Mukambausi 8

1Nguni uuli mbuli musongo? Nguni uuzi bupanduluzi bwazintu? Busongo bulatangazya busyu bwamuntu, bulasandulula ciwa cakwe.

Koswiilila Mwami

2Koswiilila kulailila kwamwami, nkaambo wakakonkezya kumbele lya Leza. 3Utafwambaani kunyamuka kusiya mwami. Utakakatili mukuyanda kucita cibi, nkaambo mwami ulakonzya kucita kufumbwa ncayanda. 4Lino mbokunga majwi aamwami alaanguzu, nguni uukonzya kumubuzya kuti, “Ino ucita nzi?” 5Kufumbwa ooyo uuswiilila malailile aakwe takacisigwi. Moyo wabusongo ulizi ciindi ceelede ambwakonzya kucita. 6Kayi makani oonse alijisi ciindi ceelede ambwaaelede kucitwa, nikuba kuti muntu ulaamapenzi aali buti. 7Lino mbokunga kunyina muntu uuzi zyakumazuba aaboola, nguni uukonzya kumwaambila eeco ciyoomusikila? 8Taakwe muntu uujisi nguzu zyakwiimika luuwo mbubonya oobo taakwe

muntu uujisi nguzu mubuzuba bwalufu lwakwe. Mbuli mbwaatakwe uulekwa mubuzuba bwankondo, mbubonya oobo bacita bubi tabukabaleki pe.

Bubi a Bululami

9Coonse eeci ndakacibona, aboobo ndakatelaikisya zintu zyoonse zicitwa ansi aano. Kuli ziindi muntu neendelezya bamwi, kwamana nguupenga. 10Eelyo ndakabona basizibi kabazikkwa, aabo bakali kunjila akuzwa mubusena busalala, kabatembaulwa mumunzi mubakali kucita zeezi. Acalo eeci ncabuyo.

11Kuti milandu tiiyafwambaana kubetekwa, bantu banji batalika kuyeeya kucita zintu zibi. 12Nikuba kuti sizibi wabisya ziindi zili mwaanda akoongola ndizi kuti bantu bayoowa Leza zintu ziyoobeendela kabotu. Nkaambo balamulemeka. 13Nikuba boobo akaambo kakuti basizibi tabalemeki Leza, zintu tazikabeendeli kabotu pe, mazuba aabo taakayungizigwi mbuli bulampuluka cimvule.

14Nkocili acimwi cintu cabuyo eeco cicitika ansi aano. Kuli bantu baluleme bacitwa bweelede basizibi, alimwi kuli basizibi bacitwa bweelede baluleme. Ndati acalo ncabuyo. 15Nkaako ndabotelwa akulikkomanisya, nkaambo taakwe cibotu ansi aano kwiinda kuti muntu alye, anywe akulikkomanisya. Ndendilyo nayookondwa mumilimo yamazuba aabuumi bwakwe boonse oobo Leza mbwaakamupa ansi aano.

16Lino nindakayeeya zyabusongo akuti ndibonesye zyamilimo yamuntu ansi aano, ndakabona kuti teleede koona sikati amasiku. 17Kumane ndakabona zyoonse eezyo Leza nzyaakacita. Taakwe naba omwe uukonzya kumvwisya eezyo zicitika ansi aano. Nikuba kuti muntu ulalipenzya kuti azibisye, takonzyi kumvwisya mbocibede. Nikuba kuti muntu musongo kaamba kuti ulizi, takonzyi kumvwisya aakasimpe.

Currently Selected:

Mukambausi 8: Tonga96

Highlight

Copy