Intembauzyo 115
115
1Kutabi kulindiswe O Mwami Leza. Kutabi kulindiswe,
yebo olikke nduwe weelede kulemekwa, nkaambo kaluyando lwako lutazungaani akusyomeka kwako.
2Nkaambo nzi bamasi ncobati, “Uli kuli Leza wabo?”
3Ee kayi Leza wesu uli kujulu, nkwacitila kufumbwa eeco cimubotela.
4Mituni yabamasi njansiliva angolida, ipangwa aamaanza aabantu.
5Ilijisi milomo, pele tiikanani, ilijisi meso, pele tiiboni.
6Ilijisi matwi, pele tiimvwi, ilijisi mpemo, pele tiinunkizyi.
7Ilijisi maanza, pele tiiampi, ilijisi maulu, pele tiiendi.
Ilijisi tumeneno, pele tiilikaamuni pe.
8Aabo biipanga balikozyenye anjiyo, ncimwi buyo abaabo biisyoma.
9Amusyome mu Mwami Leza nywebo noba Isilayeli,
nguumugwasya alimwi nentobo yanu.
10Amusyome mu Mwami Leza noluzubo lwa Aloni,
nguumugwasya alimwi nentobo yanu.
11Amumusyome Mwami Leza nywebo nomumuyoowa,
nguumugwasya alimwi nentobo yanu.
12Ulituyeeyede Mwami Leza, ulatuleleka,
nguuleleka Baisilayeli, nguuleleka baluzubo lwa Aloni.
13Mwami Leza ulabaleleka aabo bamuyoowa,
baniini abapati boonse ulabaleleka.
14Mwami Leza amuvuzye, amuvuzye nywebo antoomwe abana banu.
15Mwami Leza amuleleke, amuleleke ooyo wakalenga julu anyika.
16Kujulu, kujulu kwini nkwa Mwami Leza, pele nyika wakiipa bantu.
17Bafu tabatembauli Mwami Leza, tabamutembauli aabo baya kukuliiba.
18Pele ndiswe notumulumbaizya Mwami Leza,
ndiswe notumulumbaizya kwalino akuya mazuba.
Amumutembaule Mwami Leza.
Currently Selected:
Intembauzyo 115: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
