Ciibalusyo 6
6
Mulawo mupati kwiindilila
1Lino njeeyi milawo amalailile anjiisyo zyoonse nzyaakandilailila Mwami Leza, Leza wanu kuti ndimwiisye. Mukiitobele yoonse eeyi munyika njemuyootola. 2Mubuumi bwanu boonse, nywebo abana banu abalunyungu banu muleelede kuswiilila Mwami Leza, Leza wanu akubamba milawo amalailile aakwe oonse aaya ngendimupa kutegwa mukapone munyika eeyo. 3Amwiiswiilile akwiibamba milawo eeyi, nywebo Nobaisilayeli. Ndendilyo zintu zyoonse niziyoomweendela kabotu. Muyooba musyobo mupati akuyookkala munyika mbotu yambolezi, mbubonya mbwaakamusyomezya Mwami Leza, Leza wabasikale banu.
4“Nobaisilayeli amuswiilile Mwami Leza wesu ngumwi. 5Amuyande Mwami Leza, Leza wanu amyoyo yanu yoonse, amyuuya yanu yoonse, alimwi anguzu zyanu zyoonse. 6Mutakalubi milawo eeyi njendamupa buno buzuba. 7Amukaiisye bana banu cabunkutwe. Kamwiibaluluka kufumbwa nkomubede mumaanda, nimuli mulweendo, nimulyookezya nikuba kubeleka. 8Kamulyaanga kumaboko akwiisama kunkumo kuti cibe ciibalusyo. 9Mwiilembe azikotamino, azicinda zyamaanda aanu alimwi aazitendele zyabwaanda.”
Cisubulo cabataswiilili
10“Mwami Leza, Leza wanu wakabasyomezya basikale banu, ba Abulahamu, Izaka a Jakobo, kuti uyoomupa nyika iijisi minzi mibotu, yabuvubi, njimwatakayaka pe, 11maanda aayo anooyoozwide zintu zibotu nzimwatakabikka pe. Alimwi kunooyooli mikalo yamaanzi yakasigwa kale, amyuunda yansaansa amaoliva iisyangidwe kale. Lino Mwami Leza aakumunjizya munyika eeyo mbotu mwaakujana zyoonse nzyomuyanda kulya, 12amucenjele kuti mutamulubi Mwami Leza ooyo wakamugwisya mu Ijipiti momwakali bazike. 13Amukalemeke Mwami Leza, Leza wanu alikke, mukakombe nguwe alikke, alimwi mukakonkezye muzina lyakwe. 14Mutakakombi baleza bambi, nikuba kusola kukomba baleza babantu bamuzingulikide. 15Nkaambo Mwami Leza, Leza wanu walo uuli akati kanu ngu Leza uutalekeleli bakomba baleza bambi. Naa mwacita oobo Leza uyoomunyemena kapati akumulobya do!
16“Mutakataliki Mwami Leza, Leza wanu mbuli mbomwakacita ciindi nimwakali ku Masaa. 17Mubone kuti mwabamba milawo yoonse, malailile, anjiisyo nzyamupede. 18Kamucita ziluleme eezyo Mwami Leza nzyamulailila kuti mucite, ndendilyo zintu zyoonse niziyoomweendela kabotu. Aawo muyookonzya kutola nyika mbotu Mwami Leza njaakasyomezya kuli basikale banu. 19Muyootanda basinkondonyoko kuzwa mulinjiyo, mbubonya mbuli bwakaamba Mwami Leza.
20“Lino kuti ciindi ciboola bana banu bakamubuzye kuti, ‘Ino caamba nzi kuti katubamba milawo, malailile anjiisyo eezi Mwami Leza, Leza wesu nzyaakatupa?’ 21Nywebo mukaingule kuti, ‘Twakali bazike kumwami wa Ijipiti, nkabela Mwami Leza nguwakatugwisya anguzu zyakwe mpati.’ 22Twakalibonena tobeni mbuli Mwami Leza mbwaakacita maleele aziyoosya zipati ku Baijipiti, akuli Falo abamukwasyi wakwe boonse. 23Wakatugwisya swebo kuzwa mu Ijipiti akutuleta kuno kuzootupa nyika eeyi, mbuli mbwaakasyomezya kuli basikale besu. 24Nkankakaako Mwami Leza ncaakatulailila kuti katuswiilila akubamba milawo eeyi yoonse, alimwi katumulemeka. Kuti katucita oobo, unoolanga kabotu musyobo wesu akuucita kuti ube musyobo uuzwidilide. 25Kuti naa twaswiilila cakusyomeka zintu zyoonse nzyatulailila, Mwami Leza, Leza wesu uyootucitila ziluleme.”
Currently Selected:
Ciibalusyo 6: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
