1 Timote 1

1Kalata wakutuwa kwaku Paulo wakutumika waku Kristu Yesu, uli ndi langulu laku Chiuta Mtaski widu, ndi laku Kristu Yesu, Chigomekezgu chidu, 2kwaku Timote, mwana wangu mweni-mweni mu chivwanu: wezi, lisungu, chimangu, vyakutuliya kwaku Chiuta Dada ndi Kristu Yesu Ambuyafwe.

Chenjezgu ndi visambizgu vyautesi

3Uli ndimo ndinguchichizgiya iwe kujaririya mu Efeso, po ndayanga ku Makedonia, alinga kuti ulanguliye ŵangana kureka kusambizga chamwenga, 4ndi so kureka kuphwere zinthanu ndi vikazi vyambura umari, vyenivyo vitata malifumbafumba ukongwa kwakuruska mlimu waku Chiuta wamu chivwanu; sono nako ndichitiya viyo. 5Kweni kamaridu ka chilangulu chonchanju chakutuwa ku mtima ukhovu ndi njuŵi yamampha ndi chivwanu chambura fuzi: 6kwaku vyenivyo vinthu ŵanyake pakuwindako ŵatenderukiya ku makani ghauzereza; 7pakukhumba kuŵa ŵasambizgi ŵa chilangulu, ŵauravi kuteska chingana ndi vyenivyo ŵakamba, chingana ndi vyenivyo ŵakokomezgapo.

8Kweni tiziŵa kuti dangu lo ndamampha asani munthu we yose wachitiya nalo kwadangu, 9wakuziŵa ichi, kuti dangu lilive kuŵikikiya murunji, kweni likuŵikikiya ŵambura kuziŵa dangu ndi ŵambura kuvwiya, ŵambura kopa Chiuta ndiŵalakwi, ŵambura urunji ndi ŵamtafu, ŵakubaya-ŵauskeu ndi ŵakubaya-ŵanyinawo, ŵakubaya ŵanthu, 10ŵareŵi, ŵakura ndi ŵanthurumi, ŵachivwamba, ŵatesi, ŵakurapa kwautesi, ndi kose kanyake asani kamikirana ndi chisambizgu chizirima; 11uli ndi evangeli wa unkhankhu waku Chiuta wakutumbikika, weniwo ine ndingugomekezgeka nawo.

Viwongo chifukwa cha lisungu laku Chiuta

12Nditumuwonga yo wangundinthaziska, Kristu Yesu Ambuyafwe, mwakuti wangundipima wamagomekezgeka, pakujiŵikiya ine mu uteŵeti; 13ine ndawakuŵa kali mtokota ndi wakuŵemba ndi wamtonyoru: kweni ndinguchitikiya lisungu, pakuti kwambura kuziŵa ndinguchitiya viyo mu uwura chivwanu; 14ndipo ungufurwiya ukongwa wezi wo wa Ambuyafwe pamoza ndi chivwanu ndi chanju chamwaku Kristu Yesu. 15Ndamagomekezgeka nenedu lo, ndipo ndakwenere kurondeka kose, lakuti Kristu Yesu wanguza mu charu kwachitaska ŵalakwi; waku ŵeniwo chiŵinda ndine; 16ndikweni pa chifukwa chaku chenichi ndinguchitikiya lisungu, alinga kuti mwaku ine ndachiŵinda Yesu Kristu waurongole unkhunthiya wake uzirima, uli nchandiru cha ŵakukhasa kuvwaniya mwaku iyo ku umoyo wamuyaya. 17Kweni ku Karonga wamuyaya, mziramawoleka, wambura mawonekeka, Chiuta wayijayija, kuŵiye thamu ndi unkhankhu muyaya-muyaya. Ameni.

18Langulu lenili ndipazgiya iwe, Timote, wamwana wangu, uli ndi mauloska ghakukapo pako kali, alinga kuti mwaku gho ulipote homwa lo leneko, 19pakuŵa ndi chivwanu ndi njuŵi yamampha, yeniyo ŵanyake ŵajipankhuliya, ndipo ŵagaruka kuchiri ku chivwanu cho: 20ŵaku ŵeniwo ndi Humenayo ndi Alezandro, wo ndapereka kwaku Satana, alinga ŵalangike kureka kutokoska.

Currently Selected:

1 Timote 1: TongaMw

Highlight

Copy

Compare