Yakobe 4

Ubwezi ndi charu

1Nchine cho chichitiska mahomwa ndi nchine cho chichitiska mapindanu mukati mwinu? Asi nga kweniko, ku malikondwa ghinu ghakurwiya mu viŵaru vinu? 2Mukhumbira, ndipo muuravi: mubaya, ndipo muŵiniwa, ndi kuti muziŵa kufikapo cha: mupindana ndipo mupota homwa; muuravi, chifukwa mureka kupempha. 3Mupempha, ndipo kuti muronde cha, chifukwa kuti mupempha uheni, alinga kuti muvimariye pa malikondwa ghinu. 4Mwaŵareŵi, asi muziŵa kuti kukondana ndi charu mbumawongu paku Chiuta? Viyo mweniyo yose wakhumba kuŵa wachikondana ndi charu wajisanduska wamawongu waku Chiuta. 5Pamwenga kumbi murunguruka kuti lembo lo likamba waka, “Wanweke kwasanji mzimu wo wajariska mwidu?” 6Kweni wapaska wezi ukuruku: viyo ŵatiti, “Chiuta wamikirana ndi wakujana, kweni wapaska wezi ku ŵakujiyuyuwa.” 7Viyo jithereskiyeni kwaku Chiuta: kweni mikiranani ndi diabolo yo, ndipo wathaŵenge imwe. 8Ndereni kufupi kwaku Chiuta, ndipo wanderenge kufupi kwinu. Photoni manja, mwaŵalakwi; ndipo tozgani mitima, mwaŵamitimapaŵi. 9Suzgikani, ndi tenjeni, ndi liyani: kadara kinu kazgoke chitenje, ndi chimwemwe chinu ku chitima. 10Mujichefye paurongo pa Ambuya, ndipo wamkuzgeninge.

Chenjezgu pakweruzga Mkristu munyako

11Munganenana cha, mwa ŵabali. Mweniyo wasuza mbali, pamwenga wateruzga mbali wake, wasuza dangu, ndi wateruzga dangu: kweni asani uteruzga dangu, kuti we mchita wa dangu cha, kweni mweruzgi. 12Walipo Yumoza yo ngwakumika dangu ndi wakweruzga, yo ngwanthazi kutaska ndi kwananga: kweni ndiwe yani iwe, uteruzga mwanase wako.

Chenjezgu pakujitukumuwa

13Ekwe, aimwe, mwaŵakukamba, “Le pamwenga mawa tikenge ku muzi wakuti e, ndipo titandarenge kweniko chaka chimoza, tamgula ndi kusaska, ndi kwanduwa”; 14penipo napo mulive kuchiziŵiska chamawa cha. Pakuti we uli umoyo winu? Mwe nyankhuŵinda, na, yo wawoneka kanyengo kamanavi, ndipo pavuli wazirimitiya. 15Ukongwa mutenere kukamba, “Asani Ambuya ŵakhumbenge ndipo tikaŵanga ŵamoyo, ndipo tikachitanga chenichi pamwenga chiya.” 16Kweni sono mutumbwiya mu matukutuku ghinu: chi tumbwa chose chaviyo nchiheni. 17Viyo kwaku yo waziŵa kuchita keneko, ndipo ngwambura kukachita, kwaku mweniyo nchilakwa.

Currently Selected:

Yakobe 4: TongaMw

Highlight

Copy

Compare