2 Makani 28
28
Mwami Ahazi wacisi ca Juda
(2 Bami 16.1-4)
1Ahazi wakali aamyaka iili makumi obilo, naakatalika kulela, nkabela wakalela mu Jelusalemu kwamyaka iili kkumi acisambomwe. Pele taakacita ziluleme ku Mwami Leza mbuli Devedi sikale wakwe. 2Wakatobela nzila zyabami ba Isilayeli alimwi wakapanga amituni yalubulo yaba Baali. 3Wakali kupaizya mukkuti lya Benihinomu alimwi wakapa bana bakwe balombe kuti cibe cipaizyo cakutenta, mbubonya mbuli zisesemyo zyamisyobo eeyo Mwami Leza njaakatandila Baisilayeli. 4Wakapaizya akutenta tununkilizyo mumalende amutulundu, naa mumasamu.
Mbubakalwana a Baalamu
(2 Bami 16.5)
5Nkaambo kakuti mwami Ahazi wakabisya, Mwami Leza wakwe wakamwaaba kumwami wa Baalamu. Mwami waku Alamu wakamuzunda akutola bantu bakwe mubwaange ku Damasikasi. Kunze aboobo, Mwami Leza wakaaba Ahazi kuli Peka mwanaa Lemaliya mwami wa Isilayeli, ooyo wakajaya bantu bakwe banji. 6Mubuzuba bomwe Peka mwanaa Lemaliya wakajaya basilumamba baku Juda bali zyuulu zili makumi obilo, cakacitika eeci nkaambo baku Juda bakaleka Mwami Leza wabasikale babo. 7Silumamba umwi wa Baisilayeli uutegwa Zikili, wakajaya mwanaa mwami Ahazi uutegwa Maaseiya, amweendelezi waŋanda yabwami uutegwa Azilikamu, alimwi a Elikana wakali wabili kumwami. 8Nikuba kuti baku Juda bakali basicisinyina, basilumamba ba Baisilayeli bakatola mubwaange ku Samaliya bakaintu abana bali zyuulu zili myaanda yobilo kubikkilizya anzibakasaala zinji.
Musinsimi Obedi
9Mwaalumi umwi uutegwa Obedi, musinsimi wa Mwami Leza wakali mumunzi wa Samaliya. Wakaswaanganya basilumamba ba Baisilayeli kabajisi abaange baku Juda kabayanda kunjila mumunzi. Wakati, “Mwami Leza wabasikale banu waaba ba Juda kulindinywe nkaambo ulibanyemenede, kwamana nywebo mwabajaya mbuli mbwatayandi. 10Ono lino muyanda kuti baalumi abakaintu baku Jelusalemu a Juda babe bazike banu. Sena tamuzi kuti anywebo mujisi mulandu ku Mwami Leza wanu?”
11“Lino amundiswiilile! Amupilusye basicisinyoko aaba mbumwatola mubwaange, mwatacita boobo Mwami Leza ulamusubula mubukali bwakwe.”
12Lino basololi bamwi bamucisi ca Efulemu aaba: Azaliya mwanaa Jehohanani, Belekiya mwanaa Syilemoti, Jehizikiya mwanaa Syulumu a Amasa mwanaa Hadilayi abalo bakakazya cakacita basilumamba aaba, 13bakati, “Tamweelede kuleta baange aaba kuno nkaambo tulaba aamulandu ku Mwami Leza. Sena muyanda kuyungizya zinyonyoono amulandu wesu? Kayi mulandu wesu mupati kale, Mwami Leza ulakonzya kutusubula.” 14Aawo basilumamba bakapa baange nzibakasaalide kubantu abasololi babo. 15Kwakasalwa baalumi bone kuti bape baange aabo zisani kuzwa kuli zyakasaalwa. Bakabapa zisani andyasyo zyakusama, bakabapa cakulya acakunywa cinji, bamane bakabikka mafuta aaoliva azilonda zyabo. Aabo bakagonkedwe bakatansikwa amabbiza, aboobo baange boonse bakabapilusya kuli basicisinyina ku Jeliko munzi watukunka. Kuzwa waawo Baisilayeli bakapilukila kumunzi wabo wa Samaliya.
Ahazi mbwaakakumbila kugwasigwa
(2 Bami 16.7-9)
16Mwami Ahazi wakakumbila lugwasyo kuzwa ku mwami waku Asiliya. 17Nkaambo ciindi eeco Baedomu bakaliboolede alimwi kuzoolwana cisi ca Juda akutola baange banji. 18Ciindi Bafilisiti nibakali kusaala minzi iili kunselelo lyazilundu kumusanza wacisi ca Juda, bakatola akukkala muminzi ya Betisyemesyi, Aijaloni a Gedeloti kubikkilizya aminzi yaku Soko iili ngu Timuna a Gimuzo atunzi twayo. 19Nkaambo kakuti mwami Ahazi wacisi ca Juda wakacita kuti bantu ba Juda babisye alimwi akuti taakali kusyomeka ku Mwami Leza, Mwami Leza wakaletela baku Juda mapenzi. 20Mucilawo cakuti Tigilatipilesa mwami waku Asiliya agwasye Ahazi wakatalika kumupenzya. 21Ahazi wakatola zimwi zintu zyaŋanda ya Mwami Leza ayabwami alimwi azyamumaanda aabasololi babantu, wazipa kumwami waku Asiliya. Pele nikuba boobo taakamugwasya pe.
Cinyonyoono ca Ahazi
22Lino naakapenga kapati, Ahazi wakabisizya Mwami Leza kwiindilila. 23Wakapa zipaizyo kuli baleza babantu baku Damasikasi aabo bakamuzunda. Wakacita oobo kayeeya kuti, “Mukuti baleza babami ba Baalamu babagwasye, ndapaizya kulimbabo kuti ambebo bandigwasye.” Pele baleza aabo bakapa kuti walo awe a Baisilayeli boonse. 24Ahazi wakabungika zibelesyo zyamuŋanda ya Leza akuzitola. Wakajala zitendele zyaŋanda ya Leza akuyooyaka zipaililo muzyooko zyamazila aa Jelusalemu. 25Muminzi yoonse yacisi ca Juda wakayaka malende aakupaizizya kuli baleza bambi. Eeci cakanyemya Mwami Leza wabasikale babo.
26Lino eezyo zimwi zyakulela kwakwe alimwi anzila zyakwe azimwi naakatalika kulela kuyoosika kumamanino, zililembedwe mumabbuku aabami ba Juda a Isilayeli. 27Ahazi wakafwa akuzikkwa abasikale bakwe mu Jelusalemu. Pele taakazikkilwa muzyuumbwe zyabwami. Hezekiya mwanaakwe nguwakalela mubusena bwakwe.
Currently Selected:
2 Makani 28: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
