Jelemiya 1
1
1Ngaaya majwi aa Jelemiya mwanaa Hilikiya umwi wabapaizi baku Anatoti mucisi ca Benjamini. 2Majwi aa Mwami Leza akamusikila mumwaka wakkumi aitatu wakulela kwa Josiya mwana wa Amoni mwami wacisi ca Juda, 3kuyoosika mubwami bwa Jehoiyakimu mwanaa Josiya mwami wacisi ca Juda mane kuyoosika mumwezi wasanu wamwaka wakkumi aumwi wa Zedekiya mwanaa Josiya mwami wa Juda, ciindi bantu bamu Jelusalemu nibakali mubwaange.
Kwiitwa kwa Jelemiya
4Ngaaya majwi aa Mwami Leza ngaakaamba kulindime wakati, 5“Nketana kubumba mwida lyabanyoko ndakali kuzi, kotanazyalwa ndakakuzandula, ndakakusala kuti ube musinsimi kuli bamasi.”
6Lino mebo ndakaamba kuti, “O Mwami Leza, mebo nsikonzyi kukanana pe, ndicili musyoonto.”
7Pele Mwami Leza wakati kulindime, “Utaambi kuti, ‘Ndicili musyoonto! Weelede kuunka kubantu boonse ooko nkundakutuma ukabaambile zyoonse eezyo nzindakulailila.’ 8Utakabayoowi, nkaambo ndili aanduwe ndiyookuvuna,” mbwaamba Mwami Leza.
9Mpoonya Mwami Leza wakatandabika janza lyakwe wakaguma mulomo wangu akundaambila kuti, “Lino ndabikka majwi aangu mumulomo wako. 10Bona sunu ndakubikka kuti weendelezye bamasi amalelo, kuti uzyule akumwaya, kuti unyonyoone akusowa, kuyaka akuzikkila amajwi aako.”
Zilengaano zyobilo
11Majwi aa Mwami Leza akandisikila akati, “Ncinzi ncobwene
Jelemiya? Ndakaingula kuti, ‘Ndibwene mutabi wamusamu waalumondi.’”
12Mpawo Mwami Leza wakati kulindime, “Wabona kabotu,
nkaambo ndilangilide kuti majwi aangu azuzikizigwe.”
13Majwi aa Mwami Leza akandisikila alimwi akati,
“Ncinzi ncobwene? Ndakaingula kuti, ‘Ndibwene cibiya cibila, cisendekelede kunyika.’”
14Mwami Leza wakati, “Kuzwa kunyika kuyooboola mapenzi aayo azoosikila muntu woonse uuli munyika. 15Ndiyanda kwiita bantu bamalelo aakunyika, mbwaamba Mwami Leza. Bamami babo bayooboola nkabela bazookkazika zyuuno zyabo zyabwami kumanjililo aamilyango mipati yamunzi wa Jelusalemu, bayoozinguluka bwaanda boonse aminzi yoonse yacisi ca Juda. 16Lino njoosinsa bantu bangu akaambo kacinyonyoono cabo cakundisiya akuyootentela baleza babuyo tununkilizyo, akukomba eezyo nzibakapanga amaanza aabo beni. 17Lino libambile! Nyamuka ubaambile kufumbwa nceti kwaambile, utabayoowi, nkaambo mebo inga ndakonga nduwe kabalangilide. 18Sunu ndakubikka kuti ube mbuli munzi uukwabilidwe, cicinda calubulo, ube mbuli bwaanda bwamukuba bukwabilila nyika yoonse kuzwa kubami bacisi ca Juda abalupati-pati baco, bapaizi baco abantu boonse bamucisi. 19Bayookulwana pele tabakooyookuzunda, nkaambo mebo ndili aanduwe, ndiyookufutula.” Mbwaamba Mwami Leza.
Currently Selected:
Jelemiya 1: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
