Ezekiele 24

Ntharika ya mumphika

1Pa zuŵa la chumi, la mwezi wa chumi, mu chirimika cha chinkhonde ndi chinayi, mazu gha Ambuya ghanguza kwaku ine: 2“Mwana wa munthu, ulembe zina la zuŵa ili, inya zuŵa lenili ili. Karonga waku Babiloni wagoŵa ku Yerusalemu zuŵa lenili. 3Kamba ntharika ku nyumba ya chigaruka uŵanene kuti, ‘Viyo atiti Ambuya Chiuta:

Jarikapo mumphika, jarikapo, udemo maji:

4ŵikamo mathuŵi gha nyama,

mathuŵi ghose ghamampha,

chigha ndi mkono;

uzazemo viwanga vyakusankhika.

5Utoko chakusankhika chavyakuŵeta,

uwunjike mulu wa nkhuni kusi kwake;

ubike mathuŵi ghake,

viwanga vyake navyo

vipwapwatenge nwenimo.’

6“Chifukwa cho atiti Ambuya Chiuta: Soka lo msumba wa ndopa, ku mumphika wo wachita uloso, weniwo uloso wake kuti waturiya kubwalo cha! Tuzganimo thuŵi ndi thuŵi, kwambura kusankha cha. 7Chifukwa ndopa zo wakudiska zeche mukati mwake; wanguzinika pa jarawi, kuti wanguzidira pasi kuti waziwundi ndi fuvu cha. 8Kuyuska ukari wangu, kuwezge thayu, ndopa zo wangudiska ndazinika pa jarawi, mwakuti zireke kuwundika. 9Chifukwa cho Ambuya Chiuta watiti; Soka lo ku msumba wa ndopa! Ine nani so ndikachitanga mulu ukuru. 10Unjika nkhuni, pemba noto, bika umampha nyama, ubuwe yo yafya, viwanga vifye. 11Sono jarika mumphika wambura kanthu pa maka, alinga kuti ufye, ndipo mkuŵa wake ufye, mwakuti kufipa kwake kusongonokemo, uloso wake umare. 12Ndajivukiska kwa waka, chingana ndi moto kuti utuzgamo kugandirwa kwa uloso wake cha. 13Uloso wake nkhufipiskika kwa ukazuzi wako. Chifukwa ndingwesa kukusuka kuti ungutozgeka cha kukufipirwa kwako, ndipo kuti ukatozgekanga so cha mpaka penipo ine ndakhorwa ndi kukara kwangu paku iwe. 14Ine Ambuya ndarongoro; kukachitikanga, ndikachichitanga; kuti ndikaweriyanga kuvuli cha, kuti ndikarekeliyanga, pamwenga kugowoka nako so cha, kwakulingana ndi nthowa zako ndi machitidu ghako ndikakweruzganga, atiti Ambuya Chiuta.”

Nyifwa ya muwoli waku Ezekiele, nchisimikizgu cha paku Yuda

15Ghangundiziya so mazu gha Ambuya: 16“Mwana wa munthu, awona, nde pafupi kutuzgako likondwa ku maso ghako kwamabuchibuchi; kweni ureke kutenje pamwenga kuliya nanga nkhudiska masozi. 17Fwifwinthiya, kweni kwakuvwika cha; kuchita kutenjere wakufwa cha. Manga chilemba chako, vwara viyato vyako; ungajaranga milomo yako cha, nanga nkhurgha chiŵande cha ŵakutenje.” 18Viyo ndingukamba ku ŵanthu ndi mlenji, ndipo ku mazulo muwoli wangu wangufwa. Ku mlenji unyake ndinguchita nge ndi mwenimo ndingulangulikiya.

19Ndipo ŵanthu ŵangunena nane, “Kumbi kuti ukatikambiyanga cha cho vinthu ivi vititing'anamuliya, po iwe uchita viyo?” 20Ine ndingunena nawo, “Ghangundiziya mazu gha Ambuya: 21‘Kamba ku nyumba yaku Yisraele, Viyo atiti Ambuya Chiuta: Ehe, ndikafipiskanga malo ghangu ghakupaturika, kujikuzga kwa mazaza ghamu, likondwa la maso ghinu, ndi linweka la mzimu winu; ndipo ŵana ŵinu ŵanthurumi ndi ŵanthukazi wo mwaŵasiya kuvuli ŵakabayikanga ndi lipanga. 22Imwe mukachitanga mo ine ndachitiya kuti mukajaranga milomo yinu cha, pamwenga kurgha vya ŵakutenje. 23Vilemba vikaŵanga ku mitu yinu, viyato ku marundi ghinu; kuti mukatenjenga nanga nkhuliya cha, kweni mukawondanga mu kwananga kwinu ndi kutamantha yumoza ku munyake. 24Viyo ndimu Ezekiele wakaŵiyanga chisimikizgu kwaku imwe, mukachitanga kwakulingana ndi vyose vyo iyo wachita. Chitakuti chafika ichi, penipo ndipo mukaziŵanga kuti Ine ndine Ambuya Chiuta.’

25“Ndipo iwe, mwana wa munthu, pa zuŵa lo ndikatuzgiyangapo malinga ghawo, chimwemwe ndi unkhankhu wawo, likondwa la maso ndi linweka la mitima yawo, ndipo so ŵana ŵawo ŵanthurumi ndi ŵanthukazi, 26yo wapozomoka mu zuŵa leniliya ndiyo wakazanga kwako kuzachikunene makani. 27Pa zuŵa liya mlomo wako ukajurikiyanga kwaku yo wapozomoka, ukarongoronga kuti ukaŵanga so wambuwu cha. Viyo ukaŵanga chisimikizgu kwaku iwo; ndipo ŵakaziŵanga kuti ndine Ambuya.”

Currently Selected:

Ezekiele 24: TongaMw

Highlight

Copy

Compare