Babetesi 9

Abimeleki

1Lino Abimeleki mwanaa Gidiyoni wakainka ku Syekemu ooko kwakali kukkala bamukowa wakwe abanyina. Wakabaambila kuti, 2bababuzye baku Syekemu kuti, “Muyeeya buti? Sena muyanda kulelwa abana ba Gidiyoni boonse bali makumi aali ciloba naa kulelwa amuntu omwe buyo? Tee mulizi kuti mebo ndiwanu?” 3Lino banzubo zyabanyina bakaambaula makani aaya kubantu baku Syekemu. Mpawo bakayanda kutobela Abimeleki nkaambo wakali wabo. 4Bakamupa mali aansiliva aali makumi aali ciloba ngobakagwisya kukaanda ka Baalibeliti. Mali aaya wakaabbadela bafumpi bamwi kuti bamutobele. 5Wakaya kuŋanda yawisi ku Ofula. Naakaakusika wakajaya bana bokwabo boonse bakali makumi aali ciloba abbwe lyomwe. Pele Jotamu wakali keela, wakayuba. 6Eelyo baku Syekemu aku Betimilo bakabungana antoomwe akuunka kumusamu uulya munsi aamutuni ku Syekemu, ooko Abimeleki bakamubikka bwami.

7Lino Jotamu naakamvwa cakacitika, wakaakwiima atala aacilundu ca Gelizimu akoompolola kati, “Amuteelele nywebo nobantu baku Syekemu kuti Leza amuswiilile anywebo. 8‘Kaindi kaindi zisamu zyakabungana kuti zisale mwami wazyo.’ Zyakati ku muoliva, ‘Koba mwami wesu.’” 9Walo muoliva wakaingula kuti, “Ma inga ndaleka buti kugwisya mafuta aakulemeka baleza abantu kuti ndilele zisamu?” 10Lino zisamu zyakaambila mukuyu kuti. “Koba nduwe mwami wesu.” 11Pele walo mukuya wakaingula kuti, “Ma inga ndaleka buti kuzyala micelo mibotu iinona kuti ndilele zisamu?” 12Kuzwa waawo zisamu zyakati kumusaansa, “Koba nduwe mwami wesu.” 13Pele walo musaansa wakaingula kuti, “Ma, inga ndaleka buti kuzyala nsaansa zipa waini uubotezya baleza abantu kuti ndilele zisamu?” 14Kumane zisamu zyakati kumutuluzyamalumba, “Ambweni ube nduwe mwami wesu.” 15Walo mutuluzyamalumba wakati, “Kuti kamuyandisya ncobeni kuti mbe mwami wanu, amuboole muyuse mucimvule cangu. Kuti pe, kulazwa mulilo mumitabi yangu akuumpa milombe yaku Lebanoni!”

16Jotamu wakaindilizya akuti, “Ngangayaayo. Sena mwakacita ciluleme cakusyomeka nimwakabikka Abimeleki kuba mwami wanu? Sena wakacitila cibotu Gidiyoni amukwasyi wakwe mbuli bwakeelede milimo yakwe? 17Amuyeeye kuti nguwakamulwanina. Wakabikka buumi bwakwe muntenda yalufu mukuvuna ndinywe ku Bamidiyani. 18Pele sunu mwafutatila mukwasyi wakwe. Mwajaya bana bakwe bali makumi aali ciloba abbwe lyomwe. Mwapa bwami kuli Abimeleki mwanaa mukaintu muzike kuti abe mwami waku Syekemu nkaambo ngusiluzubonyoko. 19Aboobo, kuti kamuyeeya kuti ncimwacitila Gidiyoni amukwasyi wakwe sunu ncibotu, cililuleme, amubotelwe a Abimeleki awalo abotelwe andinywe. 20Pele kuti pe, mulilo uvutuke kuzwa kuli Abimeleki akuumpa Basyekemu boonse abaku Betimilo. Nikuba kuti kuvutuke mulilo kuzwa ku Syekemu a Betimilo utuumpe Abimeleki.” 21Mpoonya Jotamu wakatija, waakukkala ku Biya nkaambo wakayoowa mupati wakwe Abimeleki.

22Lino Abimeleki wakalela mu Isilayeli kwamyaka yotatwe. 23Kumane Leza wakazwanganya Abimeleki abaku Syekemu, eelyo bakamubukila. 24Leza wakacita oobo kuti asubule Abimeleki akaambo kakujaya bana ba Gidiyoni bakali makumi aali ciloba a Basyekemu bakamugwasya. 25Basyekemu bakabikka bamwi bakali kukkalilila Abimeleki azilundu. Aaba bakali kubbida kufumbwa wainda. Eelyo Abimeleki wakaambilwa zya zeezi.

26Lino Gaali mwana wa Ebedi wakasika ku Syekemu abana bokwabo, eelyo baku Syekemu bakamusyoma. 27Bakali kuunka mumyuunda kabacela nsaansa akukumba waini. Bakacita pobwe, baya kukaanda ka leza wabo. Ooko bakali kulya akunywa kabaseka Abimeleki calweeno. 28Gaali wakati, “Ino Abimeleki nguni ngotutobela, mbuli ndiswe notuli mu Syekemu? Tee mwanaa Gidiyoni buyo, Zebulu ngumutobela, Ino swebo tweelede kumutobelela nzi? Amutobele sikale wanu Hamo, mupati waciinga canu. 29Nkeli ndime eensololela bantu aaba nikwali kunga ndakamutanda kaindi Abimeleki! Nindakamwaambila kuti, ‘Nkoo bunganya mpi yako mpati uboole, tulwane!’”

30Ciindi Zebuluni muleli wamunzi ooyo naakamvwa zyakaamba Gaali wakanyema. 31Wakatumya nkombe kuli Abimeleki ku Aluma yakumucenjezya kuti, “Gaali mwana wa Ebedi abanabokwabo nkobali ku Syekemu, bapyopyonganya bantu kuti bakubukile.” 32Aboobo yebo abantu bako mweelede kweenda masiku kamuyubila mumyuunda. 33Ufume juunza aapolela zuba muzoozinguluke munzi akuulwana. Ciindi Gaali abantu bakwe baakuti bazwe mukabapwayaule mbomukonzya.

34Nkaako Abimeleki abantu boonse mbaakali aabo bakeenda masiku akulizandaula mutubunga tone anze aamunzi wa Syekemu. 35Gaali wakaza kumulyango wamunzi. Abimeleki wakayubunuka mpaakalisiside abantu bakwe. 36Gaali naakababona wakaambila Zebulu kuti, “Langa! Mbabaya bantu balaselemuka kuzwa azilundu.” Zebulu wakati, “Eziya nzimvule buyo zyamalundu, tabali bantu pe.” 37Gaali wakaindulula alimwi kati, “Langa ii! Mbaabaya bantu balaselemuka kuzwa azilundu. Bamwi bazwida kusamu lya musondi.” 38Mpoonya Zebulu wakati, “Kocaamba we mbocita lyoonse! Tee nduwe wakali kutwaambila kuti tumutobelela nzi Abimeleki. Mbaaba mbookali kunyansya, balwane we, tukubone!”

39Mpawo Gaali wakasolweda baku Syekemu kuti balwane Abimeleki. 40Abimeleki wakalulama Gaali, Gaali abone boobo wakatija. Bantu banji ba Gaali bakacisigwa, kubikkilizya a bakali amulyango mupati wa munzi. 41Abimeleki wakajokela ku Aluma, Zebulu wakatanda Gaali abana bokwabo boonse, wakabakasya kukkala mumunzi wa Syekemu.

42Nibwakaca bantu baku Syekemu bakapangana kuti baye mumyuunda. Amvwe boobo, Abimeleki wakaza, 43wakazandula bantu bakwe mutubunga totatwe mumyuunda, wakatalika kulwana bali mumyuunda. 44Abimeleki ampi imwi bakaakukkalilila amulyango mupati wa munzi. Impi zimwi zyobilo zyakali kujaya baabo bakali mumyuunda. 45Buzuba oobo lyakamubbilila Abimeleki kalwana bantu bamumunzi ooyo. Wakazunda akubajaya bantu boonse wakamwaya maanda oonse. Amane wakasansaila munyo alinguwo.

46Ciindi bantu baku ŋanda ndamfu yaku Syekemu nibakamvwa nzyaakacitika bakainka kucikwabililo ca kaanda ka Baalibeliti baakuyubila nkuko. 47Nkabela Abimeleki wakaambilwa kuti bakalibungene ooko. 48Wakatanta mulundu wa Zalumune abantu bakwe wagonka lukuni, akulubikka aciwezo. Wakaambila bantu bakwe kuti bafwambaane kucita mbubonya. 49Bakacita mbubonya, bakamutobela Abimeleki, bakalundika nkuni bakunka mulilo. Boonse baku Syekemu bakali mumo bakafwa, kubikkilizya abakaintu bakali cuulu comwe.

50Kuzwa waawo Abimeleki wakainka ku Tebezi wakuuzinguluka munzi ooyo alimwi akuuzunda. 51Kwakali ŋanda ndamfu yakali njumu mumunzi ooyo, baalumi abakaintu boonse bakatijila mumo. Bakalipingila mukati akuyookkalila kuciluli. 52Abimeleki naakasika wakainka kumulyango waŋanda eeyi mpoonya wakadomeka mulilo. 53Pele mukaintu umwi wakalosya nkando amutwe wa Abimeleki akumwaandula. 54Mpoonya aawo Abimeleki wakaita mulombe uubweza zibelesyo zyakwe akumwaambila kuti, “Gwisya panga lyako undijaye, mukuti inga balaba nobati wakajaigwa aamukaintu.” Mpoonya mulombe ooyo wakamuyasa, wafwa. 55Ciindi Baisilayeli nibakabona kuti wafwa Abimeleki, boonse bakajokela kuminzi yabo.

56Mbombuboobu Leza mbwaakabweedezya bubi bwa Abimeleki mbwaakacita kuli wisi naakajaya bana bokwabo bali makumi aali ciloba. 57Alimwi Leza wakabweedezya bubi bwabantu baku Syekemu mbubonya mbuli Jotamu mwanaa Gidiyoni mbwaakaambide ciindi naakabasinganya.

Currently Selected:

Babetesi 9: Tonga96

Highlight

Compare

Copy