Intembauzyo 69
69
Kumweendelezi wanyimbo. Aimbye bwiimbwa nyimbo ya Mpana. Lwiimbo lwa Devedi.
1Maanzi andisika munsingo, ndivune, O Leza.
2Ndabbila muntimba ndamfu iitakwe maimino, ndanjila mumaanzi malamfu,
maanzi manji andivumba.
3Ndalema kwiita kuyanda lugwasyo, agoyooyo ayuma,
meso ooboka kulangaula Leza wangu.
4Mbanji kwiinda masusu aangu bandisulide kakunyina akaambo,
basinkondoma mbaasinguzu, mbaasinguzu aabo baamba zyakubeja,
bandisungilizya kubbadela zintu nzindatakabba.
5Bufuba-fuba bwangu ulibuzi, O Leza, tuusisidwe kulinduwe mulandu wangu.
6Batausigwi nsoni akaambo kangu aabo bakulangila, O Mwami Leza,
Singuzuzyoonse, aabo bakulangaula batafwi bweeme akaambo kandime,
O Leza wa Isilayeli.
7Kusampaulwa ndakuyumina akaambo kanduwe, nsoni zyandijaya.
8Ndaba mweenzu akati kabanabokwesu, akati kabana babaama ndaba muzwamasi.
9Busungu bwakuyandisya ŋanda yako bwandimana mubili.
Kusampaula kwabaabo bakusampaula kwawida ndime.
10Ciindi nelila balandisampaula,
alyalo ndaliimya kulya balandisampaula mbubonya buyo.
11Mba cisesyo kulimbabo ciindi ndasama masaka mukuusa.
12Ndicaambyo cabaabo bakkala kumulyango mupati wamunzi,
ndilwiimbo lwabakolwi.
13Pele mebo ndakomba kulinduwe, muciindi ncoyanda, ndakomba kulinduwe,
O Mwami Leza, akaambo kaluyando lwako lunji lutazungaani undiingule,
undiingule kwiindila mulufutuko ndopa.
14Ndivune intabbili muntimba, ndivune kuzwa kulibaabo bandisulide,
kuzwa mumaanzi malamfu ndivune.
15Litandivupuli zambangulwe, maanzi malamfu atandibbizyi,
litandivumbi dindi pe.
16Akaambo kabubotu bwaluyando lwako, luyando lwako lutazungaani
ndivune, O Mwami Leza, undicebe mulweengelelo lwako lupati.
17Utalisisi kuzwa kumubelesi wako, ndivuwe kufwambaana nkaambo ndimumapenzi.
18Koswena aafwiifwi undivune, ndinunune kuzwa kuli baabo bandilwana.
19Ulizi mbobandisampaula, ulizi nsoni abweeme bwangu,
basinkondoma boonse ulibabwene.
20Moyo wangu wawizuka, ndagonkelwa akaambo kakusampaulwa,
ndakalikulangila kuti ambweni inga baleetela,
pele taakwe naba omwe wakeetela, ndakalikulangaula basikunduumbulizya, pele taakwe pe.
21Bakabikka ncefu muli zyakulya zyangu, ndifwe nyota bandipa ndulwe.
22Nzyobalya zibabede kakole, zibabede cisubulo adiba.
23Meso aabo aomfoke kuti bataboni limbi, misana yabo igogomane lyoonse.
24Bakalalile kapati, abukali bwako buyoosya ubanyonyoone.
25Minzi yabo ibe matongo, kutabi muntu uukkala mumaanda aabo.
26Nkaambo bapenzya baabo mbosubula, babandika zyabaabo mboocisa.
27Ubayungizizye milandu atala aayeeyo njobajisi, ayeeyo njobajisi kale utabafutuli pe.
28Bazibinganye kuzwa mubbuku lyabuumi, utabalembi abaabo baluleme.
29Mebo ndicisidwe ndaamapenzi, O Leza, lufutuko lwako lundikwabilile.
30Mulwiimbo njootembaula zina lyako Leza, njookulemeka mukulumba.
31Eeci nceciyoobotezya Mwami Leza kwiinda musune, kwiinda poho wameja ansumba.
32Bacete baakubona bayoosekelela, nywebo, nomukomba Leza amuyume-yume.
33Mwami Leza ulabaswiilila babulide, tasampauli baange bakwe pe.
34Julu anyika azimutembaule, alwalo lwizi azyoonse zili mumo.
35Leza uyoofutula Ziyoni, uyooyakulula minzi ya Juda, iyooba yabaabo bayookkala mumo.
36Bana bababelesi bakwe bayooikona, aabo bayandisya zina lyakwe bayookkala mumo.
Currently Selected:
Intembauzyo 69: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
