LEVITIKO 11

Nyama zakuthema kudyiwa

(Deut. 14.3-21)

1MBUYA adapanga Mose na Aroni kulonga kuna Aisraele kuti: 2Imwe munakwanisa kudya nyama zonsene za pamtunda 3zakugawanikana njondo, pontho na zakulukula, 4-6mbwenye lekani kudya ngamila, mbira na sulo. Nyama zenezi mwathema kuziyesa zokhonda chena; izo zimbalukula, mbwenye njondo zawo nsokhonda gawanikana. 7Lekani kudya nkhumba. Mwathema kuziyesa zokhonda chena; izo nsakugawanikana njondo, mbwenye nee zimbalukulabi. 8Lekani kudya nyama zenezi, penu kukhuya manungo awo ene zingafa, thangwi nsokhonda chena.

9Nsomba zonsene zakukhala na chitoto pontho na mabade, imwe munakwanisa kudya, 10mbwenye nyama zonsene za m'madzi zokhonda khala na chitoto na mabade, lekani kuzidya. 11Nyama ninga zenezi mwathema kuziyesa zokhonda chena pamaso pa Mulungu. Lekani kuzidya penu kukhuya manungo awo ene zingafa. 12Lekani kudya chinthu chonsene cha m'madzi chokhonda khala na chitoto na mabade.

13-19Lekani kudya mbalame izi: mphamba, dzidzi, gokomola, nyakasenera, matangwe, malezi, khungubwe, mphuwani, nkhukumadzi, magoti, chidokowe, vuwo-vuwo, mphipi, nyachigoti penu anyakalemwalemwa.#11.13 mphamba…anyakalemwalemwa: Mtundu wa mbalame zinango m'mavesi 13-19 nsokhonda dziwika mwadidi.

20Pirombo ping'ono-ping'ono pyakukhala na manthenga pyakukambadza mphyokhonda chena, 21kupambula pile pyakuchita kunumpha. 22Imwe munakwanisa kudya nyadzombe, ntchonjolokoto na ntchobwa. 23Mbwenye pirombo pinango ping'ono-ping'ono pyonsene pyakukhala na manthenga, pontho pyakuchita kukambadza mwathema kupiyesa pyokhonda chena.

24-28Munthu onsene anakhuya manungo a nyama zakufa zili m'tchindemu anakhala okhonda chena mpakana mawulo: nyama zonsene zakukhala na njondo, kupambula zile zina njondo zakugawanikana, pontho zakulukula pabodzi pene na nyama zonsene za miyendo minayi zakukhala na ngole. Munthu onsene anathukula manungo a nyama zakufazo afule nguwo zache, kwache iye anakhala okhonda chena mpakana mawulo.

29-30Kalikongwe, mbewa, godwa, tokhwe, mphenembe, nyankalibunyu, chiligwankhwa na nyakatendewa mwathema kupiyesa pyokhonda chena. 31Munthu onsene anakhuya manungo awo akufa anakhala okhonda chena basi mpakana mawulo. 32Pontho ngakhala manungo akufawo agwera pachinthu chinango, chinthucho chinakhala chokhonda chena. Penu ndi muti, nguwo, nthembe, sakha, nkhabe pinthu kuti chikuphatiswa basa yanji, chenecho chinatsukwa na madzi, mbwenye chinakhala chokhonda chena basi mpakana mawulo. 33Ngakhala manungo awo anagwera m'chikalango, pinthu pyonsene pili m'chikalangomo mphyokhonda chena; tenepo chikalangocho mwathema kuchiswa. 34Ngakhala madzi a m'chikalangocho agwera pachinthu chonsene chakuthema kudyiwa, chinthucho ntchokhonda chena; pontho chinthu chonsene chakumwiwa m'chikalango ninga chenechi chiyeswe chokhonda chena. 35Chinthu chonsene chakugwerwa na manungo akufa a nyama zenezi ntchokhonda chena, penu ndi chitofu cha dongo, penu mphendekali; pyonsenepyo pyathema kuswiwa. Ipyo mphyokhonda chena, tenepo imwe mwathema kupiyesa pyokhonda chena. 36Mbwenye mphuno ya madzi, penu pyakukoyeramo madzi pikulu-pikulu pinathimiza kukhala pyakuchena, podi kwene kuti onsene anakhuya manungo enewo anakhala okhonda chena. 37Ngakhala manungo abodzi agwera pa mbewu yakufuna kubzaliwa, mbewu yeneyo inathimiza kukhala yakuchena. 38Mbwenye ngakhala mbewuyo yavikwa m'madzi, tenepo manungo abodzi agwera mwenemo, mbewuyo inakhala yokhonda chena.

39Ngakhala nyama yakuthema kudyiwa inafa yokha, munthu onsene anaikhuyayo anakhala okhonda chena mpakana mawulo. 40Ngakhala munthu anadya phindi ya nyama yeneyi, iye afule nguwo zache, mbwenye anakhala okhonda chena basi mpakana mawulo; munthu onsene anathukula chakufayo athema kufula nguwo zache, kwache anakhala okhonda chena basi mpakana mawulo.

41Lekani kudya pyakulengwa pyonsene ping'ono-ping'ono pyakukambadza, 42penu pyakuchita kupsenda na mimba, penu kufamba na miyendo minayi penu mizinji. 43Lekani kupiswipisa mwekha ene pakudya penepi. 44Ine ndine MBUYA Mulungu wanu, natenepo imwe mwathema kupikoya mwekha ene akuchena, thangwi ine ndine wakuchena.#Lev. 19.2; 1Pet. 1.16. 45Ine ndine MBUYA, adakubulusani m'dziko ya Iguputo ule, towera ndikhale Mulungu wanu. Mukhale akuchena thangwi ine ndine wakuchena.

46Wenewu ndiye mwambo wa pya nyama, mbalame, na pyonsene pyakukhala m'madzi na kumtunda kwene. 47Mwathema kusiyanisa pakati pa kuchena na kukhonda chena pamaso pa Mulungu, pontho na pakati pa nyama zakuthema kudyiwa na nyama zokhonda thema kudyiwa.

Currently Selected:

LEVITIKO 11: SenaMw

Highlight

Copy

Compare