yefuni nge nchihara. 14Henroni wanguŵa chihara chaku Kalebe mwana waku Yefuni mu Kenizi mpaka kunu ku sono chifukwa wangurondo Ambuya Chiuta waku Yisraele ndi mtima wose; 15kweni zina laku Hebroni pa kudanga lenga Kiriata-arba; uyu Arba wenga chinkhara chakuruska mukati mu ŵina Anakimi. Ndipo charu chingupumuwa ku nkhondo.

Currently Selected:

Yoswa 14: TongaMw

Highlight

Copy

Compare