Hosiya 1

1Ciindi cabwami bwa Uziya, Jotamu, Ahazi, abwa Hezekiya bami baku Juda, alimwi ciindi Jeloboamu, mwanaa Jehowasyi naakali mwami waku Isilayeli, Mwami Leza wakali kupa mulumbe kuli Hosiya mwanaa Beeli.

Zya mukaintu wa Hosiya abana bakwe

2Ciindi Mwami Leza naakasaanguna kwaambaula kwiindila muli Hosiya, wakamwaambila kuti, “Koya ukakwate mukaintu mwaamu. Bantu bamucisi cino tabasyomeki kulindime pe, nkaambo bakomba baleza bambi. Ukazyale bana bayooba mbuli nguwe.” 3Aboobo Hosiya wakakwata mukaintu uutegwa Goma, mwanaa Dibulaimu. Mukaintu ooyo wakamita, akuzyala mwana mulombe. 4Lino Mwami Leza wakati, “Muulike kuti Jezulili, nkaambo takakooba kaindi nketanasubula mukwasyi wa Jehu akaambo kabantu mbaakajaya ku Jezulili. Mbombuboobo mbweyoomanizya bulelo bwa Isilayeli. 5Alimwi kuciindi eeco ndiyoomwaya nguzu zyabasilumamba ba Isilayeli kukkuti lya Jezulili.”

6Munsi lyakooko Goma wakamita alimwi akuzyala mwana musimbi. Lino Mwami Leza wakaambila Hosiya kuti, “Umuulike kuti ‘Uutabedwi aaluse,’ nkaambo taakwe nenjoobabeda aaluse nikuba kubalekelela Baisilayeli. 7Pele bantu ba Juda ndiyoobabeda aaluse. Njoobafutula mebo lwangu ndemwini, ndiyoobafutula anguzu zyangu. Kakunyina kulwana nkondo apanga, naa buta, naa mabbiza, nibaba basimabbiza.”

8Ciindi Goma naakalesya “Uutabedwi aaluse,” wakamita alimwi akuzyala uumbi mwana mulombe. 9Leza wakaambila Hosiya kuti, “Umuulike kuti, ‘Tabali bantu bangu,’ nkaambo inywe no Baisilayeli tamucili bantu bangu pe, nkabela ambebo nsicili Leza wanu.”

Kulekelelwa kwa Baisilayeli

10Lino Baisilayeli bayoovula mbuli musenga, ooyo uutakonzyi kupimwa nikuba kubalwa. Lino Leza ubaamba kuti, “Tamuli bantu bangu,” pele ciindi ciboola bayooitwa kuti, “Bantu ba Leza Uupona!” 11Aboobo Baisilayeli a Bajuda bayookkala antoomwe alimwi. Bayoolisalila musololi omwe nkabela bayoosumpuka mucisi cabo. Masimpe, buzuba bwa Jezulili buyooba buzuba bupati loko.

Currently Selected:

Hosiya 1: Tonga96

Highlight

Copy

Compare