Ciyubunuzyo 19
19
1Lino musule lyazeezi, ndakamvwa cakali kulimvwisya mbuli kuyooma kwabantu banji kujulu, bakali kwaamba kuti, “Alumbwe Leza! Lufutuko abulemu anguzu nzizya Leza wesu! 2Kubeteka kwakwe koonse kuliluleme alimwi nkwakasimpe! Wakazula mukaintu uudumide mwaamu ooyo wakabisya nyika akaambo kabwaamu bwakwe. Leza wamusubula nkaambo wakajaya babelesi ba Leza.” 3Alimwi bakapozomoka bakati, “Alumbwe Leza! Busi bwamunzi ooyu bunoountumuka lyoonse alyoonse!” 4Bapati bali makumi obilo abane azilenge zyone bakavuntama bakomba Leza uukkede acuuno cakwe cabwami. Bakati, “Akube boobo! Alumbwe Leza!”
Pobwe lyabwiinga lya Mwanaa mbelele
5Lino kuzwa kucuuno cabwami, kwakazwa jwi lyakati, “Amulumbaizye Leza wesu, nywebo nobabelesi bakwe, anywebo nobapati abantu buyo nyoonse nomumulemeka!” 6Alimwi ndakamvwa jwi lyakali mbuli kuyooma kwabantu banji alimwi kalili mbuli kuvuuma kwamaanzi manji ambuli mabbalu-bbalu, lyakati, “Alumbwe Leza, nkaambo Mwami Leza wesu Singuzuzyoonse ngo Mwami! 7Atukondwe tulumbe, alimwi tumutembaule nkaambo kabulemu bwakwe! Nkaambo ciindi capobwe lyabwiinga lya Mwanaa mbelele casika, nkabela awalo nabwiinga walibambila kale. 8Nabwiinga ooyu wazumizigwa kusama zisani zyandeketela zituba buu.” (Zisani zyandeketela, eezyo mmilimo mibotu yabasalali.)
9Mpoonya mungelo wakandaambila kuti, “Lemba eeci, balilelekedwe aabo batambidwe kupobwe lyabwiinga lya Mwanaa mbelele.” Alimwi mungelo wakaamba kuti, “Aaya ngamajwi meni-meni aa Leza.”
10Eelyo ndakavuntama munsi lyamaulu aakwe kuti ndimukombe, pele walo wakati kulindime, “Toelede kucita boobu pe! Mebo ndimubelesinyoko, ndiumwi wabasyominyoko, aabo bacitila Jesu bumboni. Komba Leza!”
Nkaambo kucitila Jesu bumboni mbobusinsimi bwini-bwini.
Zya Uutantide bbiza lituba
11Mpawo ndakabona julu lyajaluka, eelyo ndakabona bbiza lituba! Ooyo uutantide ali ndilyo wiitwa kuti Uusyomeka, Wakasimpe nguubeteka akulwana cabululami. 12Meso aakwe ali mbuli mulilo uuvwilila. Kumutwe wakasamide misini minji-minji. Wakalijisi zina lyakalembedwe alinguwe, taakwe naba omwe uuzi zina eeli, ccita lwakwe alikke. 13Wakalisamide jansi lyakanyikidwe mubulowa, zina ndobamwiita litegwa “Jwi lya Leza.” 14Basilumamba boonse bakujulu bakamutobede bakasamide zisani zyandeketela zituba buu, bakatantide amabbiza aatuba. 15Kumulomo wakwe kwakazwa panga likwengedwe lyakuumya masi oonse. Masi aaya uyooalela amusako walubulo, alimwi uyoolyatauka cikandilo cansaansa mubukali bwa Leza Singuzuzyoonse. 16Ajansi lyakwe aacibelo cakwe, kwakalembedwe zina eeli, “Mwami wabami, Mweendelezi wabeendelezi.”
17Mpawo ndakabona mungelo umwi kaimvwi muzuba. Wakapozomoka ajwi pati, kwaambila bayuni boonse bauluka mujulu wakati, “Amuboole mubungane antoomwe akaambo kapobwe pati lya Leza. 18Amuboole mulye, mitumba yabami, yabapati-pati bankondo, mitumba yabasinkondonyina bakali, mitunta yamabbiza, yabantu baatanta, amitumba yabantu boonse, bazike nibaba bazyale balemede abantu buyo.”
19Mpoonya ndakabona munyama uulya abami baansi abasinkondo babo kabalibunga-bunga kuti balwane yooyo uutantide abbiza abasinkondo bakwe. 20Munyama uulya wakajatwa antoomwe amusinsimi mubeji wakali kucita maleele mumeso aakwe. Kwiindila mumaleele aaya ngaakacita wakacenga bantu aabo bakajisi cisimbo camunyama abaabo bakakomba mutuni wamunyama. Aaba bobilo bakafuswa bulanga mubbibi lyamulilo liyaka amabwe aasalufa. 21Bamwi babo bakajaigwa apanga lizwa mumulomo wayooyo uutantide abbiza, eelyo bayuni bakalya bakkuta mitumba yabantu aabo.
Currently Selected:
Ciyubunuzyo 19: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
