Yoele 1
1
1Mazu gha Ambuya gho ghanguza kwaku Yoele mwana waku Petuele.
Ŵanthu ŵaliliva chifukwa chakunangika kwa mbeu
2Avwani ichi, imwe mwa ŵara,
tegherezgani gutu, imwe mose muja mu charu!
Kumbi chinthu chaviyo chikuŵako mu mazuŵa ghinu,
pamwenga mu mazuŵa gha auskemwe?
3Konkhomiyani ŵana ŵinu ndi chenichi,
ndipo ŵana ŵinu ŵakambiye ŵana ŵawo,
ndi ŵana ŵawo ŵatauliye mgonezi unyake.
4Cho chasiyika ndi chiungu,
charghika ndi zombe.
Cho chasiyika ndi zombe,
charghika ndi ŵaphanana.
Cho chasiyika ndi ŵaphanana,
charghika ndi matondo.
5Yukani, imwe ŵakuloŵe ndi muliye,
nditenjeni, imwe mose mwa ŵakumwa vinyo,
chifukwa cha vinyo mufya,
pakuti watuzgikako ku mlomo winu.
6Chifukwa mtundu waza ndi kurwana ndi charu changu,
wanthazi ndi wambura kuŵerengeka;
weniwo minyu ghake ghenge nga nkharamu,
wendi vibwanyu nge vya nkharamu yinthukazi.
7Wananga mphereska zangu,
ndi kuswanuwa mikuyu yangu;
wayikomo ndikularauwa makungwa ghake ndi kungapong'a pasi;
mphanda zake zamira gwa.
8Tenjeni nge ndi mwali wavwala chigudulu muchiunu
chifukwa cha murumi wapa umwali wake.
9Sembe ya vyakurgha ndi sembe ya vyakumwa zarekeka
mu nyumba ya Ambuya.
Ŵazukuru ŵatenje, ŵateŵeti ŵa Ambuya.
10Minda yanangika,
charu chitenje,
chifukwa trigu wanangika,
vinyo wakamuka,
mafuta ngamana.
11Rengani soni mwa ŵalimi,
tenjeni ŵalimi ŵa mphereska,
chifukwa cha trigu ndi barile;#1.11 barile: ndi mbeu yo yikozgana ndi mbeu yidu ya mawe.
chifukwa chivuna mu minda chanangika.
12Mphereska zifota,
mkuyu ufota.
Muti wa zobara, kanchindwi, ndi masuku,
miti ya mdondo yose yafota;
ndi likondwa kulive ku ŵana ŵa ŵanthu.
13Vwarani chigudulu, muliye imwe
ŵazukuru, tenjeni mwa ŵateŵeti ŵa jochero la sembe.
Sereni, mwaŵakuvwala vigudulu ndi cherezgani usiku wose,
owe! Mwa ŵateŵeti ŵaku Chiuta wangu!
Chifukwa mpasku wa vyakurgha ndi mpasku wa vyakumwa
vyagota ku nyumba yaku Chiuta winu.
14Patuwani zuŵa lakufunga kurgha
mudane unganu wakupaturika.
Unjikani ŵaraŵara
ndi ŵakuja mu charu wose
mu nyumba ya Ambuya Chiuta winu;
ndi muliliye ku Ambuya.
15Owe, zuŵa liya!
Chifukwa zuŵa la Ambuya laŵandika,
nge ndi phasulu kutuliya kwaku Wanthazi zose, lituza.
16Kumbi vyakurgha asi vyamara pa maso pidu,
mulive chimwemwe ndi likondwa
mu nyumba yaku Chiuta widu?
17Mbeu yavunda pasi pa dongo,
nyumba za vyakurgha zapasuka;
nkhokwi zabwanganduka
chifukwa mbeu zatondeka kukoma.
18Vyakuŵeta viragha,
miskambu ya ng'ombe yazingariwa
chifukwa chipozwa kulivi;
chingana ndi miskambu ya mberere njakutomboroka.
19Ambuya, ndililiya imwe.
Chifukwa moto wawocha vipozwa mu dondo,
ndi mlipu wawocha miti yose mu dondo.
20Chingana ndi nyama za mu dondo zilili ya kwaku imwe
chifukwa misinji yakamuka,
ndipo moto wawocha uteka wamu dondo.
Currently Selected:
Yoele 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
