Byubilo 5
5
Ananyasa ne Safila
1Bino kwajinga muntu umo jizhina janji Ananyasa, ne mukazhanji Safila, bapoteshe bujimi bwabo. 2Wafumishepo mali amo ne kwiafya byo apoteshe, ne mukazhanji naye kasa ayuka, bino mali amo wialetele ne kwiatula ku maulu a batumwa. 3Ponkapo Petelo wamwambijile amba, “Ananyasa, mambo ka Satana ayuzhizha muchima obe amba ubepe Mupashi Wazhila, ne kufyapo mali amo o wapotesha mushiji wobe? 4Kasa ukyangye kumupotesha, kechi wajinga wobe nenyi? Ne byo wapoteshe, kechi wajinga na luusa lwakuuba na mali obe monka mo usakila nenyi? Mambo ka owabikila kino kintu mu muchima wobe? Kechi wabepa bantu ne, wabepa Lesa.”
5Ponkapo Ananyasa pakumvwa byobyo byambo waponene panshi ne kufwa, ne moyo mukatampe wibakwachile bonsetu bekyumvwine. 6Ne bansongwalume baimene ne kumuvungavunga, bamutwajile na kumuzhiika.
7Kabiji pakupita kampe ma awala asatu, mukazhanji naye watwelele, kasa abula kuyuka akya kyaubiwe ne. 8Kabiji Petelo wamwambijile amba, “Mbulai kana ano o mali onse o mwapoteshe mushiji wenu nyi?”
Aye amba, “Ee, ibyo.”
9Byonkabyo Petelo wamwambijile amba, “Mwaumvwang'ena ka pamo ku mweseka Mupashi wa Nkambo? Tala, maulu a baji kuya nakazhiika mwata obe aji pa kibelo, bo basakukutwala ne obewa.” 10Ponkapotu waponene ku maulu anji, ne kufwa wafwile. Kabiji bansongwalume byo batwelele bamutaine wafwa, bamutwajile na kumuzhiika konka kobazhiikile mwata wanji. 11Ne moyo mukatampe wakwachile kipwilo kyonse ne bonse bebyumvwine bino bintu.
Biyukilo ne bya kukumya
12Pano biyukilo ne bya kukumya byavula byaubiwe ku maboko a batumwa mu bantu. Kabiji bonse baikele na muchima umo mu bukonde bwa Solomone. 13Bino kafwako bangi bachinchikile nangwa umo amba belamikeko kwi abo ne, kabiji bantu bebanemekele. 14Ne mabumba a baitabijile banabalume ne banabakazhi a nungilwengako kwi Nkambo. 15Onkao mambo balupwijilenga bakolwa mu mikwakwa, ne kwibalajika pa myanya ne pa bilaalo, amba Petelo pakupita kimvule kyanji kiiye kipite nangwa pa umo. 16Kabiji mabumba a bantu apwijile bafumine mu mizhi ya kubwipi na Yelusalema, baleetelenga bakolwa, ne bo bamanyikile ku bapashi babipa, ne bonsetu babukilwe.
Batumwa byo bamanyikilwe
17Bino ng'anga mukatampe waimene, ne bonse bo ajinga naabo, kyo kipamo kya Basadusea, kabiji bebobijile bingi kichima. 18Ne abo bebakwachile batumwa, ne kwibabika mu kaleya ka bonsetu. 19Bino kimye kya bufuku malaika wa Nkambo washinkwile binzhilo bya kaleya, wibalupwilemo, ne kwibakambizha amba, 20“Yainga, mukemane mu nzubo ya Lesa mukebambile bantu byambo byonse bya buno bumi.” 21Ne byo ba umvwine bino, batwelele mu nzubo ya Lesa pakusama juba, ne kufunjisha.
Ponkapo ng'anga mukatampe ne bo ajinga naabo bepwizhizhe pamo bena kije, ne bonse bakulumpe bene ba bena Isalela ne kutuma jiwi ku kaleya amba bakebalete. 22Pakuba bakalama byo bafikile bataine bafwamo mu kaleya, kepo babwelele na kwibabula amba, 23“Kaleya twikataana monka bekashinkila, ne baota kasa baimana pa bibelo, bino pakushinkulamo, twataana bafwamo.” 24Ponkapo byo ba umvwine bino byambo mukulumpe wa bakalama ba ku nzubo ya Lesa ne bang'anga bakatampe bekikuminye bingi, amba kino kyayila muka? 25Ponkapo kwaishile umo ne kwibabula amba, “Talai! Aba bantu bomwabikile mu kaleya baji mu nzubo ya Lesa, baimana na kufunjisha bantu.” 26Ponkapo mukulumpe wa bakalama ne bakalama bayile na kwibaleeta, bino kwakubula kwibashintaukila ne, mambo bachiine bantu kwibaasa mabwe.
27Kabiji byo bebaleetele, bebabikile mukije, ponkapo ng'anga mukatampe wibepwizhe amba. 28#Mat 27:25 “Atweba twimukambiizhe bingi, namba kechi mufunjishenga mu jino jizhina ne. Ke ibyo nyi? Kabiji anweba mwakumbanya Yelusalema na mafunjisho enu, ne kusaka mwasaka kwitushinkamika mashi a ye uno muntu.”
29Kumvwa Petelo ne batumwa bakwabo amba, “Atweba twafwainwa kukookela Lesa kukila bantu. 30Aye Lesa wa bashakulu betu wamusangwile Yesu, ye mwaipayile anweba, byo mwamukobekele ku kichi. 31Aye uno yenka, Lesa wamutumbijikile ku kuboko kwanji kwa kilujo amba, ekale Ntangi ne Mupulushi, ebape bena Isalela lulapilo ne lulekelo lwa mambo. 32Ne atweba twi batumonyi ba byo bino byambo, ne Mupashi Wazhila naye pamo, ye apana Lesa ku bamukokela.”
33Kabiji abo, pakumvwa bino, bibazhingijishe bingi, ke basake kwibepaya. 34Pakuba umo Mufaliseo mukije jizhina janji Ngamaliela, mufunjishi wa Mizhilo kabiji washing'ama mu bantu bonse, wakambiizhe amba. Aki balupulaimo kakimye kacheche. 35Ne aye wibambijile amba. “Anweba bena Isalela, tekanyai nakyo musaka kwiboba bano bantu. 36Mambo kala kwaimene Teusadasa, witelele mwine amba ye mwine, kabiji kwaishile bantu bamo kampe bitota bina, bamwipayile ne bonse mo bavujile bamulondejilenga, bebapalang'enye kabiji kechi kwashajile nangwa umo ne. 37Kabiji palutwe, mukwabo naye waimene Yudasa mwina Ngalilea mu moba a kunembesha mazhina, ne aye waongwele bamo ne kumulondela bamulondejile, bino ne aye naye waipayiwe, ne bonse bamukookejile, bebapalang'enye. 38Byonkabyo ne pano nemwambila namba, balekai bano bantu ne kwibaleka bunke bwabo! Mambo inge ano maana ne uno mwingilo byo bya bantu bikazhimang'anatu, 39bino inge bya Lesa, kechi mukakonsha kwibashinda ne. Kuchiina amba mwakekala ke ba kulwa na Lesa.”
40Kabiji ne abo bamumvwine. Kabiji byo bebechile batumwa, bebapumine ne kwibakambizha amba, Kechi mukambe mu jizhina ja Yesu ne, ne kwibaleka bebalekele ke baye. 41Byonkabyo bafumine mukije kasa basekela na mambo a kutongolwa amba, bo bafwainwa kwijimwena bumvu jizhina ja Yesu. 42Ne moba onsetu mu nzubo ya Lesa ne kwabo, kechi balekele kufunjisha ne kusapwila Mambo Awama a Yesu amba ye Kilishitu ne.
Currently Selected:
Byubilo 5: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
Byubilo 5
5
Ananyasa ne Safila
1Bino kwajinga muntu umo jizhina janji Ananyasa, ne mukazhanji Safila, bapoteshe bujimi bwabo. 2Wafumishepo mali amo ne kwiafya byo apoteshe, ne mukazhanji naye kasa ayuka, bino mali amo wialetele ne kwiatula ku maulu a batumwa. 3Ponkapo Petelo wamwambijile amba, “Ananyasa, mambo ka Satana ayuzhizha muchima obe amba ubepe Mupashi Wazhila, ne kufyapo mali amo o wapotesha mushiji wobe? 4Kasa ukyangye kumupotesha, kechi wajinga wobe nenyi? Ne byo wapoteshe, kechi wajinga na luusa lwakuuba na mali obe monka mo usakila nenyi? Mambo ka owabikila kino kintu mu muchima wobe? Kechi wabepa bantu ne, wabepa Lesa.”
5Ponkapo Ananyasa pakumvwa byobyo byambo waponene panshi ne kufwa, ne moyo mukatampe wibakwachile bonsetu bekyumvwine. 6Ne bansongwalume baimene ne kumuvungavunga, bamutwajile na kumuzhiika.
7Kabiji pakupita kampe ma awala asatu, mukazhanji naye watwelele, kasa abula kuyuka akya kyaubiwe ne. 8Kabiji Petelo wamwambijile amba, “Mbulai kana ano o mali onse o mwapoteshe mushiji wenu nyi?”
Aye amba, “Ee, ibyo.”
9Byonkabyo Petelo wamwambijile amba, “Mwaumvwang'ena ka pamo ku mweseka Mupashi wa Nkambo? Tala, maulu a baji kuya nakazhiika mwata obe aji pa kibelo, bo basakukutwala ne obewa.” 10Ponkapotu waponene ku maulu anji, ne kufwa wafwile. Kabiji bansongwalume byo batwelele bamutaine wafwa, bamutwajile na kumuzhiika konka kobazhiikile mwata wanji. 11Ne moyo mukatampe wakwachile kipwilo kyonse ne bonse bebyumvwine bino bintu.
Biyukilo ne bya kukumya
12Pano biyukilo ne bya kukumya byavula byaubiwe ku maboko a batumwa mu bantu. Kabiji bonse baikele na muchima umo mu bukonde bwa Solomone. 13Bino kafwako bangi bachinchikile nangwa umo amba belamikeko kwi abo ne, kabiji bantu bebanemekele. 14Ne mabumba a baitabijile banabalume ne banabakazhi a nungilwengako kwi Nkambo. 15Onkao mambo balupwijilenga bakolwa mu mikwakwa, ne kwibalajika pa myanya ne pa bilaalo, amba Petelo pakupita kimvule kyanji kiiye kipite nangwa pa umo. 16Kabiji mabumba a bantu apwijile bafumine mu mizhi ya kubwipi na Yelusalema, baleetelenga bakolwa, ne bo bamanyikile ku bapashi babipa, ne bonsetu babukilwe.
Batumwa byo bamanyikilwe
17Bino ng'anga mukatampe waimene, ne bonse bo ajinga naabo, kyo kipamo kya Basadusea, kabiji bebobijile bingi kichima. 18Ne abo bebakwachile batumwa, ne kwibabika mu kaleya ka bonsetu. 19Bino kimye kya bufuku malaika wa Nkambo washinkwile binzhilo bya kaleya, wibalupwilemo, ne kwibakambizha amba, 20“Yainga, mukemane mu nzubo ya Lesa mukebambile bantu byambo byonse bya buno bumi.” 21Ne byo ba umvwine bino, batwelele mu nzubo ya Lesa pakusama juba, ne kufunjisha.
Ponkapo ng'anga mukatampe ne bo ajinga naabo bepwizhizhe pamo bena kije, ne bonse bakulumpe bene ba bena Isalela ne kutuma jiwi ku kaleya amba bakebalete. 22Pakuba bakalama byo bafikile bataine bafwamo mu kaleya, kepo babwelele na kwibabula amba, 23“Kaleya twikataana monka bekashinkila, ne baota kasa baimana pa bibelo, bino pakushinkulamo, twataana bafwamo.” 24Ponkapo byo ba umvwine bino byambo mukulumpe wa bakalama ba ku nzubo ya Lesa ne bang'anga bakatampe bekikuminye bingi, amba kino kyayila muka? 25Ponkapo kwaishile umo ne kwibabula amba, “Talai! Aba bantu bomwabikile mu kaleya baji mu nzubo ya Lesa, baimana na kufunjisha bantu.” 26Ponkapo mukulumpe wa bakalama ne bakalama bayile na kwibaleeta, bino kwakubula kwibashintaukila ne, mambo bachiine bantu kwibaasa mabwe.
27Kabiji byo bebaleetele, bebabikile mukije, ponkapo ng'anga mukatampe wibepwizhe amba. 28#Mat 27:25 “Atweba twimukambiizhe bingi, namba kechi mufunjishenga mu jino jizhina ne. Ke ibyo nyi? Kabiji anweba mwakumbanya Yelusalema na mafunjisho enu, ne kusaka mwasaka kwitushinkamika mashi a ye uno muntu.”
29Kumvwa Petelo ne batumwa bakwabo amba, “Atweba twafwainwa kukookela Lesa kukila bantu. 30Aye Lesa wa bashakulu betu wamusangwile Yesu, ye mwaipayile anweba, byo mwamukobekele ku kichi. 31Aye uno yenka, Lesa wamutumbijikile ku kuboko kwanji kwa kilujo amba, ekale Ntangi ne Mupulushi, ebape bena Isalela lulapilo ne lulekelo lwa mambo. 32Ne atweba twi batumonyi ba byo bino byambo, ne Mupashi Wazhila naye pamo, ye apana Lesa ku bamukokela.”
33Kabiji abo, pakumvwa bino, bibazhingijishe bingi, ke basake kwibepaya. 34Pakuba umo Mufaliseo mukije jizhina janji Ngamaliela, mufunjishi wa Mizhilo kabiji washing'ama mu bantu bonse, wakambiizhe amba. Aki balupulaimo kakimye kacheche. 35Ne aye wibambijile amba. “Anweba bena Isalela, tekanyai nakyo musaka kwiboba bano bantu. 36Mambo kala kwaimene Teusadasa, witelele mwine amba ye mwine, kabiji kwaishile bantu bamo kampe bitota bina, bamwipayile ne bonse mo bavujile bamulondejilenga, bebapalang'enye kabiji kechi kwashajile nangwa umo ne. 37Kabiji palutwe, mukwabo naye waimene Yudasa mwina Ngalilea mu moba a kunembesha mazhina, ne aye waongwele bamo ne kumulondela bamulondejile, bino ne aye naye waipayiwe, ne bonse bamukookejile, bebapalang'enye. 38Byonkabyo ne pano nemwambila namba, balekai bano bantu ne kwibaleka bunke bwabo! Mambo inge ano maana ne uno mwingilo byo bya bantu bikazhimang'anatu, 39bino inge bya Lesa, kechi mukakonsha kwibashinda ne. Kuchiina amba mwakekala ke ba kulwa na Lesa.”
40Kabiji ne abo bamumvwine. Kabiji byo bebechile batumwa, bebapumine ne kwibakambizha amba, Kechi mukambe mu jizhina ja Yesu ne, ne kwibaleka bebalekele ke baye. 41Byonkabyo bafumine mukije kasa basekela na mambo a kutongolwa amba, bo bafwainwa kwijimwena bumvu jizhina ja Yesu. 42Ne moba onsetu mu nzubo ya Lesa ne kwabo, kechi balekele kufunjisha ne kusapwila Mambo Awama a Yesu amba ye Kilishitu ne.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.