AROMA 16

Paulo apereka mwenyikiro kuna anyakukhulupira

1Ndikumpereka nyamaingathu Febe kuna imwe, nyakutumikira mpingo wa ku Kenkerea ule. 2Mtambireni mwadidi na dzina ya Mbuya, ninga mwathema anthu a Mulungu kuchita, pontho mphedzeni na pinthu pinasowa iye, thangwi iye achita udidi kuphedza nawo anthu azinji pontho na ine ene.

3Ndinapereka mwenyikiro kuna Prisila na Akila, anzanga akuphata nawo basa pabodzi yakutumikira Yesu Khristu;#Mab. 18.2. 4iwo adasasanyika kufa, thangwi ya ine pano. Ndinapereka takhuta kuna iwo, kwache si ine ndekha ndinapereka takhuta tayu, mbwenye na mipingo ene ya anthu okhonda khala Ayuda. 5Ndikupereka pontho mwenyikiro kuna mpingo umbagumanyikana m'nyumba mwawo kupemphera ule.

Ndikupereka mwenyikiro kuna shamwalianga wapamtima, Epeneto, ule akhali munthu wakutoma kukhulupira Khristu m'nthemba ya Asia. 6Mwenyikiro kuna Maria, akuphatirani basa mwakuwangisa ule. 7Mwenyikiro pontho kuna Androniko na Yunia,#16.7 Yunia: penu Yuni; pyakulembwa pinango pyakale pyalongaZhulia. Ayuda anzanga akhali na ine pabodzi m'perezo ale; iwo akhali akudziwika pakati pa anyakutumwa, pontho iwo akhali akutoma kusanduka akhristu ine mbandidzati.

8Mwenyikiro kuna Ampiliato, shamwalianga wapamtima mukuphatanizana kwathu na Mbuya. 9Mwenyikiro kuna Urubano, nyabasa mwanzanga pabasa ya Khristu, na Staku, shamwalianga wapamtima ule. 10Mwenyikiro kuna Apele, ule kukhulupirika kwache kuna Khristu kwatsikimizwa. Mwenyikiro kuna onsene a m'banja ya Aristobulo. 11Mwenyikiro kuna Herodiono, Myuda mwanzanga, pontho kuna abale onsene m'banja ya Narikiso.

12Mwenyikiro kuna Trifena na Trifosa, akazi ale ambaphatira basa Mbuya, pontho na shamwalianga wapamtima Perisi, ule achita pizinji kuphatira basa Mbuya. 13Ndikupereka mwenyikiro kuna Rufu, nyabasa adasankhulwa kutumikira Mbuya ule, pabodzi na mache ene, ule ambakhala ninga mamanga ene.#Mk. 15.21. 14Mwenyikiro kuna Asinkrito, Felego, Hereme, Patiroba, Herima na akhristu anango onsene ali kweneko pabodzi nawo. 15Mwenyikiro kuna Filologo na Zhulia, kuna Nerea na nyamaingache ene, kuna Olimpa, pontho kuna anthu onsene a Mulungu ali kweneko pabodzi nawo.

16Pasanani mwenyikiro wachikhristu kuonesa kufunana unango na mwanzache. Mipingo yonsene ya Khristu kuno ikupereka mwenyikiro kuna imwe.

Mafala akumalisa nawo

17Abale anga, ndikukupemphani kuti mukhale m'maso na ale ambagawanisa anyakukhulupira na kudzudzumisa chikhulupiro chawo pakupokanya pinthu pidafunziswa imwe pile. Tenepo khalani kutali nawo. 18Anthu ambachita pinthu ninga penepi ale nkhabe kutumikira Khristu Mbuyathu tayu, mbwenye ambatumikira pikhumbo pyawo. Na kudziwa kwawo kulonga, pontho na mafalawo akutapira, iwo ambanyengeza anthu anango okhonda dziwa pinthu. 19Anthu onsene ava pya kuvera kwanu Mphangwa Zadidi, tenepo na thangwi yeneyi ndakomerwa namwe pyakwanga. Ine ndikupifuna kuti imwe mukhale anthu anzeru zakudziwa pinthu pyadidi, kwache okhonda dziwa pinthu pyakuipa. 20Tenepo Mulungu, mwenechiro mtendere, anapeya chinchino pano Satana pansi pa manyalo anu.

Kukoma mtima kwa Mbuyathu mbakukhale namwe.#16.20 Kukoma…kukhale namwe: Pyakulembwa pinango pyakale pyanumpha mzera wenewu. 21Timoti, mwanzanga wakuphata naye basa pabodzi, akupereka mwenyikiro kuna imwe. Lukio, Yasoni na Sosipatro, Ayuda anzanga akuchitambo chibodzi-bodzi.#Mab. 16.1.

22Ine, Teritio, nyakulemba kalata ya Pauloyi, ndikuperekambo mwenyikiro wachikhristu kuna imwe.

23Gayo, nyakundikoya m'nyumba mwache, pontho ule mpingo umbagumanyikana m'nyumba mwache akupereka mwenyikiro kuna imwe. Erasito, nyakukoya kobiri za mzinda na mbaleathu Kwarto ene, akupereka mwenyikiro kuna imwe.#16.23 Gayo…kuna imwe: Pyakulembwa pinango pyakale pyathimiza vesi 24: Kukoma mtima kwa Mbuyathu Khristu kukhale namwe monsene. Ameni; pinango pyathimiza vesi yeneyi kubuluka vesi 27.#Mab. 19.29; 1Akor. 1.14; 2Tim. 4.20.

Kukuza Mulungu kwakumalisa

25Tendeni tipereke demelero kuna Mulungu. Iye anakwanisa kukuchitisani kukhala na chikhulupiro chakuwanga, malingana na Mphangwa Zadidi zakulonga pya Khristu zimbalalika ine, pontho na udziwisi wa pyakubisika pyakuonadi pidabiswa kuna mifendu izinji ene m'nduli pile. 26Kwache chinchino, pyakuonadi penepi pyaoneswa pakwecha kudzera muna pidalembwa na maprofeti, pontho kudzera muna matongero a Mulungu wakukhala na kukhala ule, lero pyadziwika kuna anthu a madzinza onsene, towera apive na kupikhulupira.

27Kuna Mulungu yekha, Mulungu wanzeru zonsene, kukhale demelero kudzera muna Yesu Khristu kwenda na kwenda! Ameni.#16.27 Kuna…Kwenda! Ameni: Pyakulembwa pinango pyakale pina mavesi 25-27 pano, pontho na kubuluka pa 14.23; pinango pili nawo kubuluka pa 14.23 kwene basi; ibodzi ili nawo kubuluka pa 15.33.

Currently Selected:

AROMA 16: SenaMw

Highlight

Compare

Copy