Jobo 14
14
1“Muntu uulya maila ujisi buyo mazuba mace aazwide mapenzi.
2Ulafulula mbuli duba wamana ulanyana-nyana,
uleenda mbuli cimvule kwamana wazimaana.
3Sena yebo ulalanga muntu uuli boobu akumuleta kuti umubeteke?
4Nguni uukonzya kuleta cintu cilondokede, cilondokede kuzwa mucintu cisofweede? Taakwe naba omwe pe.
5Mazuba aamuntu alipimidwe amweelwe wamyezi yakwe iili munguzu zyako,
alimwi wakamubikkila masimpilo aayo ngatakonzyi kusotoka.
6Komufutatila, umuleke buyo,
kuti akalyookezye mbuli similimo mbwalyookezya limana mulimo.
7“Nkaambo masamu alijisi lulangilo,
kuti naa waagonka alasyuuka alimwi, zisyuukila tazikamani.
8Nikuba kuti muyanda wawo wacembaala muvu,
acisiko cawo cayuma muvu,
9wajana mudumu ulasyuuka akuba aamitabi mbuli ntembwani.
10Pele muntu ulakosoka, wafwa, ino uli kuli?
11Mbuli maanzi mbwaamana muziba,
ambuli mulonga mbuuyuminina,
12mbombuboobu muntu awalo mbwalala akutabuka limbi,
nikuba kusikila julu likamane takooyoosinsimuka pe,
nikuba kubusigwa kuzwa kuŋonzi zyakwe.
13Nicali cibotu kuti kondisisa mucuumbwe
mane kunyema kwako kukainde, pele utalubi ciindi cakundiyeeya.
14Kuti naa muntu wafwa, sena uyoopona alimwi?
Mumazuba oonse aamulimo wangu noolindilila mane kusikila nkaangununwe.
15Waakundiita, njooingula, uyoondiyandisisya ndemulengwa wako.
16Ciindi eeco uyoolanga bweende bwangu boonse,
pele tokooyoolangaula mulandu wangu pe.
17Kulubizya kwangu uyookujalilila alimwi, uyoozimaanya zinyonyoono zyangu.
18Tee aalo malundu alakolomoka,
awalo mundomba ulagwisigwa abusena bwawo.
19Mabwe alaselemuka amaanzi, atwalo tulonga tulakukula ivu lyanyika.
Mbombuboobu ayebo mbonyonyoona bulangizi bwamuntu.
20Ulamuzunda ulamuzunda cakuti uzundilwa limwi,
ulasandula busyu bwakwe, wamana wamutanda.
21Bana bakwe balombe balajana bulemu,
pele walo inga teezi, balafwiinsigwa pele walo taboni.
22Umvwa buyo kucisa kwamubili wakwe,
aboobo ulalilila mwini.”
Currently Selected:
Jobo 14: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
