Intembauzyo 65
65
Kumweendelezi wanyimbo. Lwiimbo lwa Devedi
1Uuelede kutembaulwa mu Ziyoni nduwe, O Leza,
tuyoozuzikizya zikonke zyesu kuli nduwe, kukomba kwesu ulakumvwa.
2Bantu boonse bayoosika kulinduwe akaambo kazinyonyoono zyabo.
3Nikwatuzunda kulubizya kwesu, yebo watulekelela.
4Muntu ngosala akuleta aafwiifwi ulilelekedwe, unookkala muŋanda yako,
muŋanda yako iisalala motukkuta zintu zibotu, zibotu zyamucikombelo cako cilelekedwe.
5Mumilimo yako yabululami iigambya motwiingulila,
O Leza walufutuko lwesu, lulangilo lwabantu bali kumagolelo aanyika yoonse nduwe,
lwabaabo bakkala kumbali aalwizi luli kulaale.
6Malundu akapangwa munguzu zyako, ninguzu zitaambiki nzyojisi.
7Kuvuuma kwalwizi nduwe ookuumuzya, uuumuzya mayuwe aapyopyonganya misyobo.
8Balayoowa aabo bakkede kumagolelo aanyika,
nkaambo kazigambya zyako,
balapozomoka akukondwa nkaambo kamilimo yako,
balapozomoka kuzwa kumagolelo aanyika imwi kuyoosika kuli imwi.
9Uliipa maanzi nyika akwiibamba, uliibotya kapati,
tulizwide maanzi tulonga twa Leza,
nyika mboibamba oobo kuti upe bantu zilyo.
10Tunkolola twayo ulatutilila, uliibombya alunywaanywa-nywaanywa,
ulaleleka zisyango zyayo.
11Ceyo ncopa ncamwaka amwaka, zikwiliba zyako zilazula azilimwa.
12Mumacelelo mutitima camatanga-matanga, zilundu zileebeka kapati.
13Meembelelo azwide mbelele, makkuti asakide maila,
zyoonse eezi zilaimba akupozomoka cakukondwa.
Currently Selected:
Intembauzyo 65: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
