LEVITIKO 6

1MBUYA adathimiza kulonga kuna Mose:#Kal. 5.5-8. 2Munthu athema kupagali ngakhala anadawira MBUYA pakukhonda kubwezera chinthu chidampinyolesa Muisraele mnzache, penu pakumbera chinthu mwanzache, penu pakumnyengeza, 3penu pakumnamiza pya chinthu chakutayika kudumbira kuti iye hadachilokote tayu. 4-5Ngakhala munthu adawa munjira zenezi, iye apagali chinthu chidakwata iye mwakukhonda kuona mtima chile. Pansiku inagumanwa iye kuti adawa, iye ampagali mwenechiro ule chinthu chonsene chidakwata iyecho, pontho na chachishanu cha kontache chakuthimizirapo. 6Iye athema kudza na bira wamamuna penu mbuzi wakusowa chilema kuna nyansembe ninga nsembe yakupagalira kudawa kwache kuna MBUYA. Kontache yathema kukhala yakuthemerana na mdida ukhaphatiswa basa ndzidzi wenewo. 7Nyansembe athema kupereka nsembe thangwi ya kudawa kwa munthu, tenepo munthuyo analekererwa.

Mwambo wa nsembe zakupyerera

8MBUYA adatonga Mose 9kupanga Aroni na anache pya mwambo wa nsembe zakupyerera. Mwambo wache ngufu: Nsembe zakupyerera zathema kusiyiwa paguwa yansembe mosiku onsene. 10Tenepo nyansembe athema kubulusa dotha paguwapo mbaiikha m'khundu mwa guwayo uku avala mkhanjo na kapundu wache. 11Kubuluka penepo iye athema kudula nguwo zachezo kuvala zinango, pontho athukule dotha ile kwenda nayo kunja kwa msasa kumbuto yakuchena pamaso pa Mulungu. 12Moto wa paguwapo wathema kuthimiza kugaka basi mbuleke thimiswa. Na machibese onsene nyansembe athema kuikha nkhuni paguwapo, kusanjika mwadidi nsembe yakupyerera ile, na kuotcha mafuta a nsembe yachiphatizano ile. 13Ndzidzi onsene moto wathema kuthimiza kugaka basi paguwa yansembeyo, pontho mbuleke kuthimiswa.

Mwambo wa pyakupereka pya mapira

14Ufu ndi mwambo wa pyakupereka pya mapira. Ana a Aroni anyansembe athema kudza na chakupereka cha mapira kuna MBUYA kutsogolo kwa guwayo. 15Kubuluka penepo athema kukwata ufa wakudzala m'manja, mafuta pang'ono, na pyakufukiza pyakununkhira pyache mwenemo. Angamala penepo apiotche paguwa yansembe ninga chidzindikiro kuti pyonsene pyaperekwa kuna MBUYA. Khwemache imbamkomera MBUYA. 16-17Anyansembe athema kudya pyonsene pyakusalirapyo. Ipyo pyathema kuphikwa ninga mkate wakusowa chakufufumisira, pontho pyathema kudyerwa m'mbuto yakupambulika, muchintalo cha Chikhumbi cha Mulungu. MBUYA apipereka kuna anyansembe ninga khundu yawo ya nsembe yakusasanywa na moto. Mphyakuchena pyakwanga ninga nsembe yakulekerera pyakudawa na nsembe yakupagalira pyakudawa. 18Mifendu yonsene inadzayo pidzukulu pyonsene pyachimuna pya Aroni anadya penepi ninga khundu yawo ya nsembe zakusasanywa na moto zakuperekwa kuna MBUYA. Munthu unango onsene anakhuya chakupereka chakusasanywa na moto anavungwa na mphamvu za kuchena kwache.

19MBUYA adathimiza kulonga kuna Mose. 20Pansiku inadzozwa Aroni na anache achimuna kukhala anyansembe, athema kupereka pyakupereka pya ufa kuna MBUYA wakukwana kilogramu ibodzi (mdida onthowo wa nsiku na nsiku wa pyakupereka pya mapira), augawe pakati na kati; khundu inango na machibese, khundu inangoyo na mawulo. 21Pyathema kuvungazwa na mafuta akuphikira mbapikazingwa m'chiwaya. Kubuluka penepo athema kunyedza-nyedza na kuupereka ninga chakupereka cha mapira. Khwemache imbamkomera MBUYA. 22Mifendu yonsene inadzayo nsembe yeneyi yathema dzasasanywa na chidzukulu chonsene cha Aroni, anatumikira ninga Nyansembe Wamkulu ule. Yeneyi yathema kupyerezwa monsene mwene ninga nsembe yakuperekwa kuna MBUYA. 23Nkhabe khundu ya chakupereka cha mapira chakuperekwa na nyansembe yathema kudyiwa tayu; yonsene yathema kupiswa.

Mwambo wa nsembe zakulekerera pyakudawa

24MBUYA adatonga Mose 25kupanga Aroni na anache pya mwambo wa nsembe zakulekerera pyakudawa. Nyama yakuperekwa kubulusira napyo pyakudawa yathema kuchekerwa kukhundu yakumpoto kwa guwa, kumbachekerwa nyama za nsembe yakupyerera kule. Nsembe zenezi nsakuchena pyakwanga. 26Nyansembe anapereka nsembe nyamayo athema kuidyera m'mbuto yakupambulika, muchintalo cha Chikhumbi cha Mulungu. 27Munthu penu chinthu, angakhuya kwene nyama yeneyi anavungwa na mphamvu za kuchena kwache. Ngakhala nguwo penu chinthu cha panguwo panu chadoderwa na chiropa cha nyama, nguwoyo yathema kufulirwa m'mbuto yakupambulika. 28Chikalango chinaphikirwa nyama yeneyi chathema kuswiwa, pontho ngakhala aphatiswa basa ndi supulia athema kukwechiwa mwadidi na kutsukwa na madzi. 29Mamuna onsene wa m'banja ya unyansembe anakwanisa kudya nyama yeneyi; njakuchena pyakwanga. 30Mbwenye ngakhala chiropa cha nyama yakubulusira nayo pyakudawa chadzeswa m'Chikhumbi mbachikhala nsembe yakubulusira nayo pyakudawa m'Mbuto Yakuchena, yeneyi nee yathema kudyiwa tayu, yonsene ipiswe.

Currently Selected:

LEVITIKO 6: SenaMw

Highlight

Copy

Compare