2 Samuyele 10

Devedi mbwaakazunda Baamoni a Basiliya

(1 Makani 19.1-19)

1Bweende-bweende Nahasyi mwami wa Baamoni wakafwa, eelyo Hanuni mwanaakwe nguwakalela mubusena bwawisi. 2Lino Devedi wakati, “Ndamutondezya luse Hanuni, mwanaa Nahasyi mbubonya mbuli wisi mbwaakali kundicitila.” Aboobo Devedi wakatuma babelesi bakwe kuyoomulizya nkaambo kawisi. Babelesi ba Devedi aabo bakasika munyika ya Baamoni. 3Pele bapati ba Baamoni bakati kuli Hanuni mwami wabo, “Sena uyeeya kuti Devedi naatuma basikukulizya nkulemeka uso? Tee watuma babelesi bakwe kuti bazootwele munzi akuubona mbuubede kwamana bazoousaale.”

4Mpawo Hanuni wakajata babelesi ba Devedi akubanyoola cisela comwe cacilezu, akukosola zibaki zyabo mpozili akati kazibuno amane wabatanda. 5Nkabela ciindi Devedi naakaambilwa makani aaya, wakatuma basikuyoobacingauzya, nkaambo balo bakafwide nsoni kapati. Eelyo mwami wakati, “Amukkale ku Jeliko kusaanguna mane kusikila zilezu zyanu zimene akulampa, kwamana ndendilyo nimuyoopiluka.”

6Lino Baamoni nibakabona kuti Devedi wacimwa, bakatuma akuyookumbila basilumamba ba Basiliya ku Betelehobi a Basiliya baku Zoba, bali zyuulu zili makumi obilo. Mwami waku Maaka wakajisi basilumamba bali cuulu comwe, basilumamba baku Tobu bakali zyuulu zili kkumi azibili. 7Lino Devedi naakamvwa, ceeci wakatuma Jowabu ampi yoonse yabasilumamba basinguzu. 8Eelyo Baamoni bakazwa mumunzi akwiima mindando yakulwana kumanjililo aamunzi, nkabela Basiliya baku Zoba, baku Lehobu, baku Tobu aku Maaka bakali musokwe.

9Ciindi Jowabu naakabona kuti bamulwana kumbele akusule, wakasala bamwi basilumamba basinguzu bakwe akubalanganya a Basiliya. 10Pele aaba basilumamba bamwi bakasyaala wakabasiila Abisyayi munyina akubalanganya a Baamoni. 11Mpawo wakati, “Kuti naa Basiliya balaanguzu kwiinda ndime, yebo inga wandigwasya, pele kuti naa Baamoni babanguzu kwiinda nduwe, mebo ndilaboola kuzookugwasya. 12Koba sicamba alimwi atulwanine bantu besu aminzi ya Mwami Leza wesu, alimwi Mwami Leza acite eeco cimubotela.”

13Aboobo Jowabu abantu aabo bakali aanguwe bakaswena afwiifwi kuti balwane Basiliya, nkabela Basiliya bakatija. 14Mpoonya Baamoni nibakabona kuti Basiliya batija, abalo mbubonya buyo bakatija Abisyayi, akuyoonjila mumunzi. Mpawo Jowabu wakapiluka kuzwa kukulwana Baamoni waboola ku Jelusalemu.

15Lino ciindi Basiliya nibakabona kuti bazundwa a Baisilayeli, balibunga-bunga antoomwe mulicabo. 16Mpawo Hadadeza wakatuma akuyootamba Basiliya aabo bakali kukkala mutala amulonga wa Yufuletisi. Balo bakasika ku Helamu, eelyo Syobaki silutwe wabasilumamba ba Hadadeza ngowakali musololi wabo. 17Nkabela Devedi naakaambilwa makani aaya wakabunganya Baisilayeli boonse antoomwe, akuzubuka mulonga wa Jolodani, eelyo wakasika ku Helamu. Ooko Basiliya nkubakaima mumindando kuti balwane Devedi. 18Mpoonya Basiliya bakatija Baisilayeli alimwi. Nkabela basinkondo ba Devedi bakajaya basinkalaki ba Basiliya bali myaanda iili ciloba alimwi bakajaya bali zyuulu zili makumi one basikweenda aamaulu. Eelyo basinkondo ba Devedi bakayasa Syobaki silutwe wabasilumamba ba Basiliya mane wakafwa nkukonya ooko. 19Nkabela ciindi bami bakali kweendelezegwa a Hadadeza nibakabona kuti bazundwa a Baisilayeli, bakapangana cizuminano caluumuno akulibombya ku Baisilayeli. Mbombuboobu Basiliya mbubakayoowa kugwasya Baamoni alimwi.

Currently Selected:

2 Samuyele 10: Tonga96

Highlight

Copy

Compare