Izaya 24

Mwami Leza uyoosubula nyika

1Amubone, Mwami Leza uyoonyonyoona nyika, uyooitataula, uyooimwayaula, akumwaisya bantu bakkala mulinjiyo. 2Ciyoobasikila boonse ncimwi, ciyoocitika kumupaizi akubantu mbubonya, kuli simalelo akumuzike, kuli mukasimalelo akumusimbi mubelesi, kuli uuuzya akuli sikuula, kuli sikukweleta akuli sikukweletesya, kuli simpindu akuli sicikoloto. 3Nyika iyoonyonyoonenwa limwi, akusaalilwa limwi. Mwami Leza nguwaamba majwi aaya. 4Insi yayuma yaangana, nyika yoonse iluuside yaangana bulemu bwanyika bwapusama. 5Nyika yasofwaazigwa abantu bayo tabaswiilili milawo basotoka mbeta akutyola cizuminano citamani. 6Nkaako nyika yamana akaambo kakusinganyizigwa, bantu bamumo bapenga akaambo kamulandu wabo. Bantu bakkala munyika bamana, mbace buyo basyeede. 7Misaansa yayuma nkaako takucikwe waini, boonse bayandisya kulikkomanisya ono balasyolooka. 8Kulila kwansakalala takucimvwigwi, kuyoba kwakusekelela kwamana, kulila kwakalumbu kwamana. 9Nyimbo nzyobaimba nobanywa waini zyamana, bukoko bwabapapila. 10Munzi walupyopyongano waba tongo, milyango yamaanda ilipingidwe. 11Mumigwagwa boompolweda waini. Lutangalo lwamana kuyobeka koonse kwazimaana ansi. 12Munzi waba tongo, milyango yawo yapwaigwa. 13Eeci nceciyoocitika anyika amumasi oonse aanyika. Ciyooba mbuli ciindi muoliva nuutikaanyizigwa naa mbuli buvululwa nsaansa bantu nibamana kale kutebula. 14Balapozomoka, balaimbisya cakukondwa kuzwa kumbo batembaula bulemu bwa Mwami Leza. 15Nkaako nywebo nobakujwe amulemeke Mwami Leza, Leza wa Isilayeli. Amumulemeke nywebo nomuli munsumbu zyalwizi. 16Kuzwa kumagolelo aanyika tumvwide nyimbo yakuti, “Alemekwe ooyo Uululeme.” Pele mebo ndakati, “Ndamana, ndamana, maawe kulindime! Silweeno ulaamba, mulweeno silweeno ulaamba!” 17Ziyoosya, mulindi akakole zilamulindilila nywebo nobantu bamunyika. 18Kufumbwa ooyo uutikatije ziyoosya, uyoowida mumulindi, kufumbwa uutikazwe mumulindi, uyoowida mukakole. Mpulungwido zyakujulu zilijulidwe, ntalisyo zyanyika zilazungaana. 19Nyika yaandauka, nyika yapanduka, nyika yazungaanyizigwa. 20Nyika izeeleka mbuli mukolwi, itenkaana mbuli kaanda libbubbula guwo, yalemenwa milandu yabuzangi bwabo nkabela yawa, tiikaimi limbi pe. 21Mubuzuba oobo Mwami Leza uyoosubula basinguzu bakujulu mujulu abami ansi kunsi. 22Bayoosolwedelwa antoomwe, mbuli baange bali mumulindi, bayoobikkwa muntolongo bayoosubulwa kwaakwiinda mazuba manji. 23Mwezi uyoonyonganyizigwa, zuba liyoousigwa nsoni, nkaambo Mwami Leza Singuzuzyoonse nguuyoolela acilundu ca Ziyoni mu Jelusalemu. Uyoolela cabulemu kumbele lyabapati bawo.

Currently Selected:

Izaya 24: Tonga96

Highlight

Copy