Izaya 43
43
Leza mbwaakasyomezya kufutula bantu bakwe
1Pele lino mboobu mbwaamba Mwami Leza,
ooyo wakakulenga O Jakobo,
ooyo wakakubumba O Isilayeli.
“Utayoowi, nkaambo ndime ndakunununa. Ndakakwiita azina lyangu, uli wangu.
2Waakwiinda mumaanzi, ndinooli aayebo,
alimwi waakuzubuka milonga tiikakukwempuli.
Waakwiinda mumulilo, tokooyoopya pe.
Kuvwilima kwamulilo takukakuulubi.
3Ndime Mwami Leza wako Uusalala wa Isilayeli, Mufutuli wako.
Ndaaba Ijipiti kuti ibe cinunuzyo cako.
Ndaaba Kusyi a Seba mubusena bwako.
4“Ndapa misyobo yoonse kuti ikabe cinunuzyo cabuumi bwako,
nkaambo uleebeka kulindime, ndakuyanda alimwi ndakulemeka.
5Utayoowi, ndili aayebo!
Njooleta lunyungu lwako kuzwa kujwe akumubunganya kuzwa kumbo.
6Njooambila bakunyika kuti amubaleke bainke,
bakumusanza kuti mutabakasyi.
Bana bangu balombe bali mumasi aali kulaale,
abana basimbi bali kumagolelo aanyika baboole.
7Mmbantu bangu, ndakabalengela kuti kabanditangazya.”
Baisilayeli mbabakamboni ba Mwami Leza
8Solweda baabo bali aameso,
kabali mboofu, abaabo bali aamatwi kabali tabamvwi.
9Misyobo yoonse iiyoboloke ibungane.
Nguni uukonzya kutulungulwida makani aaya?
Balete bakamboni babo kuti basinizye.
Kutegwa bamwi babo baswiilile bazibe zyamasimpe.
10Muli bakamboni bangu, mbwaamba Mwami Leza.
“Bantu bangu mbindakasala kutegwa muzibe akusyoma,
kuti taakwe Leza uumbi kunze lyandime.
11“Ndime Mwami Leza endikke,
kunze lyangu taakwe uumbi uukonzya kumufutula.
12Ndime ndakamuyubunwida akumunununa tali leza wabamasi.
Ndinywe bakamboni bangu, mbwaamba Mwami Leza, Ndime Leza wanu.
13Kuzwa kaindi-kaindi, ndime eeliwo, taakwe uukonzya kumuvuna pe,
kwiina uukonzya kusandula nzyecita.”
Mbubakazwa ku Babuloni
14Mboobu mbwaamba Mwami Leza,
Munununi wanu, Uusalala wa Isilayeli.
Nkaambo kandinywe ndatumina ku Babuloni.
Kusekelela kwa Babuloni kuyoosanduka kuba kulila.
15Ndendime Mwami Uusalala, Leza wakalenga Isilayeli.
16Mboobu mbwaamba Mwami Leza,
wakabamba nzila mulwizi, kazila mumaanzi aanguzu,
17wakanyikizya nkalaki,
mabbiza ampi yabasilumamba,
balala boonse tabakooyoobuka limbi pe,
bayoomaninina mbuli bumana ntambo yalambe.
18Amuzilube zyakaindi mutasyomi zyakale-kale.
19Amubone ndacita cintu cipya, sena tamucibwene?
Ndamupa mugwagwa munkanda akumupa tusensa twamaanzi oomo.
20Banyama bamusokwe bayoondilemeka. Boonse bamwaaba abatumba,
nkaambo ndiyoobapa maanzi munkanda atulonga mumabuwa,
kuti bantu bangu mbindakasala bajane maanzi.
21Bantu mbindakalenga banditembaule.
22Nikuba boobo tookandiita O Jakobo,
tookalikatazya O Isilayeli.
23Tookandiletela mbelele zyakupaizya,
nikuba kundilemeka azituuzyo zyako.
Nsina kukulemezya zituuzyo zyabusu,
nikuba kukukatazya mukulomba tununkilizyo.
24Tookanduulila tununkilizyo twakalamasi amali aako,
nikuba mafuta mabotu azipaizyo zyako.
Pele wandiminya azibi zyako,
tookalikatazya amilandu yako.
25Ndime ooyo uumanya milandu yako,
azibi zyako nsikooyooziyeeya alimwi.
26Undiyeezye, tubambe makani aaya antoomwe,
waambe kaambo kako kutondezya kuti uliluleme.
27Sikale wako wakabisya,
awalo mwaambilizi wakandizangila.
28Bami banu bakasofwaazya busena bwangu busalala.
Ncenciceeco ncindakazumizya kuti ciinga ca Jakobo cinyonyoonwe,
ndakalekelela kuti bantu bangu basampaulwe.
Currently Selected:
Izaya 43: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
