2 Samuyele 18
18
Abisalomu mbwaakazundwa akujaigwa
1Lino Devedi wakabunganya basilumamba aabo mbaakali aabo akubapa basilutwe bazyuulu abasilutwe bamyaanda. 2Devedi wakapambaula basinkondo muzibeela zyotatwe, cakusaanguna cakali kulangwa a Jowabu, cabili cakali kulangwa a Abisyayi mwanaa Zeluiya, mupati wa Jowabu, catatu cakali kulangwa a Itayi Mugiti. Eelyo mwami wakaambila bantu kuti, “Ambebo lwangu ndilainka andinywe.”
3Pele baalumi aaba bakaingula kuti, “Toelede kuunka pe, nkaambo naa twazundwa akutija tabakwe makani andiswe, nikuba kuti cisela cesu cafwa, tabakwe makani. Pele yebo ulainda bantu bali zyuulu zili kkumi akati kesu. Ncokonzya kucita buyo nkututumina lugwasyo.”
4Aawo mwami wakati kulimbabo, “Ndacita kufumbwa eeco ncekonzya kumucitila.” Aboobo mwami wakaima kumbali aamanjililo ciindi basilumamba nibakali kwiinda muzyuulu zyuulu amumyaanda myaanda. 5Mwami wakalailila Jowabu, Abisyayi, a Itayi kuti, “Amumufwide luzyalo mulombe Abisalomu akaambo kangu.” Basilumamba boonse bakamvwa ciindi mwami naakali kupa malailile kuli Basilutwe aaamba zya Abisalomu.
6Lino basilumamba bakainka musokwe kuyoolwana a Baisilayeli nkondo yakalwaninwa mucisaka caku Efulemu. 7Baisilayeli bakazundwa ooko abasilumamba ba Devedi, nkabela buzuba oobo bantu banji bakajaigwa. Kwakafwa baalumi bali zyuulu zili makumi obilo. 8Lino nkondo yakali kuya bumwaika mucisi coonse. Bantu bakafwa mucisaka bakali banji kwiinda bakajaigwa apanga.
9Mpawo Abisalomu wakaswaangana abasinkondo ba Devedi, wakatantide amyuulu yakwe ciindi myuulu niyakainda kunsi lyamitabi iivwevwede yamusamu mupati. Masusu aakwe akazingaila kumusamu mupati ooyo, aboobo wakasyaala kazuumbaana, myuulu eeyo njaakatantide yakaindilila. 10Umwi mwaalumi wakamubona, amane wakaambila Jowabu kuti, “Ndamubona Abisalomu kazuumbaana mumusamu mupati.”
11Mpoonya Jowabu wakati kumwaalumi ooyo wakamwaambila, “Ma, wamubona ncobeni? Ino nkaambo nzi nootamujaya mpoonya aawo? Noocita boobo nindabotelwa alimwi nindakupa mali aansiliva aali kkumi alutambo lwabulwani.”
12Pele mwaalumi ooyo wakati kuli Jowabu, “Nikuba kuti kandipegwa mali aansiliva aali cuulu nindatajaya mwanaa mwami pe. Nkaambo twakamvwa mwami naakalailila nduwe, Abisyayi a Itayi kuti, ‘Akaambo kangu mumufwide luzyalo mulombe Abisalomu.’ 13Nindamujaya kwamana mwami kayoomvwa, mukuti kunyina cisisika kulinguwe, yebo nootaakundikwabilila pe.”
14Aawo Jowabu wakati, “Nsiciyandi kusowa ciindi kwaambaula anduwe.” Eelyo wakabweza masumo otatwe waakuyasa Abisalomu ziindi zyotatwe mucamba, ciindi eeci Abisalomu wakacili kuzumbaana mumusamu. 15Mpawo balombe bali kkumi babweza zilwanyo zya Jowabu bakazinguluka Abisalomu akumuuma bamujaya.
16Mpoonya Jowabu wakasiba mweembo, basilumamba bakapiluka kuzwa nkubakali kutandaanya Baisilayeli, nkaambo Jowabu wakabalesya. 17Lino bakabweza Abisalomu akumusowela mumulindi mupati balundika mulwi wamabwe mupati. Aawo Baisilayeli boonse bakatijide kale kuya kumaanda aabo.
18Lino Abisalomu kacipona wakayakide ciibalusyo cakwe mukkuti lyamwami, nkaambo wakati, “Nsijisi mwana mulombe wakuti abusye zina lyangu.” Eeco ciibalusyo wakacuulika zina lyakwe, aboobo mbociciitwa asunu.
Devedi mbwaakaambilwa lufu lwa Abisalomu
19Lino Ahimaazi mwanaa Zadoki wakati, “Nkoo nzuzaane nkaambile mwami makani aaya kuti Mwami Leza wamuvuna kuzwa kuli basinkondonyina.”
20Mpawo Jowabu wakati, “Tokonzyi kutola makani sunu pe, uzooatola buzuba bumbi, nkaambo mwanaa mwami wajaigwa.” 21Mpoonya Jowabu wakati ku Mukusyi, “Koya ukaambile mwami eeco ncoobona.” Eelyo Mukusyi wakakotama cakulemeka kumbele lya Jowabu amane wazuza.
22Mpoonya Ahimaazi wakati kuli Jowabu alimwi, “Taakwe makani, nzuzaane nditobele Mukusyi.”
Jowabu wakati, “Ino nkaambo nzi noyanda kuzuza mwanaangu, kakuli tokonzyi kujana bulumbu kumakani aaya pe?”
23Walo wakati, “Taakwe makani, ndilazuza.” Jowabu wakati kulinguwe, “Zuza.” Mpoonya Ahimaazi wakazuza akutola nzila iiinda mucibanda wamwiindila Mukusyi.
24Lino Devedi wakalikkede akati kamilyango yobilo, mulindizi wakatanta alululi lwakumulyango wakubwaanda, nkabela naakalanga, wakabona mwaalumi kazuzaana. 25Mpawo mulindizi wakaambila mwami. Mwami wakati, “Kuti naauli alikke, nkokuti ulaamakani mabotu akwaamba.” Eelyo wakaswena.
26Mpoonya mulindizi wakabona aumbi mwaalumi kazuzaana, mpawo mulindizi wakatambikizya kumulindizinyina kumulyango akwaamba kuti, “Bona nguulya aumbi mwaalumi uuza buzuza.”
Eelyo mwami wakati, “Awalo uleta makani mabotu.”
27Mpawo mulindizi wakati, “Muntu mutaanzi uzuzaana mbuli Ahimaazi mwanaa Zadoki.”
Eelyo mwami wakati, “Mwaalumi mubotu, ulaza amakani mabotu.”
28Mpoonya Ahimaazi wakajuzya mwami.
Eelyo wakakotama ansi kulemeka mwami wati, “Alumbwe Mwami Leza wako waaba baalumi aabo bakakubukilide o mwami simalelo wangu.”
29Eelyo mwami wakati, “Sena mulombe Abisalomu uli kabotu?”
Ahimaazi wakaingula kuti, “Ciindi Jowabu naatuma mubelesi wako ndabona kabapilingana, pele nsizi naa ncinzi cacitika.”
30Nkabela mwami wakati, “Mbubo, koya imina waalya.” Aboobo wakainka.
31Mpawo Mukusyi wakasika, amane wakati, “Ndaleta makani mabotu, o mwami simalelo wangu. Nkaambo Mwami Leza sunu wakuvuna kuzwa kuli baabo bakakubukilide.”
32Mwami wakati ku Mukusyi, “Sena mulombe Abisalomu uli kabotu?”
Mukusyi ooyo wakati, “Boonse basinkondonyina mwami simalelo wangu, abaabo bayanda kumubukila, babe mbuli mulombe ooyo.”
33Eelyo mwami wakausa kapati, mpawo wakanyamuka watanta muŋanda yamujulu kumanjililo, uya bulila, wakali kuti, “Maawe, mwanaangu Abisalomu, mwanaangu Abisalomu, mwanaangu Abisalomu. Nindafwa ndime mubusena bwako, Abisalomu.”
Currently Selected:
2 Samuyele 18: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
