2 Makani 19
19
Musinsimi mbwaakanyemena Jehosyafati
1Lino ciindi Jehosyafati mwami waku Juda naakapiluka kabotu kuŋanda yakwe yabwami mu Jelusalemu, 2Jehu musinsimi mwanaa Hamani wakainka kuyooswaangana anguwe, waakumwaambila kuti, “Mbuti mbogwasya babi akuyanda basulaikide Mwami Leza? Nkaambo kaceeci bukali bwa Leza buli aalinduwe. 3Nikubaboobo kucili zimwi zibotu anduwe, wakamwaya misumpuululu ya leza mukaintu Asyela kuzwa munyika. Alimwi wabikkide moyo wako mukucita ziyanda Mwami Leza.”
Jehosyafati mbwaakasala babetesi
4Lino nikuba kuti Jehosyafati wakali kukkala mu Jelusalemu, wakali kubeendela bantu lyoonse kuzwida ku Biiyasyeba kumusanza kuyoosika kumanina nyika yakwe ku nyika yatulundu-lundu ya Efulemu kunyika. Wakali kucita boobu kuti aboozye bantu ku Mwami Leza wabasikale babo. 5Wakasala babetesi munyika, a muminzi iikwabilidwe mucisi ca Juda. 6Wakabaambila kuti, “Amucenjele mbomubeteka, nkaambo mbeta zyanu zizwa ku Mwami Leza kutali kubantu pe. Mwami Leza nguulangilila mbomukosola milandu. 7Nkaako amuyoowe Mwami Leza. Amubeteke cakucenjela mutatambuli masinkamulomo nikuba kusalulula ciindi nimubeteka.”
8Lino amwalo mu Jelusalemu Jehosyafati wakasala Balevi, bapaizi, abamikwasyi ya Isilayeli kuti kabalanga zyamakani aateendelene amulawo wa Mwami Leza akubeteka milandu yabaabo bakali kukkala mu Jelusalemu. 9Wakabalailila boobu, “Muleelede kubeteka cakusyomeka, amoyo woonse, kamulemeka Mwami Leza. 10Kufumbwa mulandu uuletwa kulindinywe abasicisinyoko bali mumunzi, nuuba wabujayi, naa kujatikizya mulawo, malailile ambeta, mubacenjezye kuti batabisizyi Mwami Leza nobabetekwa, bacita boobo inga baleta bukali bwa Mwami Leza alindinywe abasicisinyoko. Mbomutanoobisyi oobo. 11Munoolangwa a Amaliya mupaizi silutwe mumakani oonse aajatikizya zya Mwami Leza. Zebadiya mwana wa Isyimayeli musololi wamusyobo wa Juda, nguunoolanga mumakani aajatikizya mwami. Balevi mbabanoobona kuti kufumbwa cakosolwa ankuta cacitika. Amube basicamba mukukutauka mulimo ooyu, awalo Mwami Leza abe abaabo baticicite kabotu.”
Currently Selected:
2 Makani 19: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
