Nehemiya 13

Mbubakaandaana abamasi

1Mubuzuba bwakabalwa bbuku lya Mozesi cakupozomoka bantu kabamvwide, bakasika aalembedwe kuti, Baamoni a Bamowabu tabeelede kuba antoomwe ambungano yabantu ba Leza. 2Cakali boobo nkaambo Baamoni a Bamowabu tiibakapa Baisilayeli cakulya naaba maanzi. Pele bakabbadela Balaamu kuti abasinganye. Pele Leza wesu wakacita kuti kusinganya ooku kutubede cileleko. 3Bantu nibakabalilwa mulawo ooyu bakalyaandaanya abamasi boonse.

Nehemiya mbwaakasandula zintu

4Kazitana eezi, Eliyasyibu mupaizi wakabikkidwe kukulanga twaanda twaziyobwedo kuŋanda ya Leza. Wakali kumvwana kapati a Tobiya. 5Wakazumizya Tobiya kuti akkale muŋanda eeyo yakeelede kuyobwedwa zituuzyo zyamaila, tununkilizyo, zibelesyo zyamuŋanda ya Leza, zituuzyo zyabapaizi, kwakkumi kwamaila, waini amafuta aaoliva aakali kupegwa ku Balevi, baimbi abalindizi baku ŋanda ya Leza. 6Ciindi eeco mebo nsiindakali mu Jelusalemu, mukuti mumwaka wamakumi otatwe aibili wakulela kwa Aatakisesi mu Babuloni ndakaliinkide kuyookanana amuleli ooyu. Nikwakaba kaindi ndakamukumbila kuti 7mpilukile ku Jelusalemu. Nindakasika ndakazooziba zyacibi Eliyasyibu ncaakacita naakapa Tobiya ŋanda mubbuwa lyaŋanda ya Leza. 8Ndakacimwa kapati cakuti ndakasowa tuntu twa Tobiya anze. 9Ndakalailila kuti maanda asalazigwe, nindakamana ndakapilusya zibelesyo zyamuŋanda ya Leza mulingawo kubikkilizya azituuzyo zyamaila atununkilizyo.

10Alimwi ndakajana kuti baimbi bamuŋanda ya Leza a Balevi bamwi bakazwa mu Jelusalemu akupilukila kumyuunda yabo, nkaambo bantu tiibakali kubapa cakulya ceelede. 11Nkaako ndakatapatila balupati-pati akubabuzya kuti, “Nkaambo nzi ŋanda ya Leza nciyalekelezegwa boobu?” Nindakamana ndakapilusya Balevi abaimbi kuŋanda ya Leza kuti bazoobeleke. 12Bajuda boonse bakaleta kwakkumi kwamaila, waini amafuta kuziyobwedo. 13Ndakabikka Syelemiya mupaizi, Zadoki mulembi alimwi a Mulevi umwi Pedaiya kuti babe mbabalanga ziyobwedo. Kumane ndakabikka Hanani mwanaa Zaku mwanaa Mataniya, kuti kabagwasya nkaambo bakali bantu basyomeka kapati. Mbabakali kwaapaula zintu kubabelesinyina.

14Akaka O Leza wangu, kondiyeeya akaambo kaceeci alimwi utazimaanyi zeezyo nzindakacitila ŋanda ya Leza wangu akukomba.

15Mumazuba aayo ndakabona kuti Bajuda bakali kusambalana zikandilo zyawaini mubuzuba bwakulyookezya bwa Sabata. Bamwi bakali kubikka maila, waini nsaansa, ankuyu, azimwi ambongolo zyabo kabaleta ku Jelusalemu. Ndakabacenjezya kuti tabeelede kusambalana mubuzuba oobu pe. 16Bantu bazwa ku Taya bakali kuleta nswi azimwi zintu kuzoosambala ku Jelusalemu kubantu bacisi ca Juda mu Sabata. 17Ndakatapatila basololi ba Bajuda akubaambila kuti, “Amulange cibi ncomucita! Mwacita kuti Sabata itasalali. 18Tee mbombubo mbubakacitile abasikale banu, cakapa kuti Leza atuletele penzi swebo amunzi wesu ooyu? Lino alimwi mwatalika kubusya bukali bwa Leza ku Baisilayeli mukutasalazya Sabata.”

19Ciindi zimvule zyakumangolezya nizyakasika kumilyango ya Jelusalemu kabutanasika buzuba bwa Sabata, ndakalailila kuti zitendele zijalwe kusikila Sabata imane. Ndakabikka bamwi babantu bangu kuyoolindila kuti kutabi mukuli uunjizigwa mubuzuba bwa Sabata. 20Kwaciindi comwe naa zyobilo basambazi bazintu ziindene-indene bakali kulala kunze aa Jelusalemu. 21Pele ndakabacenjezya kuti, “Nkaambo nzi ncomulala munsi aabwaanda. Naa mukacite oobo alimwi njoomwaanga.” Kuzwa buzuba oobo taakwe nibakaboola limbi mu Sabata. 22Ndakalailila Balevi kuti balisalazye akuyoolindila kumilyango kuti basalazye buzuba bwa Sabata.

O Mwami Leza wangu kondiyeeya, alimwi nkaambo kaceeci alimwi undibede aluzyalo nkaambo kaluyando lwako lupati.

23Alimwi ndakabona Bajuda bakakwete bakaintu baku Asyidodi, Amoni a Mowabu. 24Cisela cabana babo cakali kwaamba musyobo waku Asyidodi nuuba musyobo wabantu bamwi, tiibakazi kwaamba Cijuda. 25Ndakabatapatila akubasinganya. Bamwi baalumi ndakabauma ndabajwa masusu. Ndakacita kuti bakonke muzina lya Leza akuti, Tabweelede kukwatanya bana babo nikuba kukwatana lwabo beni. 26Sena tamuzi kuti makwata-kwata aamusyobo ooyu aakapa kuti Solomoni mwami wa Isilayeli abisye? Mumisyobo minji-minji kwakanyina mwami mbuli nguwe. Wakali kuyandwa a Leza wakwe, walo wakamucita kuti abe mwami wa Baisilayeli boonse. Pele nikuba boobo wakabisya akaambo kabakaintu bamasi.

27“Sena alimwi tuteelele kuti anywebo mucicita bubi oobu akuti tamusyomeki kuli Leza wesu mukukwata bamasi?”

28Umwi wabana ba Joiyada mwana wa Elisyibu mupaizi wakakwete mwanaa Sanibalati waku Holoni, ndakamutanda Mujelusalemu.

29O Mwami Leza wangu, bayeeye nkaambo basofwaazya bupaizi, cizuminano cabupaizi, abu Levi.

30Mbombuboobu mbwindakasalazya bantu mukugwisya zyoonse zyabamasi. Ndakalailila bapaizi a Balevi kuti omwe-omwe azibe zyabulizi bwakwe. 31Alimwi ndakalailila kuti nkuni amicelo iisaanguna kubizwa ziletwe muciindi cazyo. Kondiyeeya O Leza wangu kondicitila zibotu.

Currently Selected:

Nehemiya 13: Tonga96

Highlight

Copy

Compare