Intembauzyo 71
71
1O Mwami Leza, mulinduwe mwenjubide, intausigwi nsoni naaba aasyoonto.
2Mubululami bwako, ndifutule, undivune, kondiswiilila undivune.
3Mwaala wangu wakuyubila ube nduwe, nkwenookonzya kutijila lyoonse,
lailila kuti mvunwe, mukuti nduwe mwaala acikwabilizyo cangu.
4O Leza wangu, kondivuna kuzwa kubabi, undivune kuzwa kunguzu zyababi basilunya.
5Nduwe lulangilo lwangu, O Mwami Leza, Singuzuzyoonse,
kuzwa kubukubusi bwangu nduwe ngwesyoma.
6Njaamide alinduwe kuzwa kukuzyalwa kwangu,
wakandigwisya mwida lyabaama nduwe.
Aboobo ndinookutembaula lyoonse.
7Bantu banji balandikankamana, mayubilo aangu mayumu nduwe.
8Ndakutembaula amulomo wangu, ngambilizya zyabulemu bwako buzuba abuzuba.
9Ndaakucembaala utakandisowi, nguzu zyangu zyaakumana utakandilekelezyi.
10Basinkondoma balandivwiya, balandipanganina aabo balindila kuti bandijaye.
11Balati, “Leza wamulekelezya, mmumutandaanye mumujate, taakwe uunga wamuvuna.”
12Utanditantamuki, O Leza, boola uzoondigwasye, uzoondigwasye
cakufwambaana, O Leza wangu.
13Abalobe bausigwe nsoni aabo banditamikizya, basampuke, bause aabo bayanda kundicisa.
14Lyoonse mebo noolangila kulinduwe, njooindilizya kukutembaula.
15Mulomo wangu uyooamba zyamicito yabululami bwako,
uyooamba zyalufutuko lwako buzuba abuzuba,
nikuba kuti nsikonzyi kuzimvwisya pe.
16Njookanana milimo anguzu zyako zigambya, O Mwami Leza, Singuzuzyoonse,
bululami bwako buyo bulikke mbweyooambilizya.
17Nduwe wakandiiisya kuzwa kubukubusi bwangu, O Leza,
milimo yako iigambya njeciluula asunu.
18Nikuba kuti nkacembaale, utakandilekelezyi, O Leza,
utakandilekelezyi nikuba kuti nkatube mvwi,
kusikila nkaambilizye zyanguzu zyako, zyanguzu zyako kuzyalani liciboola, kuli boonse baciza.
19Busika kujulu bululami bwako, O Leza, wakacita milimo mipati nduwe.
Ani nguni uuli mbuli nduwe, O Leza?
20Nikuba kuti wakandibonya mapenzi manji mabyaabi nduwe,
uyoondibukulusya alimwi, kuzwa kunsi aanyika nduwe ooyoondibusya alimwi.
21Uyoocita kuti nkalemekwe kapati nduwe, nduwe ooyoonduumbulizya.
22Njookutembaula akantimbwa, njookutembaula nkaambo ulasyomeka, O Leza,
njookwiimbila akalumbu, yebo, oosalala wa Isilayeli.
23Njoopozomoka cakutangala amilomo yangu,
njoopozomoka ndaakwiimba nyimbo yakukutembaula,
nduwe ookanununa muuya wangu.
24Mulaka wangu uyooamba zyamilimo yako,
buzuba boonse uyooamba milimo yako iiluleme,
kayi bausigwa nsoni, banyongana aabo balikuyanda kundicisa.
Currently Selected:
Intembauzyo 71: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
