Bɔ-Koe-Iyipiti 30
30
Isɛnti Mintan Tinɛ Ladan-Nya
(Bɔ-Koe-Iyipiti 37.25-28)
1“Wo ni isɛnti mintan tinɛ ladan kɔlɔma do la min tɔgɛ akasiya. 2Isɛnti mintan tinɛ sɔɛ ni ma nunkan-nya fila la. A yanyɛ ni ma nunkan-nya kelen na. A kɔnɛ ni ma nunkan-nya kelen na. A tɔnkɔn nanɛ ra ni kɛnya bɛrɛtɛ! Wo ni a bolon nani ladan a tonko nanɛ rɔ. Isɛnti mintan tinɛ wonubɛ a bolɔnnu na ni dan nya-kun-kelen. 3Wo ni sɛnɛ sa kan tinɛ bɛɛ ma, a kumɛ anubɛ a bolon nanɛ anubɛ a tɔnkɔn nanɛ ma. Wo ni sɛnɛ-mɔlɔnɛ do ladan ka a sa a da-gbengbe ma. 4Wo ni sɛnɛ bolo-kalama-dɛɛn fila ladan ka anu sɔ a da-gbengbe kɔrɔ. Kelen si to a tɔnkɔn kelan rɔ, kelen doi si to a tɔnkɔn doi rɔ. Wonu si ma a bi-kɔlɔmanu don tinɛnu na. 5Wo ni akasiya kɔlɔmanu nadan ka wonu ma a bi-kɔlɔmanu na ka sɛnɛ sa wonu ma. 6Wo ni isɛnti mintan tinɛ sigi Kan-Tina-Sɛnimɛ rɔ. Yorolan si taran anubɛ tɔn-kenkirɛ tɛma.
7“Aruna ni isɛnti mintan a mintan tinɛ kuma. A tenbi lɛnpu ladufenna sɔgɔma, a ni isɛnti mintan wo wati rɔ. 8A tenbi lɛnpu lamalanna wurɛ la, a ni isɛnti mintan tun, woletɔ isɛnti si mintan sɔgɔma ani wurɛ la nde, Mari ye ha tumɛ min di nde, Alla ye. 9Wo kana isɛnti-dogbɛrɛ mintan nyɔ. Wo kana saraka-mintantɛ mintan nyɔ, ni wo ma, bu-munke-sarakɛ. Wo kana minni-sarakɛ fanan kɛ nyɔ kuma. 10San-bo-san, Aruna ni hakɛ-yamatogon-saraka-yele sisa isɛnti mintan tinɛ bolɔnnu ma alako isɛnti mintan tinɛ si sɛninya nya min. San-bo-san, saraka-masɔla-wɛ si to kɛ mala a siyi-tele-bɛɛ kɔrɔ. Fɔ isɛnti mintan tinɛ, wo ni to sɛninyɛ rɔ nde, Mari ye feu!”
Niyi Kunka-Fan
11Mari ya a fɔ Musa ye ko, 12“I wa Isirɛla mɔgɛ keimɛnu tɔgɛ sɛbɛ tumɛ min, anu kelen-kelennamɛ-bɛɛ ni anu niyi-kunka-fan di nde, Mari ma, alako kiraya-fitinɛ kana don anu tɛma. 13#Bɔ-Koe-Iyipiti 38.25-26; Matiyu 17.24 Wo ye minnu mala wo niyi-kunka-fan la, wo le kɛnu na. Wo ni wodi-gbɛ wo mɔlɔn tɛgɛ a kilɛ fɛ iko a di nde, Mari ye nya min. Mɔgɛ bɛɛ ni wodi-gbɛ kɛ bɔ minna gbiliyɛ manɛ iko wodi-mɛlɛn kelan. 14Ka a bi minnu sɔrɔn ara san mogan bɔ ha ka yɛlɛ, wo bɛɛsi ni anu niyi-kunka-fan kɛ labɔ. 15Anu tenbi anu niyi-kunka-fan labɔla tumɛ min, i kana a banbɛ makele nɔnfulu-tiginu bolo. Wo kana a dɔgɔmɛ makele bolo-kolɔnnu bolo. Anu damasi niyi kelen. 16Ile Musa ni wodi-gbɛ wo bira Isirɛla mɔgɛnu bolo ka a ma nde, Allata Fani-Bɔn mabɛn-fan la. Wo si ma wo hakɛ-yamatogon-fan la alako nde, Mari yili ni to wo ko.”
Yi-Sigi-Miran Wara-Koe
17Mari ya a fɔ Musa ye ko, 18#Bɔ-Koe-Iyipiti 38.8 “Wo ni yi-sigi-miran anubɛ a sigi-fan ladan silɛɛ la ku-kɛ-koela ko la. Wo ni a sigi nta Fani-Bɔn anubɛ saraka-mintan-tinɛ tɛma. Wo ni a lafa yi la. 19Yanni anu ni don nna Fani-Bɔn la, Aruna anubɛ ala den-keinu si to anu bolenu anubɛ anu kiannu makula yi wo la 20Yanni anu ni anu gbɛrɛn saraka-mintan-tinɛ ma tumɛ min, anu ni anu bolenu anubɛ anu kian maku yi wo la tun. 21Ni anu ma wo ma, anu si faga. Wo ni ma habadan-tɔn la Aruna anubɛ a kebila-mɔgɛnu ye.”
Dantɛgɛ-Tuli Wara-Koe
22 #
Bɔ-Koe-Iyipiti 37.29
Mari ya a fɔ Musa ye ko, 23“I ni fen-suma-diyamɛ do bi min tɔgɛ mira. Wo ni wo yi do bi minna gbiliyɛ si ma iko yi kalɔn kelan, anubɛ kɔn-gbolo-suma-diyamɛ min tɔgɛ sinamɔn minna gbiliyɛ manɛ iko yi kalɔn talɛ. Min sanɛ wo kuma, i ni faranya-kalɛ do bi minna gbiliyɛ fanan manɛ iko yi kalɔn talɛ, 24anubɛ bagɛ min tɔgɛ kɔsiya, i ni a fere-gbalɛ donu bi minna gbiliyɛ manɛ iko yi kalɔn kelan. Wo si a bɛɛ suma a kilɛ fɛ iko a di nde, Mari ye nya min. I ni ɔlifi-tuli kalɔn kelen bi ka a kɛ kɛ bɛɛsi kuma. 25I ni wo bɛɛsi yabasan ka a ma dantɛgɛ-tuli la. A ni ma iko sɛnti-sumɛ ye nya min. 26I ni tulu-sɛnimɛ wo doni sisa nna Fani-Bɔn anubɛ tɔn-kenkirɛ wo ma. 27I ni tuli do sisa tebulu anubɛ a fɛ-mirannu ma. I ni do sisa lɛnpu anubɛ a fɛ-mirannu ma. I ni do sisa isɛnti mintan tinɛ ma. 28I ni do sisa saraka-mintan-tinɛ anubɛ a fɛ-mirannu ma. I ni do sisa yi-sigi-miran anubɛ a sigi-fan ma fanani. 29I ni wonu di nde, Alla ma alako wonu si sɛninya nya min. Ni fenfen tugura miran kɛ do la, wo ara don nde, Alla bolo.
30“I ni tulu-sɛnimɛ wo do sisa Aruna anubɛ ala den-keinu ma ka anu dantɛgɛ nde, Alla ma alako anu ni nta saraka-masɔ-wɔlɛ kɛ. 31I ni a fɔ Isirɛla mɔgɛnu ye ko ka a bi anu denu ma ha ka a sigi anu kegeyɛnu na, tulu-sɛnimɛ kɛ ni ma fen dantɛgɛ-tuli la nde ma. 32Wo kana a kɛ mɔgɔ-gbɛrɛ ma saraka-masɔlɛ ma min na. Wo kana tulu-gbɛrɛkɛ ladan iko tulu-sɛnimɛ sufa kɛ ladanta nya min. Wo ni a gbiliya a kilɛ fɛ bawo tulu-sɛnimɛ le. 33Ni min ya tuli wo nyɔgɔn ladan wo, ni min ya a kɛ mɔgɔ-gbɛrɛkɛ ma saraka-masɔla ma min na wo, wo ni wo gben wo kurun tɔ.”
Isɛnti Ladan-Koe
34Mari ya a fɔ Musa ye ko, “I ni fen-suma-diyama nani bi, sitakate wo, ɔnikiya wo, kalibanan wo, anubɛ farankinsɛnsi-sɛnimɛ. Anu kelen-kelennamɛ-bɛɛsi suman-nya ra ni kɛnya. 35I ni wonu nakofu ka anu ma isɛnti la ka a yabasan iko wo si sɛnti yabasan nya min. Wo ni kɔgɛ kɛ a rɔ alako a ni sɛninya. 36Wo ni wo do bunden ka a munke wo sigi tɔn-kenkirɛ wo yarɔ nta Fani-Bɔn la. Wo ni a fɛ-bira iko fen-sɛnima-bɛrɛbɛrɛ. 37Wo kana isɛnti-gbɛrɛkɛ ladan iko isɛnti-sɛnimɛ sufa kɛ ladanta nya min. Ni min ya wo ma, wo ni wo gben wo kurun tɔ. Isɛnti-sɛnimɛ le kɛ la min kɛ, wo ni a gbiliya a kilɛ fɛ. 38Ni mɔgɔ-wo-mɔgɔ ya isɛnti sufa kɛ ladan a nyɛrɛ ye ka a nyɛrɛ diya wo la, wo ni wo gben wo kurun tɔ.”
Currently Selected:
Bɔ-Koe-Iyipiti 30: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
Bɔ-Koe-Iyipiti 30
30
Isɛnti Mintan Tinɛ Ladan-Nya
(Bɔ-Koe-Iyipiti 37.25-28)
1“Wo ni isɛnti mintan tinɛ ladan kɔlɔma do la min tɔgɛ akasiya. 2Isɛnti mintan tinɛ sɔɛ ni ma nunkan-nya fila la. A yanyɛ ni ma nunkan-nya kelen na. A kɔnɛ ni ma nunkan-nya kelen na. A tɔnkɔn nanɛ ra ni kɛnya bɛrɛtɛ! Wo ni a bolon nani ladan a tonko nanɛ rɔ. Isɛnti mintan tinɛ wonubɛ a bolɔnnu na ni dan nya-kun-kelen. 3Wo ni sɛnɛ sa kan tinɛ bɛɛ ma, a kumɛ anubɛ a bolon nanɛ anubɛ a tɔnkɔn nanɛ ma. Wo ni sɛnɛ-mɔlɔnɛ do ladan ka a sa a da-gbengbe ma. 4Wo ni sɛnɛ bolo-kalama-dɛɛn fila ladan ka anu sɔ a da-gbengbe kɔrɔ. Kelen si to a tɔnkɔn kelan rɔ, kelen doi si to a tɔnkɔn doi rɔ. Wonu si ma a bi-kɔlɔmanu don tinɛnu na. 5Wo ni akasiya kɔlɔmanu nadan ka wonu ma a bi-kɔlɔmanu na ka sɛnɛ sa wonu ma. 6Wo ni isɛnti mintan tinɛ sigi Kan-Tina-Sɛnimɛ rɔ. Yorolan si taran anubɛ tɔn-kenkirɛ tɛma.
7“Aruna ni isɛnti mintan a mintan tinɛ kuma. A tenbi lɛnpu ladufenna sɔgɔma, a ni isɛnti mintan wo wati rɔ. 8A tenbi lɛnpu lamalanna wurɛ la, a ni isɛnti mintan tun, woletɔ isɛnti si mintan sɔgɔma ani wurɛ la nde, Mari ye ha tumɛ min di nde, Alla ye. 9Wo kana isɛnti-dogbɛrɛ mintan nyɔ. Wo kana saraka-mintantɛ mintan nyɔ, ni wo ma, bu-munke-sarakɛ. Wo kana minni-sarakɛ fanan kɛ nyɔ kuma. 10San-bo-san, Aruna ni hakɛ-yamatogon-saraka-yele sisa isɛnti mintan tinɛ bolɔnnu ma alako isɛnti mintan tinɛ si sɛninya nya min. San-bo-san, saraka-masɔla-wɛ si to kɛ mala a siyi-tele-bɛɛ kɔrɔ. Fɔ isɛnti mintan tinɛ, wo ni to sɛninyɛ rɔ nde, Mari ye feu!”
Niyi Kunka-Fan
11Mari ya a fɔ Musa ye ko, 12“I wa Isirɛla mɔgɛ keimɛnu tɔgɛ sɛbɛ tumɛ min, anu kelen-kelennamɛ-bɛɛ ni anu niyi-kunka-fan di nde, Mari ma, alako kiraya-fitinɛ kana don anu tɛma. 13#Bɔ-Koe-Iyipiti 38.25-26; Matiyu 17.24 Wo ye minnu mala wo niyi-kunka-fan la, wo le kɛnu na. Wo ni wodi-gbɛ wo mɔlɔn tɛgɛ a kilɛ fɛ iko a di nde, Mari ye nya min. Mɔgɛ bɛɛ ni wodi-gbɛ kɛ bɔ minna gbiliyɛ manɛ iko wodi-mɛlɛn kelan. 14Ka a bi minnu sɔrɔn ara san mogan bɔ ha ka yɛlɛ, wo bɛɛsi ni anu niyi-kunka-fan kɛ labɔ. 15Anu tenbi anu niyi-kunka-fan labɔla tumɛ min, i kana a banbɛ makele nɔnfulu-tiginu bolo. Wo kana a dɔgɔmɛ makele bolo-kolɔnnu bolo. Anu damasi niyi kelen. 16Ile Musa ni wodi-gbɛ wo bira Isirɛla mɔgɛnu bolo ka a ma nde, Allata Fani-Bɔn mabɛn-fan la. Wo si ma wo hakɛ-yamatogon-fan la alako nde, Mari yili ni to wo ko.”
Yi-Sigi-Miran Wara-Koe
17Mari ya a fɔ Musa ye ko, 18#Bɔ-Koe-Iyipiti 38.8 “Wo ni yi-sigi-miran anubɛ a sigi-fan ladan silɛɛ la ku-kɛ-koela ko la. Wo ni a sigi nta Fani-Bɔn anubɛ saraka-mintan-tinɛ tɛma. Wo ni a lafa yi la. 19Yanni anu ni don nna Fani-Bɔn la, Aruna anubɛ ala den-keinu si to anu bolenu anubɛ anu kiannu makula yi wo la 20Yanni anu ni anu gbɛrɛn saraka-mintan-tinɛ ma tumɛ min, anu ni anu bolenu anubɛ anu kian maku yi wo la tun. 21Ni anu ma wo ma, anu si faga. Wo ni ma habadan-tɔn la Aruna anubɛ a kebila-mɔgɛnu ye.”
Dantɛgɛ-Tuli Wara-Koe
22 #
Bɔ-Koe-Iyipiti 37.29
Mari ya a fɔ Musa ye ko, 23“I ni fen-suma-diyamɛ do bi min tɔgɛ mira. Wo ni wo yi do bi minna gbiliyɛ si ma iko yi kalɔn kelan, anubɛ kɔn-gbolo-suma-diyamɛ min tɔgɛ sinamɔn minna gbiliyɛ manɛ iko yi kalɔn talɛ. Min sanɛ wo kuma, i ni faranya-kalɛ do bi minna gbiliyɛ fanan manɛ iko yi kalɔn talɛ, 24anubɛ bagɛ min tɔgɛ kɔsiya, i ni a fere-gbalɛ donu bi minna gbiliyɛ manɛ iko yi kalɔn kelan. Wo si a bɛɛ suma a kilɛ fɛ iko a di nde, Mari ye nya min. I ni ɔlifi-tuli kalɔn kelen bi ka a kɛ kɛ bɛɛsi kuma. 25I ni wo bɛɛsi yabasan ka a ma dantɛgɛ-tuli la. A ni ma iko sɛnti-sumɛ ye nya min. 26I ni tulu-sɛnimɛ wo doni sisa nna Fani-Bɔn anubɛ tɔn-kenkirɛ wo ma. 27I ni tuli do sisa tebulu anubɛ a fɛ-mirannu ma. I ni do sisa lɛnpu anubɛ a fɛ-mirannu ma. I ni do sisa isɛnti mintan tinɛ ma. 28I ni do sisa saraka-mintan-tinɛ anubɛ a fɛ-mirannu ma. I ni do sisa yi-sigi-miran anubɛ a sigi-fan ma fanani. 29I ni wonu di nde, Alla ma alako wonu si sɛninya nya min. Ni fenfen tugura miran kɛ do la, wo ara don nde, Alla bolo.
30“I ni tulu-sɛnimɛ wo do sisa Aruna anubɛ ala den-keinu ma ka anu dantɛgɛ nde, Alla ma alako anu ni nta saraka-masɔ-wɔlɛ kɛ. 31I ni a fɔ Isirɛla mɔgɛnu ye ko ka a bi anu denu ma ha ka a sigi anu kegeyɛnu na, tulu-sɛnimɛ kɛ ni ma fen dantɛgɛ-tuli la nde ma. 32Wo kana a kɛ mɔgɔ-gbɛrɛ ma saraka-masɔlɛ ma min na. Wo kana tulu-gbɛrɛkɛ ladan iko tulu-sɛnimɛ sufa kɛ ladanta nya min. Wo ni a gbiliya a kilɛ fɛ bawo tulu-sɛnimɛ le. 33Ni min ya tuli wo nyɔgɔn ladan wo, ni min ya a kɛ mɔgɔ-gbɛrɛkɛ ma saraka-masɔla ma min na wo, wo ni wo gben wo kurun tɔ.”
Isɛnti Ladan-Koe
34Mari ya a fɔ Musa ye ko, “I ni fen-suma-diyama nani bi, sitakate wo, ɔnikiya wo, kalibanan wo, anubɛ farankinsɛnsi-sɛnimɛ. Anu kelen-kelennamɛ-bɛɛsi suman-nya ra ni kɛnya. 35I ni wonu nakofu ka anu ma isɛnti la ka a yabasan iko wo si sɛnti yabasan nya min. Wo ni kɔgɛ kɛ a rɔ alako a ni sɛninya. 36Wo ni wo do bunden ka a munke wo sigi tɔn-kenkirɛ wo yarɔ nta Fani-Bɔn la. Wo ni a fɛ-bira iko fen-sɛnima-bɛrɛbɛrɛ. 37Wo kana isɛnti-gbɛrɛkɛ ladan iko isɛnti-sɛnimɛ sufa kɛ ladanta nya min. Ni min ya wo ma, wo ni wo gben wo kurun tɔ. Isɛnti-sɛnimɛ le kɛ la min kɛ, wo ni a gbiliya a kilɛ fɛ. 38Ni mɔgɔ-wo-mɔgɔ ya isɛnti sufa kɛ ladan a nyɛrɛ ye ka a nyɛrɛ diya wo la, wo ni wo gben wo kurun tɔ.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.