Daniyeli 2
2
Ciloto ca Nebukadineza
1Mumwaka wabili wakulela kwakwe, Nebukadineza wakalota ziloto, nkaako wakapenga mumoyo cakuti taakakonzya koona. 2Nkaako mwami wakaita basimabibo, basikulota, basondi abaŋanga kuti bamwaambile zyaziloto zyakwe. Lino nibakasika akuzooima kumbele lya mwami, 3wakati kulimbabo, “Ndalota ciloto candipenzya, ndiyanda kuti ndicizibe naa caamba nzi.”
4Mpawo baŋanga bakaingula mwami mu Cialamu bakati, “Omwami oongole! Twaambile buyo tobabelesi bako ciloto cako, tulacipandulula.”
5Eelyo mwami wakaingula baŋanga kuti, “Nceeci ncindayeeya kucita, kuti naa mwatandaambila ciloto cangu ncocaamba, ndamukosoola mitwe, maanda aanu ayooba zitantaala zyalo. 6Pele kuti naa mundaambile akundipandulwida, muyootambula zipego, bulumbu akulemekwa kupati kuzwa kulindime. Aboobo amundaambile ciloto akundipandulwida ncocaamba.”
7Bakaingula mwami alimwi kuti, “Mwami atwaambile buyo ciloto cakwe swebo tobabelesi bakwe, tulacipandulula.
8“Mpawo mwami wakaingula kuti, ‘Ndilizi kuti musoleka kumantauka nkaambo mulizi kuti ndisinizizye ancindaamba’ nindati, 9‘Kuti naa mutandaambili ciloto cangu kuli cintu comwe buyo ncomuyoobona. Mwalivwiya-vwiya kuti mundaambile zintu zyakubeja zibi, kutegwa zitacitiki nzendikanzide.’ Nkaako amundaambile ciloto, ndendilyo nendinga ndaziba kuti mulakonzya kundipandulwida.”
10Baŋanga bakaingula mwami kuti, “Taakwe muntu naba omwe ansi aano uukonzya kucita mbuli ceeci ncakumbila mwami! Kasimpe taakwe mwami mupati singuzu wakabuzizye kale cintu cili mbuli ceeci kuli simabibo, siziloto naba muŋanga. 11Mwami ncaabuzya nciyumu kapati. Taakwe muntu naba ni uunga wakonzya kuyubunwida mwami ccita buyo baleza, abalo tabakkali akati kabantu pe.”
12Eeci cakanyemya mwami kapati akumukalazya wakalailila kuti bantu basongo boonse bamu Babuloni bajaigwe. 13Nkaako wakapa malailile aakuti bantu basongo bajaigwe, kwakatumwa baalumi kuti bakalangaule Daniyeli abeenzinyina kuti bajaigwe.
14Lino Aliyoki mupati wabalindizi bamwami naakanyamuka akuunka kuti akatalike kujaya bantu basongo bamu Babuloni, Daniyeli wakakanana kulinguwe cabusongo acamaanu. 15Wakabuzya mupati wababelesi bamwami kuti, “Ino nkaambo nzi mwami naakapa malailile aalunya aali boobu?” Eelyo Aliyoki wakalungulwida Daniyeli makani oonse mbwaabede. 16Naakamvwa boobo, Daniyeli wakanjila muŋanda kuyoobona mwami akuyoomukumbila kuti amupe ciindi, kutegwa azoomupandulwide ciloto eeco.
17Mpoonya Daniyeli wakabweeda kuŋanda yakwe akuyooambila beenzinyina makani aaya ba Hananiya, Misyayeli a Azaliya. 18Wakabalomba kuti bakumbile Leza wakujulu kuti abeetelele amakani aamaseseke aaya, kutegwa walo abeenzinyina batajaigwi antoomwe abantu basongo bamu Babuloni. 19Masiku maseseke aayo akayubununwa kuli Daniyeli mucilengaano. Mpoonya Daniyeli wakatembaula Leza wakujulu 20akuti,
“Alitembaulwe zina lya Leza kwalyoonse alyoonse, busongo anguzu nzizyakwe.
21Ulasandula ziindi aziindi zyamwaka, ulabikka bami azyuuno akubatanda.
Ulapa busongo kubasongo, aluzibo kuli baabo bamvwisya zintu.
22Ulayubununa zintu ziyumu zisisidwe,
ulizi cintu cili coonse cili mumudima, mumuni ulajanwa ooko nkwabede.
23Ndakulumba akukutembaula yebo O Leza wabasikale bangu,
wandipa busongo anguzu, wandizibya ncitwakukumbila,
watuzibya ciloto camwami.”
Daniyeli mbwaakapandulula ciloto camwami
24Mpawo Daniyeli wakainka kuli Aliyoki, ooyo mwami ngwaakasala kuti ajaye bantu basongo bamu Babuloni akuyoomwaambila kuti, “Utajayi bantu basongo bamu Babuloni. Konditola kumwami, ndiyoomupandulwida ciloto cakwe.”
25Mpoonya aawo Aliyoki wakatola Daniyeli kumwami akuti, “Ndajana mwaalumi akati kabaange bakazwa kucisi ca Juda uukonzya kukwaambila omwami ciloto cako ncocaamba.”
26Mwami wakabuzya Daniyeli uutegwa Belitesyaza kuti, “Sena ulakonzya kundaambila ncindakabona muciloto cangu akucipandulula?”
27Daniyeli wakaingula kuti, “Taakwe muntu musongo, ŋanga, simabibo naba musondi uukonzya kukupandulwida zyamaseseke aaya ngobuzya bantu, 28pele kuli buyo Leza wakujulu uuyubununa makani aasisidwe mbuli aaya. Wakutondezya omwami Nebukadineza ciyoocitika mumazuba aaboola. Ciloto cako azilengaano eezyo nzyookabona nookalede nzeezi: 29Nookalede aalya omwami, moyo wako wakali kuyeeya zintu ziyooboola kumbele, lino ooyo sikuyumuna makani aasisidwe wakakutondezya ziyoocitika. 30Pele mebo ndakayubunwidwa makani aaya, teensi kuti mebo ndimusongo kwiinda bantu bapona pe, pele kutegwa omwami uzibe bupanduluzi akuti umvwe eeco ncookali kuyeeya mumoyo wako.
31“Yebo omwami wakalanga, eelyo wakabona cibumbwa cipati kumbele lyako, cakali cipati kapati, kacibalama, cakali kuyoosya. 32Mutwe wacibumbwa wakali wangolida iini-ini, camba caco amaboko akali aansiliva, ida lyaco azibelo zyakali zyamukuba, 33maulu aaco akali aalubulo, zituta zyaco zyakali zyalubulo luvwelene abulongo buumpidwe. 34Lino koceebela, kwakakolomoka bbwe, tiilyakakolomonwa amuntu pe. Lyakauma cibumbwa eeco kuzituta zyaco zyalubulo luvwelene abulongo akupwaya zituta zyaco. 35Mpawo lubulo, bulongo, mukuba nsiliva angolida zyakapwasyauka ciindi eeco nciconya akuba mbuli bungu acuumino camaila cilimo. Luuwo lwakakungulula zyoonse, taakwe kakasyaala pe. Pele bbwe eelyo lyakauma cibumbwa lyakaba dundu lini lyakazuzya nyika yoonse.
36“Lino nceeci ciloto cako tuyanda kuti tukupandulwide omwami. 37Yebo omwami, nduwe mwami wabami. Leza wakujulu wakupa bulelo anguzu, bweendelezi abulemu. 38Wakupa bantu boonse baansi aano, banyama bamusokwe abayuni bamuluuwo. Kufumbwa ooko nkobabede boonse. Nduwe mutwe uulya wangolida.
39“Kunze lyako, kuyooboola bwami bumbi, tabukoonooli mbuli bwako pe. Buyooccilila, bwami bwatatu bunooli bwamukuba, nkabela buyooendelezya nyika yoonse. 40Kumamanino kuyooba bwami bwane, bunooli buyumu mbubonya mbuli lubulo, nkaambo lubulo lulatyoloola akupwaya zintu zyoonse, mbubonya mbuli mbolutyoloola zyoonse, buyoopwaya akutyoloola masi oonse. 41Mbubonya mbuli mbookabona zituta aminwe yalubulo luumpidwe buvwelene abulo ngo, bwami oobu bunooandeene, nikuba boobo bunoojisi nguzu zili mbuli zyalubulo, iiyi, mbubonya mbuli mbookabona lubulo luvwelene abulongo. 42Mbubonya mbuli minwe mbuyakali yalubulo luvwelene abulongo, mbubonya oobo bwami oobu kumwi bunooli buyumu pele kulubazu lumwi bunooli buteteete. 43Mbubonya mbuli mbookabona lubulo kaluvwelene abulongo buumpidwe, mbubonya oobo bantu banoovwelene, tabanookamantene kabotu mbubonya mbuli lubulo abulongo.
44“Mumazuba aabami aabo, Leza wakujulu uyoobikka bwami butakanyonyoonwi, alimwi tabukasiilwi bantu bambi. Buyoopwayaula amalelo aayo oonse akwaamanizya, pele bwalo bunooyooliko mane kukabe kutamani! 45Ncocaamba cilengaano cabbwe lyakakolomoka kuzwa mucilundu, tiilyakakolomonwa amuntu pe, bbwe eelyo lyakapwayaula lubulo, bulongo, nsiliva angolida. Leza mupati wanguzu wakakutondezya omwami eeco ciyoocitika kumbele. Ciloto ncakasimpe abwalo bupanduluzi bwaco bulisinizizye.”
46Mpawo mwami Nebukadineza wakavuntama ansi kumbele lya Daniyeli wamulemeka, eelyo wakalailila kuti Daniyeli apegwe zipego, zituuzyo atununkilizyo. 47Mwami wakati kuli Daniyeli, “Kasimpe Leza wako ngu Leza wabaleza ngosimalelo, Mwami wabami, ngusikuyubununa makani aamaseseke, nkaambo wakonzya kuyubununa makani aaya aasisidwe.”
48Mpoonya mwami wakasumpula Daniyeli, wakamupa zipego zinji. Wakamucita kuti aendelezye cibeela cacisi coonse ca Babuloni, wakamucita kuti abe ngosilutwe wabantu basongo boonse. 49Musule aceeci, Daniyeli wakakumbila mwami kuti abikke Syaduleki, Misyeki a Abedinego kuba basikweendelezya milimo yacibeela cacisi ca Babuloni, pele walo Daniyeli wakakkala ooko kunkuta yabwami.
Currently Selected:
Daniyeli 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
