Lwiimbo lwa Solomoni 5
5
Mwaalumi
1Ndakasika mumuunda wangu, omwanaa baama, omooye wangu.
Ndacela mula atununkilizyo tumwi. Ndalya cimbulwe cabuci bwangu, ndanywa waini amukupa wangu.
Bakaintu
Amulye nobeenzuma, amunywe, mukkute nobayandwa.
Lwiimbo lwane
Mukaintu
2Ndalikoona moyo wangu walimvwide, mukuungwa-ungwa ndamvwa kokonkomona koti,
Mwaalumi
“Ndijulila omwanaa baama, omuyandwi wangu, ociziba cangu,
ootanduumyi musako. Mutwe wangu wateta alunywaanywa, masusu aangu ateta asikunku.”
Mukaintu
3Ndoona kale, ino ndisame buti alimwi?
Ndasamba kale kumaulu sena ndibije alimwi?
4Muyandwi wangu wajata cipinzyo, moyo wangu wakaduntauka.
5Ndakabuka kuti mupingulwide, tununkilizyo twa mula twali kuloka-loka kumaanza aangu.
Mafuta aamula alikuloka kuminwe yangu nindakali kupingulula.
6Ndakajalwida muyandwi wangu, pele nindakajalula ndakajana tawo.
Ndakatyompwa akaambo kakuti wakainka, ndakasoleka kumuyandaula
pele tiindakamujana. Ndakamwiita pele taakwe naakandivuwa.
7Aawo balindizi bamunzi bakandijana.
Bakanduuma mane ndakazimba akutikila bulowa,
bakandinyanga cisani cangu. Aabo balindila bwaanda bwamunzi.
8Akaka nobakaintu bamu Jelusalemu ndamulomba kuti
mwamujana muyandwi wangu, mumwaambile kuti lwanditola luyando.
Bakaintu
9Omukaintu oocebeka, twaambile mbwabede muyandwi wako.
Ino wabota buti kwiinda cakuti tukonkezye boobo.
Mukaintu
10Muyandwi wangu mmubotu ulijatide.
Ulalibonya akati kabuleya nobavula kuba zyuulu zili kkumi.
11Busyu bwakwe bulasalala mbuli ngolida iini-ini,
masusu aakwe aligomedwe-gomedwe, alasiya mbii.
12Meso aakwe ali mbuli ciziba cili kumbali aatusensa twamaanzi.
Mbuli nziba zyakasanzigwa mumukupa, zikkede kumbali aatusensa twamaanzi.
13Masaya aakwe mabotu mbuli muunda uuzwide citungulu.
Milomo yakwe ili mbuli maluba-luba aanunkilila kabotu.
14Maanza aakwe alibulungene mbuli misako yangolida,
alimwi nweenwe zyakwe zyangolida zilaatubwe twacituntulwa.
Mubili wakwe mubotu mbuli meja aabazovu aasimbidwe amabwe aacijulu-julu.
15Maulu aakwe ali aanguzu mbuli zicinda zyamabwe,
ziimide angolida iini-ini ulalibonya mbuli cilundu ca Lebanoni amilombe yaco.
16Kwaamba kwakwe nkubotu, kulateeleleka.
Mbwabede oobu muyandwi wangu, mweenzuma, akaka nobakaintu bamu Jelusalemu.
Currently Selected:
Lwiimbo lwa Solomoni 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
