KUBULUKA 30

Guwa yakufukizirapo pyakununkhira

(Kub. 37.25-28)

1“Sasanya na matabwa akesha guwa yakufukizirapo pyakununkhira. 2Nkhomo zache zonsene zathema kukhala sasawa, ulaphiache ukhale kati ya khono, umimbache kati ya khono, pontho chengo chache#30.2 ulaphiache…chengo chache: ulaphiache 0.5m, pontho umimbache 0.5m, pontho chengo chache 0.9m. chikhale khono ibodzi. Nyanga zache m'nkhomo zinayi zathema kukhala phindi ibodzi na guwayo. 3Ukukutize mphampha na golidi chadi-chadi khundu zache zinayi, pontho uikhe chigundiro chagolidi m'nkhomo zache kuzungulira. 4Sasanya mphete zakuthukulira ziwiri zagolidi mbuziphatanize pansi pa chigundiro kumakhundu mawiri kuphatisa miti yakuthukulira guwayo. 5Sasanya miti yakuithukulira yakesha mbuikukutize na golidi. 6Ikha guwayi kunja kwa chinguwo chakumanikwa kutsogolo kwa Bokosi ya Chiverano. Yeneyi ndi mbuto inafuna kugumanikana ine na iwe. 7Machibese onsene Aroni angadza dzapukuta nyale, iye athema kufukiza pyakununkhira penepo. 8Iye athema kuchita chibodzi-bodzi ndzidzi unagasa iye nyale dzuwa ingathobila. Nsembe yeneyi yakufukiza pyakununkhira yathema kuthimiza kwenda m'tsogolo okhonda lekeza mifendu yonsene inadzayo. 9Leka pereka nsembe paguwa penepa pyakufukiza pyakununkhira pyakukhondeswa, nsembe za nyama, penu nsembe za mapira, pontho leka thira nsembe yachakumwa paguwapa. 10Kabodzi pachaka Aroni athema kuchita mwambo wakuchenesa guwa pakutswinga chiropa cha nyama yakuperekwa nsembe kulekerera pyakudawa panyanga zache zinayi. Penepi pyathema kuchitwa chaka na chaka mifendu yonsene inadzayo. Guwa yeneyi njakuchena monsene mwene, yakupambulika kuna ine, MBUYA.”

Msonkho wa Chikhumbi cha Mulungu

11MBUYA adalonga kuna Mose mbati, 12“Ungachita kalembera wa Aisraele kudziwa kuinjipa kwawo, mamuna onsene athema kundipagali kuombola moyo wache, towera kuvungika kuleke kudza pana iye ndzidzi unalembera iwe anthu. 13Munthu onsene wakwenda kuna anthu akulembwa kale athema kupagali kobiri yakukwana theka ya sekeli#30.13 sekeli: Sekeli ibodzi ndi sasawa na kobiri ya magera makumawiri. malingana na mdida wa sekeli wakuphatiswa basa nsiku na nsiku. Munthu onsene athema kupagali penepi ninga chakupereka kuna ine.#Kub. 38.25, 26; Mt. 17.24. 14Munthu onsene wakwenda kuna anthu akulembwa kale, kweneku nkhulonga kuti munthu wa pyaka makumawiri pyakubalwa, penu kupiringana penepo, athema kundipagali konta yeneyi. 15Nyakufuma aleke kundipagali kupiringana theka ya sekeli, pontho nyakutcherenga aleke kupereka pyakuchepa kupiringana kobiri yakukwana theka ya sekeli ndzidzi unandipagali iye konta yeneyi kuombola moyo wache. 16Gumanya kobiri zenezi kubulukira kuna Aisraele, tenepo uphatise basa kobirizo kuyang'anira mwadidi Chikhumbi cha Mulungu. Msonkho wenewu unakhala wakupagalira kuombola moyo wawo, tenepo ine ndinakumbuka kuatchinjiriza.”

Mphale yakusambira yankuwa

17MBUYA adalonga kuna Mose mbati, 18“Sasanya mphale yakusambira yankuwa yakukhala na thako yankuwa. Uiikhe pakati pa Chikhumbi na guwa yansembe, tenepo uikhemo madzi mwenemo.#Kub. 38.8. 19Aroni na anache achimuna athema kuphatisa basa madzi a m'mwenemo kusamba manja na kutsuka manyalo awo, 20mbadzati kupita m'Chikhumbi cha Mulungu, penu kufika chifupi na guwa kupisa nsembe na moto zakuperekwa kuna MBUYA. Tenepo iwo hanaphiwa tayu. 21Iwo athema kusamba manja na kutsuka manyalo awo, towera aleke kufa. Enewa ndi matongero, ale iwo na pidzukulu pyawo athema kuteweza mifendu yonsene inadzayo.”

Mafuta akudzoza nawo

22MBUYA adalonga kuna Mose mbati,#Kub. 37.29. 23“Kwata pyakununkhira pyadidiletu: Matugwe matanthatu a madzi a mure, makilogramu matatu a kinamoni wakununkhira, makilogramu matatu a kane wakununkhira, 24na makilogramu matanthatu a kasiya wakununkhira. Thimiza matugwe manayi a mafuta aolivi, 25pontho na penepi usasanye mafuta akupambulika akudzoza nawo akuvungazwa na nyaluso pakuvungaza pyakununkhira. 26Aphatise basa kudzoza nawo Chikhumbi cha Mulungu, Bokosi ya Chiverano, 27thebulu na pyombo pyache pyonsene, chakuikhirapo nyale na pinthu pyache pyonsene, guwa yakufukizirapo pyakununkhira, 28guwa yakuperekapo nsembe zakupyerera, pabodzi pene na pinthu pyache pyonsene na mphale na thako yache. 29Pambulira kuna ine pinthu penepi na njira yeneyi, tenepo pinakhala pyakuchena monsene mwene, pontho munthu onsene penu chinthu chonsene chinakhuya penepi chinavungwa na mphamvu za kuchena kwache.#30.29 pinavungwa na mphamvu za kuchena kwache: (Yang'anani 29.37). 30Tenepo dzoza unyansembe Aroni na anache, pontho apambulire kuna ine towera akhale anyansembe anga. 31Longa kuna Aisraele kuti, ‘Mafuta akudzoza nawo akupambulikawa athema kuphatiswa basa pa basa yanga mifendu yonsene inadzayo. 32Athema nee kudzolwa pamanungo a anthu tayu, pontho iwe wathema nee kusasanya mafuta anango ninga tenepa tayu. Ngakupambulika, tenepo uayese ninga akupambulika. 33Munthu onsene anasasanya mafuta ninga enewa, penu kuphatisa basa mafutawa kudzoza munthu, ule nee si nyansembe tayu, hanayeswave ninga mbodzi wa anthu anga tayu.’ ”

Pyakufukiza pyakununkhira

34MBUYA adalonga kuna Mose mbati, “Kwata sasawa pyakununkhira pyadidi ipi: Sitakati, onika, galibanumu na libano chadi-chadi. 35Upiphatise basa kusasanya pyakufukiza pyakununkhira pyakuvungazwa na nyaluso pakuvungaza pyakununkhira. Piikhe munyu kuti pikhale pyangwiro, pontho pyakuchena. 36Peya pinango pya ipyo kukhala ufa, tenepo pikwate uende napyo mbupiikhe m'Chikhumbi cha Mulungu kutsogolo kwa Bokosi ya Chiverano. Pyakufukiza pyakununkhira penepi pikhale pyakuchena monsene mwene. 37Leka phatisa basa njira zakuvunganizira pyakufukiza pyakununkhira sasawa ninga penepi kupidzoza wekha ene. Pikhale pinthu pyakuchena, pontho pyakupambulika kuna ine. 38Ngakhala munthu anasasanya pinthu ninga penepi kuti apiphatise basache, iye hanayeswave ninga mbodzi wa anthu anga tayu.”

Currently Selected:

KUBULUKA 30: SenaMw

Highlight

Copy

Compare