2 Bami 6

Elisya mbwaakanuna keembe kakainkide

1Lino nkamu yabasinsimi yakaambila Elisya kuti, “Bona, busena mbotukkede ayebo bwaceya. 2Atweende ku Jolodani kuti umwi aumwi wesu akagonke ciyako, tuyake busena bwakukkala.” Eelyo walo wakati, “Kamuya.”

3Balo bakati, “Sena yebo totuunke andiswe?” Walo wakaingula kuti, “Ndainka.” 4Aboobo wakainka ambabo. Nkabela nibakasika ku Jolodani bakatalika kugonka ziyako. 5Mpoonya umwi naakali kugonka masamu, keembe kakakuka kainkila mumaanzi, eelyo wakakwiila wati, “Maawe, simalelo wangu, ndakakumbide buya.”

6Lino muntu wa Leza wakabuzya kuti, “Kalokela aali?” Naakamutondezya mpukakalokela wakatema kasamu, wakawaala mpoonya aawo, eelyo keembe kakaibuka. 7Mpawo wakati, “Kagwisye.” Nkabela wakakagwisya.

Basilumamba ba Baalamu mbubakazundwa

8Cimwi ciindi mwami waku Alamu wakali kulwana a Baisilayeli, naakamana kwaambilana abalupati-pati bakwe kuti, “Kuli buteene abuteene nkweenjooyakila zivuka zyangu.” 9Muntu wa Leza wakatuma mulomo ku mwami waku Isilayeli wakati, “Cenjela kuti utabi noinda kubusena oobu nkaambo ooko nkobayooyakila zivuka Baalamu.” 10Eelyo mwami waku Isilayeli wakatumina bantu kuti bakalange-lange busena oobo bwakaamba muntu wa Leza. Kwaziindi zinjaanji Elisya wakali kucenjezya mwami zyamasena aali boobu.

11Aboobo mwami waku Alamu wakanyema kapati, mpawo wakaita balupati-pati bakwe wati, “Amundaambile nguni akati kanu uuli kulubazu lwa Baisilayeli?” 12Umwi wabo wakati, “Taakwe pe, O mwami simalelo wangu, pele Elisya musinsimi uukkala mucisi ca Isilayeli, nguuambila mwami wa Isilayeli majwi ngoamba cakusisikizya kuzyuli.” 13Mpoonya mwami wakati, “Kamuya mukabone naa ukkala kuli kutegwa nditume bantu bakamujate.” Eelyo mwami wakaambilwa kuti, “Uli ku Dotani.” 14Aawo wakatuma basimabbiza, nkalaki ampi yabasilumamba mpati, bakasika ciindi camasiku akuuzinguluka munzi. 15Ciindi mubelesi wamuntu wa Leza naakabuka cifumo-fumo akuya anze, wakajana kuti kuli mpi yabasimabbiza ankalaki iizingulukide munzi. Mpawo mubelesi wakati, “Maawe simalelo wangu! Ino tucite buti?”

16Walo wakati, “Utayoowi, nkaambo aabo mbotuli aabo mbanji kwiinda mbabo.” 17Mpoonya Elisya wakakomba wati, “O Mwami Leza, jalula meso aamubelesi ooyu, nkabela wakabona kuti cilundu cizwide mabbiza ankalaki zyamulilo kuzinguluka Elisya.”

18Lino Baalamu nibakaselemuka kuzoolwana, Elisya wakakomba ku Mwami Leza wati, “O Mwami Leza bantu aaba boofwaazye!” Bakoofwaala mbubonya mbuli bwakakomba Elisya. 19Mpawo Elisya wakabaambila kuti, “Mwasweeka eeyi taili njenzila alimwi ooyu tuuli ngomunzi pe, amunditobele ndimutole kumuntu ngomuyandaula.” Aboobo wakabasisya ku Samaliya.

20Lino mbubakaakunjila buyo mu Samaliya, Elisya wakati, “O Mwami Leza jalula meso aabantu aaba kuti babone.” Aboobo Mwami Leza wakajalula meso aabo, eelyo nibakabona bakajana kuti bali aakati kamunzi wa Samaliya. 21Mwami wa Isilayeli naakababona, wakati kuli Elisya, “Sena taata ndibajaye aaba? Ndibajaye?” 22Wakaingula kuti, “Utabajayi pe. Sena uyanda kujaya bantu mboozunda kale munkondo? Peepe bape cakulya amaanzi kuti banywe, wamana ubaleke bakaluule kumwami wabo.” 23Aboobo wakababambila pobwe pati, eelyo nibakamana kulya akunywa, wakabaleka, babweeda kumwami wabo. Nkabela Baalamu taakwe nibakacili kusaala nyika ya Isilayeli pe.

Kusinkilizigwa kwa Samaliya

24Musule akooku Benihadadi mwami waku Alamu wakayobolola basilumamba bakwe boonse, wainka waakusinkilizya munzi wa Samaliya. 25Eelyo kwakaba nzala mpati mu Samaliya, nkaambo kusinkilizya ooku kwakatola ciindi cilamfu. Mutwe wambongolo wakali kuulisigwa masyekeli aansiliva aali lusele akalo kagabba kabufumba bwankwilimba kakali kuulwa masyekeli osanwe.

26Lino mwami wa Isilayeli naakali kwiinda kabembeleka lukwakwa umwi mukaintu wakamulilila wati, “Ndigwasye omwami simalelo wangu!”

27Mpawo walo wakati, “Kuti naa Mwami Leza walo takugwasyi ino mebo ndilakugwasya buti? Ndinyina maila naba waini pe.”

28Kumane mwami wakamubuzya kuti, “Ino ncinzi cakupenzya?” Mukaintu wakaingula kuti, “Ooyu mukaintu wakandaambila kuti, ‘Leta mwanaako tumulye sunu, wangu tuzoomulya juunza.’” 29Aboobo twakajika mwanaangu twamulya. Lino nibwaca ndamwaambila kuti, “Leta mwanaako ayebo tumulye, pele walo wamusisa.” 30Mwami naakamvwa majwi aamukaintu ooyu, wakazapaula zyakusama zyakwe, lino kaciya bubembeleka, bantu bakabona kuti wakasamide masaka, 31eelyo wakati, “Leza andisubule akwiindilila naa mutwe wa Elisya mwanaa Syafati intuukosoli sunu.”

32Lino Elisya wakali kkede muŋanda yakwe, abalo bapati bakalikkede anguwe. Lino mwami wakatumide kale muntu, pele mutumwa katanasika Elisya wakaambila bapati kuti, “Sena mulimubwene ooyu muntu mujayi ngwaatuma kuti andikosole mutwe? Lino, mutumwa asika mujale kumulyango, mujatilile. Nkaambo musindo wasimalelo wakwe ulalimvwisya musule.” 33Eelyo naakacili kwaambaula ambabo, mutumwa wakasika kulinguwe, akumwaambila kuti, “Mapenzi aaya azwa ku Mwami Leza! Sena nkecilindila Mwami Leza kuti andigwasye?”

Currently Selected:

2 Bami 6: Tonga96

Highlight

Copy

Compare