Jobo 5
5
1Koita lino Jobo, “Mwati nkwali uunga wakwiingula?
Sena kuli mungelo uunga wakugwasya?
2Ncobeni kunyema kujaya mufuba-fuba,
alyalo bbivwe lijaya bantu babuyo.
3Mebo lwangu ndakabona mufuba-fuba walikkalilila,
pele cakufwambaana ndakasinganya mukwasyi wakwe.
4Bana bakwe tabajisi lukwabililo,
balapwaigwa acibetekelo alimwi taakwe uubavuna pe.
5Basinzala balalya butebuzi bwamufuba-fuba,
naaba maila aakomena mumamvwa,
basyaacivulemwangu balombozya lubono lwakwe.
6Mapenzi taazwi mulusuko pe,
naaba makatazyo muvu.
7Pele muntu uzyalilwa makatazyo
mbubonya mbuli nsasi mbozipasauka mujulu.
8Nindali ndime nindayandaula Leza,
Leza alikke buyo, nindapandulula kaambo kangu kuli nguwe.
9Leza uucita zintu zipati zitayandauliki,
zintu zigambya zitabaliki.
10Ulawisya mvula anyika,
alimwi ulatuma maanzi mumyuunda.
11Ulabasumpula babombe abalo
aabo balila ulabanyamuna akubakwabilila.
12Ulatyompya mizeezo yabacenjede,
kutegwa batazwidilili muli ceeco ncobacita.
13Ulabateya basimaanu mubucenjezu bwabo,
ulanyonyoona bucenjezu bwabasilweeno cakufwambaana.
14Balaswaangana amudima muciindi casikati,
akwaampaampa mbuli kuti masiku.
15Pele ulavuna bateteete
kuzwa kuzilwanyo zyabasinkondo ababula kuzwa kuli singuzu.
16Aboobo bacete balijisi lulangilo,
pele babi balaumuna zi.
17Amubone, ulilelekedwe muntu ooyo Leza ngwalulamika,
nkaako utanyansyi kutapata kwa Singuzuzyoonse.
18Nkaambo nguuyasa akwaanga ngwaayasa,
ulauma pele maanza aakwe ngoonya ngaasilika.
19Ulakuvuna lyoonse kuzwa kumakatazyo,
taakwe bubi buyookusikila pe.
20Muciindi canzala uyookuvuna kuzwa kulufu,
muciindi cankondo uyookuvuna kuzwa kunguzu zyabasimapanga.
21Uyoosisigwa kuzwa kuli basikukubejelezya,
nkabela kunyonyooka kwaakuboola tokooyooyoowa pe.
22Tokanyonyooki akufwa nzala,
alimwi tokayoowi banyama baluma pe.
23Nkaambo tokalimi mumabwe,
abalo banyama bamusyokwe tabakakukatazyi.
24Uyooziba kuti munzi wako uli kabotu,
uyoolingula lubono lwako, nkaako taakwe citanooyooliko pe.
25Uyooziba kuti bana bako bayoovula,
lunyungu lwako luyooba mbuli bwizu anyika.
26Uyoofwa kocembeede mbuli musunta wamaila
aaletwa kucuumino muciindi cawo.
27Langa, eezi twakazibona zili kasimpe.
Ziswiilile eezi kuti zintu zyoonse zikweendele kabotu!”
Currently Selected:
Jobo 5: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
