Ezekiele 17

Ntharika ya nombo ndi muti wa mlanje

1Mazu gha Ambuya ghanguza kwaku ine: 2“Mwana wa munthu, ghanaghana ntharika, kamba chakweruzgiyapo ku nyumba yaku Yisraele; 3kuti, Viyo atiti Ambuya Chiuta: Nombo yikuru yakuŵa ndi mapapa ghakuru mavungwa ghatali, mavungwa gha mitundu yakupambanapambana, yinguza ku Lebanoni yinguto mphanda ya mlanje ya pachanya; 4yingufyo kusongoyiko kwa mphanda zake za kutefwatefwa yinguruta nayo ku charu cha maronda, ndi kujijarika mu msumba wa ŵamaronda. 5Penipo yingutoko mbeu ya charu chiya ndi kuyipanda pa malo gha nyata yeneko; yingupanda pafupi ndi maji ghanandi. Yinguwujintha nge ndi muti wa nkhorosa, 6ndipo ungukuwa unguŵa mphereska yakuthaza, yifupi, mphanda zake zingung'anamukiya kwaku iyo, kweni misisi yake yingujavi mwenimuwa yingumere. Viyo unguŵa mphereska, ungutuzga zimphanda ndi kubuska mani.

7“Kweni yinguŵaku so nombo yinyake yikuru yakuŵa ndi mapapa ghakuru ndi mavungwa ghanandi; ndipo awonani, mphereska iyi yingugoŵeke misisi yake kurazga kwaku iyo, ndi kutambaluriya mphanda zake kwaku iyo mwakuti yiwudiriyenge maji. Yinguwuzuwa pa mugando wo yingupandikapo 8ndi kuyipanda pa nyata yamampha pafupi ndi maji ghanandi, mwakuti yituzgi zimphanda, yiŵi ndi vipasi, ndi kuti yiŵi mphereska yakuzirwa. 9Ukambe, Viyo atiti Ambuya Chiuta: Kumbi yisakatenge? Asi yikazuwanga misisi yake ndi kudumuwa mphanda zake, viyo kuti muti wose ukamiranga, mani ghakafotanga? Kuti ukhumbenge janja lanthazi pamwenga ŵanthu ŵanandi cha pa kuzuwa misisi yake. 10Ehe, asani wungazulika kwachiwoke, kumbi ukasakatanga? Asi ukafotanga uchipumika ndi mphepo ya kuvuma, kufote limu pa mugando po ungume?”

11Ghangundiziya mazu Ambuya: 12“Sono kamba ndi nyumba ya chigaruka, Kumbi kuti muziŵa cha cho vinthu ivi ving'anamuwa? Ŵanene kuti, Awonani karonga waku Babiloni wanguza ku Yerusalemu, wangwazito karonga ndi mafumu ghake wanguruta nawo ku Babiloni. 13Ndipo wanguto yumoza wa mbeu ya ufumu wanguchita nayo phanganu, kumurapiya rapu. (Wanguto ŵaraŵara ŵa charu, 14mwakuti ufumu uŵe wakujiyuyuwa ndi kuti ureke kujikwezga, viyo kuti pakusunga phanganu lake ukajaririyanga.) 15Kweni wangumugarukiya pakutuma ŵamirizi ku Egipiti, kuti ŵamupaske ŵakavalo ndi nkhondo yinandi. Kumbi wakaruskanga? Kumbi wangapozomoka munthu wakuchita ivi? Waswe phanganu ndi kupozomoka? 16Mo ndiliri wamoyo, atiti Ambuya Chiuta, kwakuneneska mu malo mo karonga waja yo wangumuŵika kuŵa karonga, yo wanyoza rapu lake, yo watuswa phanganu lo wangupangana nayo, mu Babiloni wakafwanga. 17Farao ndi nkhondo yake yanthazi ndi mzinda ukuru wa nkhondo kuti wakamovyanga mu nkhondo cha, po vimbumira vikamikikanga malinga ghakazengekanga kudumuwa ma umoyo gha ŵanandi. 18Chifukwa wangunyoza rapu, wanguswa phanganu, chifukwa wangupereka janja lake, wanguchita vyose ivi, kuti wakapozomokanga cha. 19Chifukwa cho atiti Ambuya Chiuta: Mo ndiliri wamoyo, nadidi rapu langu lo wangunyoza, phanganu langu lo wanguswa, ndikaviwezgiyanga pa mutu wake. 20Ndikatandikanga mukwawu wangu paku iyo, ndipo wakakorekanga mu chiŵana changu, ndikamuwezgiyanga ku Babiloni kwenikuwa ndiko ndikaserenga nayo pa cheruzgu chifukwa cha mrando wa chigaruka wo wandichitiya. 21Ndipo vilimbi vyake vyose vyankhondo vikabayikanga ndi lipanga, ndipo ŵakujapo wo ŵakambininikiyanga ku mphepo zose, ndipo mukaziŵanga kuti ine, Ambuya, ndarongoro.”

22Viyo atiti Ambuya Chiuta: “Ine ndamwene ndikatongako mphunu ya songo yakutefwatefwa ya mlanji ndikayimikanga; ndikafyonga kusongo yiko kwa mphanda zake ziteta, ndipo ine ndamwene ndikayipandanga pachanya pa phiri litali lakuzonthoka; 23ndikayipandanga pachanya pa phiri litali laku Yisraele, mwakuti lituzgi mphanda ndi kupasa chipasi, ndi kuŵa mlanji wakuzirwa; ndipo mitundu yose yazinyama yikajanga musina mwake; mu miduzi ya mphanda zake mukaŵanga vizimbu vya chiyuni che chose. 24Miti yose ya mudondo yikaziŵanga kuti ine Ambuya ndisiskiya pasi muti utali, ndikukwezge pachanya muti ufupi, kumizga muti uŵisi, ndi kusundiska muti wakumira. Ine Ambuya ndarongoro, ndipo ndikachichitanga.”

Currently Selected:

Ezekiele 17: TongaMw

Highlight

Copy

Compare