1 ŴaTesalonika 4

Umoyo wo ukondweska Chiuta

1Viyo pakumariya, mwa ŵabali, tiŵeyere ndipo tichiskiya imwe mu Ambuya Yesu, kuti, uli ndimo munguvwiya kwaku ifwe mo mutenere kujariya ndi kukondweske Chiuta, uli ndimo so muchitiya, murutiriyenge kwakukiyakiya. 2Chifukwa muziŵa malangulu ghenigho tingumpaskiyani mu Ambuya Yesu. 3Chifukwa khumbo laku Chiuta ndenili, kutozgeka kwinu nkhwakuti mujitintheko ku ureŵi: 4kuti munthu yose waku imwe waziŵe kuŵa nayo muwoli waku yija mu kupaturika ndi ulemu, 5mu ulakalaka wa likhumbira cha, nge ndi mitundu yakuura kumziŵa Chiuta; 6paŵevi yumoza wakunyumba ndi wakuŵiniwa mbali wake mu kanthu: chifukwa kuti Ambuya ndi mweruzgi mwaku vyenivyo vyose, nge ndimo tingumkambiyani limu ndi kusimikizga. 7Chifukwa Chiuta kuti wangutidaniya ku wiyu cha, kweni ku upaturika. 8Viyo yose wakukana ichi kuti wakaniya munthu cha, kweni Chiuta, yo wakupaskani Mzimu wake Wakupaturika.

9Kweni kuti mukavuka cha kuti yumoza walembe kwaku imwe ghapa kwanja-ŵabali: chifukwa mwaŵeni mwasambizgika ndi Chiuta kwanjana; 10pakuti nadi mutiŵanja wose ŵabali ŵamu Makedonia. Kweni titikuchiskani, mwa ŵabali, rutiriyani, ukongwaku; 11pakuphwererana mu kuja kwakuzika, ndi kutakatakiya vyaku mwaŵeni, ndi kutataliya ndi manja ghinu, uli ndimo tingumlanguliyani; 12alinga kuti mwendenge kwakukongora kuchiri ku ŵakubwaro, ndi kuti mungakavuka kanthu cha.

Kuza kwa Ambuya

13Kweni kuti tikhumba cha, mwa ŵabali, kuti mureke kuziŵiyapo paku wo mbakura tulo; alinga kuti mungafwa chisungu cha, nge mbanyake nawo wo ŵalive chigomekezgu. 14Chifukwa asani tivwana kuti Yesu wangufwa ndi wanguyuka, viyo so Chiuta, mwaku Yesu, waŵatoliyenge pamoza nayo wo mbakura tulo. 15Chifukwa tikukambiyani chenichi mu mazu gha Ambuya, kuti ifwe taŵamoyo, taŵakujaririya ku chiwoneka cha Ambuya, kuti tikaŵadanjiriyanga kose cha wo mbakura. 16Pakuti Ambuya ŵeneko ŵakasikanga kutuwa kuchanya ndi mdanu, ndi mazu gha mungelo-mura, ndi ndi mbata yaku Chiuta; ndipo ŵakufwiya mwaku Kristu ŵakayukanga danga: 17pavuli pake ifwe taŵamoyo, taŵakujaririya, tikakwamphulikiyanga pamoza nawo mu mitambo, kwachikumana ndi Ambuya mude; ndipo viyo tikaŵanga muyaya pamoza ndi Ambuya. 18Viyonthu sangaruskanani ndi mazu yegha.

Currently Selected:

1 ŴaTesalonika 4: TongaMw

Highlight

Copy

Compare