2 Makani 10
10
Misyobo yakunyika mbuyakazanga
(1 Bami 12.1-20)
1Lehobowamu wakainka ku Syekemu ooko Baisilayeli nkubakabungene kuti bamunjizye bwami. 2Lino Jelobowamu mwanaa Nebati naakamvwa boobo, ciindi eeci wakacili mu Ijipiti nkwaakatijilide kuzwa kumwami Solomoni, wakaboola kuzwa ku Ijipiti. 3Baisilayeli mbibakamutumina kuti aboole, nkabela boonse bakainka kumwami Lehobowamu akuyooti kulinguwe, 4“Solomoni uso wakali kutulela calunya alimwi wakali kutuminya kapati, yebo tulemunune notutibe bantu bako.”
5Lehobowamu wakabaingula kuti, “Mukaboole kwainda mazuba otatwe.” Aboobo bantu bakainka.
6Mpoonya Lehobowamu wakabuzya-buzya bamanene aabo bakali kulailila Solomoni wisi, wakababuzya kuti, “Ino inga mwandilailila kuti nzoobaambile nzi bantu aaba?”
7Balo bakamwiingula kuti, “Kuti naa ubaambile kabotu bantu aaba cakubabotelezya, ndendilyo nibayookubelekela kabotu akukuswiilila lyoonse.”
8Pele Lehobowamu taakwe naakaswiilila malailile aabo pe, amane wakaya kuli bamusela wakwe, mbaakakomena limwi, waakubabuzya kuti, 9“Ino nywebo inga mwandilailila kuti nkati nzi kubantu aaba bandikumbila kuti ndibaubauzizye mikuli yabo?”
10Eelyo balo bakati, “Mboobu mbotikabaambile, ‘Mebo kantengeza kangu nkapati kwiinda cibuno cataata!’ 11Nkokuti naa mikuli yataata yakali kumulemena, yangu iyoomuminya. Taata wakali kumuumya miluso, pele mebo noomukwabbauzya zimboko.” 12Lino nikwakainda mazuba otatwe, Jelobowamu a Baisilayeli bakapilukila kumwami Lehobowamu mbubonya mbuli mbwaakabambilide. 13Pele walo wakazoobaingula cabukali. Taakwe naakatobela malailile aakamupa bamanene pe. 14Wakabaambila zyakamulailila bamusela wakwe zyakuti, “Kuti naa mukuli wataata wakamulemena, wangu uyoomuminya. Taata wakali kumuumya miluso, pele mebo ndiyoomukwabbauzya zimboko!” 15Kukaka ooku nkwaakacita kwakalibambidwe a Leza, mukuzuzikizya nzyakaambide kuli Jelobowamu kwiindila muli Ahija musinsimi Musyiloni.
16Bantu nibakabona kuti mwami tabaswiilili, bakapozomoka bati, “Tujisi lubazi nzi muli Devedi? Tujisi caabilo nzi mumwanaa Jese? Amubweede kumaanda aanu no Baisilayeli. Ayebo ociinga ca Devedi libonene!” Mbombuboobu Baisilayeli mbubakazanga. 17Pele kwaamba zya Baisilayeli bakali kukkala kuminzi yaku Juda. Lehobowamu wakabalela.
18Mpawo mwami Lehobowamu wakatuma Adonilamu ooyo wakali kubelesya basicibbalo, pele Baisilayeli bakamuuma mabwe wafwa. Eeci nicakacitika, Lehobowamu wakafwambaana kunjila munkalaki yakwe akutijila ku Jelusalemu. 19Mbombuboobu Baisilayeli mbubakazangila ciinga ca Devedi kusikila sunu.
Currently Selected:
2 Makani 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
