Mika 7

Zibi zya Baisilayeli

1Maawe ndemucaangu! Ndaba mbuli uufwide nzala uubwezelela micelo ciindi cakuvulula myuunda yamisaansa, taakwe zikama zyansaansa zisyeede kuti ndilye, taakwe nkuyu zisolokede nzyefwide nkosya. 2Baluleme bakamana kujaigwa munyika, taakwe naba omwe uuluzi uuciliwo pe. Bantu boonse balayubilila kuti batile bulowa, umwi aumwi uvwima munyina akanyandi. 3Maboko oonse alicibwene kucita bubi, muleli lyoonse uyanda kupegwa zipego, mubetesi ulatambula masinkamulomo, basinguzu balaambilizya nzyobayanda boonse balalivwiya-vwiya antoomwe. 4Mubotu kwiinda boonse uli mbuli cisonso, uululeme mubi kwiinda lukwakwa lwamamvwa.

Buzuba bwabalindizi bwasika, oobu mbuzuba Leza nayoomusubula. Lino nceciindi cakunyongana kwabo. 5Utasyomi muntu ngomubambene limwi, utabikki moyo wako kumweenziyoko naba ngokumbatana aawe, ucenjele kapati anzyoamba. 6Nkaambo mwana mulombe talemeki wisi, awalo mwana musimbi ubukila banyina, mukamwana ubukila banyinazyala, basinkondonyina muntu mbabaabo bamukwasyi wakwe.

7Pele mebo ndilangila Mwami Leza, ndisyoma Leza Mufutuli wangu, Leza wangu uyoondimvwa.

Mwami Leza mbwaakabafutula

8Mutasekeleli nobasinkondoma! Nokuba kuti twawa tulabuka alimwi. Nokuba kuti tukkede mumudima, Mwami Leza waba ngomumuni wesu. 9Mukuti twakamubisizya, tweelede kusubulwa mubukali bwa Mwami Leza, walo uyootukosweda mulandu akutucitila ciluleme. Uyootuleta mumumuni, tuyoobona bululami bwakwe. 10Basinkondoma bayoolibonena eezi, bayoousigwa bweeme, aabo bakali kutwaambila kuti, “Uli kuli Mwami Leza wanu?” Tuyoobona kooleka kwabo, ono-ono balalyataukwa amaulu mbuli butope mumigwagwa.

11Buzuba bwakunyonyooka buyoosika, buzuba bwakukwakwabula minyinza yanu. 12Mubuzuba oobo bantu bayooboola kuzwa ku Asiliya akuzwa kuminzi yaku Ijipiti, iiyi, mane kuzwa ku Ijipiti kuyoosika ku Yufuletisi, kuzwa kulwizi lumwi kuyoosika kulwizinyina, kuzwa kucilundu cimwi kuyoosika kucilundunyina. 13Nyika iyoosyaala buyo akaambo kabantu bayo, akaambo kamilimo yabo.

Mwami Leza mbwaakababeda aalubomba Baisilayeli

14Embela bantu bako amusako wako O Mwami Leza, butanga bwalukono lwako, bukkede bulikke musokwe, mumacelelo mabotu. Azicele mu Basyani amu Giliyadi mbuli mumazuba aakale-kale.

15Leza ulati, “Mbubonya mbuli mumazuba nimwakazwa mu Ijipiti, ndiyoomutondezya zintu zigambya.” 16Bamasi bayoobona eezi nkabela bayoousa, liyoobaleka kapati. Bayoolijata kumilomo, bayoosinka matwi aabo. 17Bayoobbulungana muvu mbuli nzoka, mbuli zilenge zikalaba ansi. Bayoozwa mumaanda aabo kabazyangama, bayooboola ku Mwami Leza wesu cakuyoowa, eelyo nywebo bayoomuyoowa.

18Ino nguni Leza uuli mbuli nduwe, uulekelela zinyonyoono akujatila nsotoko zyabantu bakwe basyeede bali mbalukono lwakwe? Yebo tonyemi kwalyoonse alyoonse, pele ulabotelwa mukweengelela. 19Alimwi ulatubeda aalubomba, wasowa zinyonyoono zyesu ansi, akuzilyatauka, wabweza milandu yesu yoonse akuyooisowela mumpisi yalwizi. 20Kasimpe uyoosyomeka kuli Jakobo akuyooengelela Abulahamu, mbubonya mbuli mbookakonkezya kuli basikale besu mumazuba aakale-kale.

Currently Selected:

Mika 7: Tonga96

Highlight

Copy

Compare