Izaya 59

Musinsimi mbwaakasinganya zinyonyoono zyabantu

1Kasimpe janza lya Mwami Leza talili fwiifwi, cakuti talikonzyi kufutula pe, nikuba kutwi kwakwe kuti takonzyi kumvwa. 2Pele zibi zyanu nzizyakamwaandaanya kuzwa kuli Leza wanu, zinyonyoono zyanu nzizyakamucita kuti Leza alisise kuzwa kulindinywe kutegwa atamumvwi pe. 3Nkaambo maanza aanu abijide bulowa, minwe yanu ijisi milandu. Milomo yanu yaamba zyakubeja, milaka yanu igwisya zibi zyalo. 4Taakwe uubeteka mubululami, taakwe uubeteka mulusinizyo. Basyoma buyo zyakukazyanya akwaamba zyakubeja. Bamita mapenzi akuzyala bubi. 5Bakonkona mayi aabacipile, basuma luubilili. Kufumbwa uulya mayi aabo ulafwa, ji lyomwe lyabbotoka, kuzwa cipile. 6Luubilili lwabo talukonzyi kubambya zyakusama, tabakonzyi kusama zeezyo nzebalisumina. Milimo yabo mmilimo mibi, lyoonse mbabaleta manyongwe. 7Maulu aabo azuzaanina muzinyonyoono, balafwambaana kutila bulowa bwabatakwe milandu. Miyeeyo yabo mmibi, nzila zyabo nkunyonyoona akusinya. 8Nzila yaluumuno tabiizi, munzila zyabo kunyina bululami. Bakazisandula kuba migwagwa iipilingene, taakwe weendela mulinzizyo uuzi luumuno pe.

Bantu mbubakalyaamba zinyonyoono zyabo

9Lino bantu bakati, “Ono twabona ncokutakwe lubeta luluzi, ancokutakwe bululami. Twalangaula mumuni, pele koonse-koonse mudima walo, twalangaula kumweka ndendilyo notweendela mumusinze. 10Tulaampaampa bwaanda mbuli boofu, Tulaampaampa mbuli bantu batakwe meso. Acilungu-lungu tulalifumpula mbuli kuti nkuulubundu-bundu. Akati kabasintanze tuli mbuli bafwide kale. 11Toonse tulavuluma mbuli munyama wabutambo, tulalila cakupululuzya mbuli nziba. Tulangaula bululami. Pele tatubujani, tulangaula kufutulwa pele kuli kulaale.

12“Nkaambo kakuti milandu yesu minji kulinduwe O Leza, azyalo zibi zyesu zilatuzula. Milandu yesu ilituyeeme lyoonse, tulizi zibi zyesu. 13Zinyonyoono zyesu nkuzanga, zyakudyaminina akubukila, twaamba zyakubeja zili mumyoyo yesu. 14Aboobo twabona kuti buluzi bwatutantamuka, bululami buli kulaale. Taakwe bwini buboneka mubbuwa, kusyomeka kwasinkilwa muminzi. 15Taacikwe kucita zyabwini woonse uukasya bubi ulalyeetelezya.” Mwami Leza naakalanga wakabijilwa kubona kuti kunyina ziluleme.

Mwami Leza uyanda kufula bantu bakwe

16Wakabona kuti kunyina muntu naba omwe wakagambwa kubona kuti kwakanyina muntu naba omwe, uukonzya kubaiminina. Aboobo wakayeeya buyo kuti abafutule ajanza lyakwe, kwiindila mubululami bwakwe wakacita oobo. 17Wakasama bululami mbuli cikwabilizyo caacamba, akusama ngowani yalufutuko kumutwe. Wakasama cisani kakanzide kapati kuti acite zintu kuti zyeende kabotu, akusubula bantu aabo bakali kupenzya bamwi. 18Kweendelana azeezyo nzibakacita, awalo uyoobabweedezezya mubukali basinkondonyina. Uyoobapilusizya aabo bamulwana. Bantu aabo bakulaale uyoobabweedezezya zyeelede. 19Kuzwa kumbo bantu bayoolemeka zina lya Mwami Leza, aabo bali kuzwida zuba bayooyoowa bulemu bwakwe. Nkaambo uyooboola mbuli mulonga uufwasauka, uutonkwa aguwo lya Mwami Leza. 20“Munununi uyooboola ku Ziyoni, kuli baabo baluzubo lwa Jakobo beempa kuzinyonyoono zyabo,” mbwaamba Mwami Leza.

21Mboobu mbwaamba Mwami Leza ulati, “Lino mebo nceeci cizuminano cangu ncetipangane ambabo. Muuya wangu uuli mulinduwe, majwi aangu ngindakabikka mumulomo wako tokaalubi pe, abana bako tabakaalubi, lunyungu lwabo talukaalubi kuzwa sunu mane kukabe kutamani,” mbwaamba Mwami Leza.

Currently Selected:

Izaya 59: Tonga96

Highlight

Copy