Ezekiele 7

Kubwanganduka kuparghanika kwa ŵaYisraele kwe pafupi

1Mazu gha Ambuya ghanguza kwaku ine: 2“Iwe, mwana wa munthu, Ambuya Chiuta atiti ku charu cha Yisraele: Umari! Umari wafika pa visongo vinayi vya charu. 3Sono umari we paku imwe, ndikatumanga ukari wangu paku imwe, ndikweruzgeninge kwakulingana ndi nthowa zinu; ndikakulanganinga chifukwa cha maunyakazi ghinu ghose. 4Jiso langu kuti likarekeliyanga cha, nanga nkhuti ndichiti lisungu nako cha; kweni chifukwa cha nthowa zinu ndikakulanganinga, po maukazuzi ghinu ghe mukati mwinu. Po ndipo mukaziŵanga kuti ine ndine Ambuya.

5“Viyo atiti Ambuya Chiuta: Soka pa soka! Awonani, lafika. 6Umari wafika, umari wafika; wayukiya paku imwe. Ehe, wafika. 7Umari wafika paku imwe, owe mwa ŵakuja mu charu; nyengo yafika, zuŵa le pafupi, zuŵa la chiwawa, kuti nkhamphomezi ka likondwa mu mapiri cha. 8Sono kwaja kanyengo kamanavi ndipunguliyenge ukari wangu, ndikufiska kukara kwangu paku imwe, ndikweruzgeninge kwakuyana ndi nthowa zinu; ndikulangeninge pa maukazuzi ghinu ghose. 9Ndipo jiso langu kuti likarekeliyanga, nanga nkhuŵa ndi lisungu cha; ndikakulanganinga kwakulingana ndi nthowa zinu, po maunyakazi ghinu ghe mukati mwinu. Sono mukaziŵanga kuti ine ndine Ambuya, wo apuma.

10“Awonani, zuŵa! Ehe, lafika! Soka linu laza, ukazuzi wabuka, kujikuzga kwatunda. 11Nkhaza zakuwa kuŵa nthonga ya uheni; palivi yumoza waku iwo wakajanga, nanga vya uzali wawo, pamwenga usambasi wawo; ndipo kuti wakaŵangako cha wakuŵatenje mukati mwawo. 12Nyengo yafika, zuŵa liŵandika. Wakugula wareke kusekere, wakuguliska wareke kuliya, chifukwa ukari we pawumba wawo wose. 13Pakuti wakuguliska kuti wakawerenga kwaku cho chaguliskika cha, po ŵeche ndi umoyo. Chifukwa ukari we pawumba wawo wose, kuti ukaweriyanga vuli cha; ndipo chifukwa cha uheni wake, palivi nanga njumoza wakusunga umoyo wake. 14Ŵamba mbata wose ŵajirongoso; kweni palivi nanga njumoza wakuya ku nkhondo, pakuti ukari wangu we pa wumba wawo wose.

Kurangika kwa ŵaYisraele chifukwa cha maulakwi ghawo

15“Lipanga le kubwaro, chideru ndi chilala vye mukati, yo we mu munda watufwa ndi lipanga; ndipo yo we mu msumba nja ndi chiwowota vithwazuwa. 16Ndipo asani ŵajako ŵakuthaŵa, ŵakaŵanga pa mapiri, nge ndi nkhunda za mudambo, wose ŵatenje, we yose pa uheni wake. 17Manja ghose ghatomboroka, ndipo makongono ghose ghazizira nge ndi maji. 18Ŵatijivwarika vigudulu mu chiunu, mantha ghati ŵabenekere; soni ze pa visku vyose, ndi phara pa mitu yawo yose. 19Ŵapong'a siliva wawo mu ŵagurwi, golide wawo waŵa nge nchinthu cha mwikhu; siliva wawo ndi golide wawo kuti viziŵa kuŵataska cha mu zuŵa la ukari wa Ambuya; kuti ŵaziŵa ku mariska nja yawo pamwenga kugutiska navyo chifu chawo cha. Chifukwa kubende kwawo kwaŵaŵiya chiguŵisku. 20Chitowero chawo chakujeduka ŵanguchitiya unkhankhu wa ŵaka, ndipo ŵanguchita vikozgu vyawo vya maunyakazi ndi vinthu vyawo vya maukazuzi, mu chifukwa cho ndikachichitanga kuŵa chinthu cha mwikhu kwaku iwo. 21Ndipo ndikaperekanga nge nchakuliwa mu manja gha ŵalendo, ndi ku ŵaheni ŵa charu cha pasi nge nchakuskoweka; ŵakachikazuzganga. 22Ndituzgengeko chisku changu kwaku iwo, mwakuti ŵakazuzge malo ghangu ghakupaturika; ŵakuphanga ŵakaserenga kughakazuzga, 23ndi kughasanduska phasulu.

“Chifukwa charu chazaza mirandu ya ndopa ndipo msumba wazaza viwawa, 24nditonge mitundu yiheni kwakuruska kuti ŵazipoke zinyumba zawo; ndikamariskanga kujikuzga kwawo kwanthazi, ndipo malo ghawo ghatuŵa ghakakazuzgikanga. 25Po urwirwi wafika, ŵakapenjanga chimangu, ndipo kuti chikaŵangapo cha. 26Soka lituza pa soka, mbiri yirondo mbiri; ŵapenja chiwona ku mchimi, kweni dangu limara ku mzukuru, ndi fundu ku ŵara. 27Karonga watenje, fumu yavwara soka, ndipo manja gha ŵanthu mu charu ghaphapha ndi mantha. Ndiŵachitiyenge kwakulingana ndi nthowa zawo, ndipo kwakuyana ndi vyeruzgu vya ŵeneko ndiŵeruzgenge; sono ŵakaziŵanga kuti ine ndine Ambuya.”

Currently Selected:

Ezekiele 7: TongaMw

Highlight

Copy

Compare