Intembauzyo 135
135
1Amumutembaule Mwami Leza, amutembaule zina lyakwe lisalala, amumutembaule nywebo nobabelesi ba Mwami Leza.
2Amumutembaule nywebo nomukutauka muŋanda ya Mwami Leza,
nywebo nomukutaukila mumbuwa zyaŋanda ya Leza wesu.
3Amumutembaule Mwami Leza nkaambo walo mmubotu,
amwiimbe nyimbo zyakutembaula zina lyakwe nkaambo zilabotezya.
4Mwami Leza wakasala Jakobo kuti abe wakwe, wakasala Isilayeli kuti lube lukono lwakwe luyandika.
5Ndizi kuti Mwami Leza mmupati, Mwami wesu mupati kwiinda baleza boonse.
6Kufumbwa cimubotela kujulu naaba ansi aano,
Mwami Leza ulacicita, ulacicita nimuba mulwizi, mumaanzi malamfu.
7Walo nguuilimuna makumbi kuzwa kumagolelo aanyika,
ulatuma mvula andabo, nguugwisya luuwo kuzwa muziyobwedo zyakwe.
8Nguwakajaya bana bakusaanguna ba Baijipiti, bana bakusaanguna babantu abanyama.
9Wakatumya zitondezyo azigambya akati kabo,
wakazitumya kucisi ca Ijipiti kuti Falo ababelesi bakwe balibonene.
10Nguwakauma bamasi banji, nguwakajaya bami banguzu.
11Bami bali mbuli Sihoni mwami wa Baamoli,
Ogi mwami wa Basyani, antoomwe abami boonse bamu Kenani.
12Nyika yabo wakiipa kuti ibe lukono, ibe lukono lwabantu bakwe Baisilayeli.
13Zina lyako, O Mwami Leza, ndyalyoonse alyoonse,
ulidumine kwamazyalani oonse, O Mwami Leza.
14Aboobo Leza uyookwabilila bantu bakwe, uyooetelela babelesi bakwe.
15Mituni yabamasi nja nsiliva angolida, maanza aabantu ngaakaipanga.
16Ilijisi milomo pele tiikanani, ilijisi meso pele tiiboni.
17Ilijisi matwi pele tiimvwi, ilijisi milomo pele tiiyoyi.
18Aabo baipanga balikonzyenye anjiyo, ncimwi buyo abaabo biisyoma.
19Nywebo noba Isilayeli amutembaule Mwami Leza, amutembaule Mwami Leza nywebo noluzubo lwa Aloni.
20Nywebo noba Levi amutembaule Mwami Leza, amutembaule Mwami Leza nywebo nomumulemeka. Amutembaule Mwami Leza.
21Amutembaule Mwami Leza kuzwa ku Ziyoni,
mumutembaule ooyo uukkede mu Jelusalemu. Amutembaule Mwami Leza.
Currently Selected:
Intembauzyo 135: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
