KALEMBERA 34
34
Madire a dziko ya Kanani
1MBUYA adapanga Mose 2kulonga kuna Aisraele kuti: “Mungapita m'dziko ya Kanani, dziko inafuna ine kukupasani, madire ache anakakhala tenepa. 3Madire akumwera anafumuka mpakana kuthando yatchetcha ya Zini nkhwenderatu kumadire a Edomu. Kumabulukiro dzuwa, madire anu anatomera pale padadolomera Nyanza Yakufa kumwera. 4Kubuluka kweneko anaenda kumwera kwendera kumakata a Akarabimu mbathimiza kugwanda na mu Zini mpakana kumwera kwa Kadeshi Barinea. Kubuluka kweneko anagonyera kumpoto kumadokero dzuwa kwache kwendera ku Hazari-Adari mbaenderatu ku Azimoni, 5kule kunafuna iwo kwendera kuphedi kumadire a Iguputo mbadza kumadolomero a Bara ya Mediterania.
6“Madire akumadokero dzuwa anakhala Bara ya Mediterania.
7“Madire akumpoto anaenderatu kubulukira ku Bara ya Mediterania mpakana ku Phiri ya Hori, 8pontho kubulukira kweneko kwenda kumakata a Hamati. Anathimizirika kwenda ku Zedadi, 9pontho ku Zifironi mbakadolomera pa Hazari-Enani.
10“Madire akumabulukiro dzuwa anaenderatu kubulukira ku Hazari-Enani mpakana ku Shefamu. 11Kubuluka kweneko anaenda ku Haribele, kumabulukiro dzuwa a Aini mpakana kumapiri akumabulukiro dzuwa a m'khundu-khundu mwa nyanza ya Galilea, 12kubuluka kweneko anapita m'khundu-khundu mwa mkulo wa Yorodani mpakana ku Nyanza Yakufa.
“Madire a makhundu manayi a dziko yanuyo ngenewa.”
13Natenepo Mose adalonga kuna Aisraele mbati, “Dziko inafuna imwe kutambira pakuchita ntsango ile yapereka MBUYA kuna madzinza mafemba na Manase wakumadokero dzuwa njeneyi.#Kal. 26.52-56. #Yos. 14.1-5. 14Madzinza a Rubeni na Gadi pontho na Manase wakumabulukiro dzuwa atambira kale dziko yawo, ile idagawiwa malingana na mabanjawo, 15kumabulukiro dzuwa a mkulo wa Yorodani kuyang'anisana na Yeriko.”
Akadamu apaswa basa yakugawa dziko
16MBUYA adalonga kuna Mose mbati, 17“Eleazara nyansembe na Yoswa mwana Nuni ndiye anati agawe dzikoyi pakati pa Aisraele. 18Ukwate pontho mkadamu mbodzi padzinza yonsene kuti aphedzane nawo kugawa dzikoyi.” 19-28Amuna adasankhula MBUYA kukhala akadamu mbawa:
| Dzinza ya Yuda: Kalebu mwana Yefune |
| Dzinza ya Simioni: Shelumiele mwana Amihudi |
| Dzinza ya Benjemani: Elidadi mwana Kisiloni |
| Dzinza ya Dani: Buki mwana Yogili |
| Dzinza ya Manase: Haniele mwana Efodi |
| Dzinza ya Eferemu: Kemuele mwana Shifitani |
| Dzinza ya Zebuloni: Elizafani mwana Parinaki |
| Dzinza ya Isakara: Palatiele mwana Azani |
| Dzinza ya Asheri: Ahihudi mwana Shelomi |
| Dzinza ya Nafitali: Pedahele mwana Amihudi. |
29Amuna enewa mbale adasankhula MBUYA kuti agawe dziko pakati pa Aisraele m'dziko ya Kanani.
Currently Selected:
KALEMBERA 34: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
