MATAYO 13
13
Lukanu lu Mumitsi
(Mk 4:1-9; Luka 8:4-8)
1Khulitukhu lienelo, Yesu yarula munzu, natsia niyikhala khuluchinga lwa matsi. 2Vituma via vandu vikali vikhala himbi khuye. Yinjila mu liaro niyikhalamu, shituma shia vandu voosi nivasinjile khuluchinga lwi inyanza. 3Yesu yavavoolela vindu vinyishi khuvirila mu tsinganu, navoola: “Litukhu lindi, mumitsi yasimukha natsia khumitsa vukuutsa mu mulimi kwekwe. 4Lwa yali namitsanga, vukuutsa vulala vwakwa khunjila; manyonyi kitsa nikavuvootsa. 5Vukuutsa vundi vwakwa khu lwanda, ha lilova liali litititi; khandi vwameela vwangu shichila lilova shiliali linyishi tawe. 6Lwa mbasu kwakha kwasamba viraakwa vienevo, maniviniala shichila miili shichiali chiatsia hasi tawe. 7Vukuutsa vundi vwakwa mu mavwa, ma mavwa kameela nikavutsoma. 8Vukuutsa vundi vwakwa mulilova linuulu nuvwama tsi imu, vulala imia indala, vundi makhomi sita, khandi vundi nuvwama makhomi kavaka. 9Numuli na maroyi ku khuhulila, muhulishitsi.”
Shivune shiu Khurumishila Tsinganu
(Mk 4:10-12; Luka 8:9-10)
10Khulwa yako, veechi vatsia khu Yesu, nivamureeva, “Shichila shina ulomolomanga khu vandu khuvirila mu tsinganu?” 11Yesu yavachipa, “Munyi mwaheelwa vucheli vu khumanya makhuva khulondokhana khu vindu viaviswa mu Vwami vu mwikulu, navutswa vo shivaheelwa vucheli vwenovo tawe. 12Mundu uli ni shindu aliitsa khumeetwa, ave navio mu vunyishi; navutswa mundu uvula shindu shiosi, khali shiakanakananga ali nashio aliitsa khunuulwa. 13Nashio shivune shichilanga ninomoloma khuvo khuvirila mu tsinganu, shichila khali niiva valiitsa khuheenza valiitsa khuvula khulola; khandi niiva valiitsa khuhulishitsa, valiitsa khuvula khuhulila inoho khumanya. 14Khulwa yako, vuprofeti vwarula khu Muprofeti Isaya vwavoola makhuva khulondokhana khuvo: Nyasaye avoolanga,
‘Ni kilikali, valiitsa khuhulishitsa, navutswa valiitsa khukhaywa khumanya;
valiitsa khuheenza navutswa valiitsa khuvula khulola;
15shichila vwoongo vwavo vwalindala,
khandi maroyi kavo kayikala,
khandi vavekhula tsimoni tsiavo,
nikakhavele kario, tsimoni tsiavo tsiakhaloli,
maroyi kavo kakhahulili,
vwoongo vwavo vwakhamanyi,
vakhakalushi khwinzi,
khu vahonyinyi.’
16“Navutswa munyi, muli ni ikhaavi shichila mulolanga ni tsimoni tsienyu khandi muhulilanga na maroyi kenyu. 17Muvoolelanga kilikali ndi vaprofeti vanyishi nende vandu vi likhola liu vulunji vanyishi vikombanga muno khulola kamulolanga yaka, navutswa vakhaywa khukalola; khandi khuhulila kamuhulilanga yaka, navutswa shivakahulilakhu tawe.
Yesu Yivala Lukanu lu Mumitsi
(Mk 4:13-20; Luka 8:11-15)
18“Hulishitsi, khandi mweche shia lukanu lu mumitsi luvoolanga. 19Lwa mundu ahulilanga likhuva khulondokhana khu Vwami, khandi akorwa khumanya, Mutamanu Woyo yitsanga amunuula shiali ni shiaraakwa mu mwoyo kwekwe. Yuvu navwo vukuutsa vwamitswa khunjila. 20Vuukutsa vwakwa khu lwanda, navo vandu vahulilanga likhuva nivasangala vwangu. 21Navutswa likhaywangwa khwinjila mukari mu mioyo chiavo; khandi shivanyala khuhindila tawe. Lwa vanyolanga vutiinyu inoho vatambitswa shichila likhuva, vakhutsanga mwoyo vwangu. 22Vukuutsa vwakwa mu mavwa, navo vandu vahulilanga likhuva; navutswa khuheenda mwoyo shichila vulamu yuvu nende lienya liu khuva vahinda liononyinyanga likhuva; khandi shivanyala khwama matunda tawe. 23Vukuutsa vwamitswa mulilova lilahi, navo vandu vahulilanga likhuva khandi valimanya; vamanga matunda, valala mu vunyishi mumia, vandi makhomi sita, na vandi makhomi kavaka.”
Lukanu khu Mavanze
24Yesu yavavoolela lukanu lundi: “Vwami vu mwikulu vunyala khusasanyinywa khu mundu wamitsa vukuutsa vulahi mu mulimi kwekwe; 25navutswa lwa vandu voosi vali nivakonanga, mutsiku yitsa namitsa mavaanze mu inganu, niyilukha; 26khu, lwa viraakwa viameela niviama vukuutsa, khali mavaanze kalolekhamu khandi. 27Varumishi vu mwene mulimi vitsa nivamuvoolela, ‘Mwami, shiuwamitsa vukuutsa vulahi mu mulimi kwokwo? Shichila shina mavaanze kalimu?’ 28Yachipa, ‘Mutsiku neye wakhola kenako.’ Varumishi vamuvoolela, ‘Khu, wenyanga khutsi khurinyuli mavaanze?’ 29Navutswa yavachipa, ‘Shikali kario tawe; shichila numurinyuula mavaanze mulihilamu inganu. 30Leshi viosi inganu nende mavaanze vimeelele khulala khutukha mulichesa. Mumatukhu kukhuchesa niitsa khuvoolela vachesi: ranji muchese mavaanze mamukavohe halala mu vituma kasambwi; khandi muvunjelitsi inganu muchilere mu shiachi shianje.’ ”
Lukanu khu Lukutsa Luti Muno
(Mk 4:30-32; Luka 13:18-19)
31Yesu yavavoolela lukanu lundi: “Vwami vu mwikulu vuli khuli lukuutsa lutititi muno, lwa mundu yavukula namitsa mu mulimi kwekwe; 32nalwo nu lutititi muno khuvira vukuutsa vundi vwosi, navutswa nu lwakhameela nu lukali muno khuvira viraakwa vindi viosi. Lukwitsa musala, ma manyonyi kitsa, kumbakha vitsu viako mu tsisia tsiakwo.”
Lukanu khu Mamela
(Luka 13:20-21)
33Yesu yavavoolela khandi lukanu lundi: “Vwami vu mwikulu vuli khuli mamela ka mukhali yavukula natsukanyinya mutsilita makhomi kane tsiu vusi khutukha lwa shinokho shiosi shiavimba.”
Shivune Shiachila Yesu Nalomolomela Mutsinganu
(Mk 4:33-34)
34Yesu yavoolela vituma via vandu makhuva yaka koosi khuvirila mu tsinganu. Avulakhu shindu shiosi shia yalomoloma khuvo vuchila khurumishila tsinganu. 35Yesu yakhola kenako koosi khurweshitsa ku muprofeti yali niyavoola,
“Niitsa khulomoloma khu munyi khuvirila mu tsinganu;
niitsa khuvavoolela shindu shiaviswa khurula shivala nishiloongwa.”
Mivaalo khu Lukanu lwa Mavaanze
36Yesu yalekha shituma shia vandu, niyinjila munzu; ma veechi veve nivatsia khuye nivavoola, “Khuvoolele ka lukanu khulondokhana khu mavaanze mu mulimi luvoolanga.”
37Yesu yavachipa, “Mundu wamitsa vukuutsa vulahi neye Mwana wu Mundu; 38mulimi navo vandu vu mu shivala; vukuutsa vulahi navo vandu vu mu Vwami; mavaanze navo vandu vu Mutamanu Woyo; 39khandi mutsiku wamitsa mavaanze neye Ibilisi; lichesa nalio shiheeli shi lilova; khandi vachesi navo tsinjelosi. 40Khuli mavaanze kavunjelitswangwa makasambwa mu mulilu, nindio khandi kaliitsa khukholekha mumatukhu ki shiheeli. 41Mwana wu Mundu aliitsa khuruma tsinjelosi tsietsie; na tsiliitsa khuvunjelitsa khurula mu Vwami vwevwe shia mundu wosi uchilanga vandi nivakhola vwoni; khandi yavo voosi vakholanga vindu vitamanu, 42mavasiuvwi mu mulilu mululu kwi lijiko; mwa vandu valiitsa khulila nu khwikhula. 43Vandu vi likhola liu vulunji valiitsa khwakha khuli liuva mu Vwami vwa Tata wavo. Numuli na maroyi ku khuhulila, muhulishitsi.
Lukanu khu Livishilu Liaviswa
44“Vwami vu mwikulu vuli khuli livishilu liaviswa mu mulimi, lia mundu yanyola manavisa; khandi shichila vuyaanzi vwali navwo atsitsanga akuulitsa vindu viosi viali navio makuula mulimi kwenoko.
Lukanu khu Lichina Lilahi liu Vukuuli Vululu
45“Vwami vu mwikulu vuli khandi khuli mundu wu kholanga vukhala akhavanga machina malahi ku vukuuli vululu, 46khandi niyakhakanyola atsitsanga akuulitsa vindu viosi viali navio, makuula machina malahi ku vukuuli vululu kenako.
Lukanu khu Ineti
47“Vwami vu mwikulu vuli khandi khuli ineti ya valuvi vasiuva mu inyanza khukumila tsisutsi lukanu na lukanu. 48Lwa ineti yeneyo yitsula tsisutsi, valuvi venavo vachisiuva khuluchinga, nivikhala hasi; khandi nivaraanga khutolamu tsisutsi tsindahi nivara mu misiko; navutswa nivasiuva tsindamanu. 49Khulwa yako, nindio khandi kaliitsa khwikholekha mumatukhu ki shiheeli. Tsinjelosi tsiliitsa khwitsa khura haluveka vandu vooni khurula mu valunji, 50nu khuvasiuva mu mulilu mululu kwi lijiko; mwa vandu valiitsa khulilila nu khwikhula.”
Mechitso Mayia nende Mechitso Makhulu
51Yesu yavareeva, “Munyala khuva muhulile tsinganu yitsi tsiosi?” Vamuchipa, “Khumali khutsihulila.” 52Yavavoolela, “Shia mwechitsi wosi wa Malako wechitswa makhuva khulondokhana khu Vwami vu mwikulu anyala khusasanyinywa khu mwene inzu urulitsanga mu livishilu lielie vindu viyia nende vikhulu.”
Yesu Yambakhanwa Nazareti
(Mk 6:1-6; Luka 4:16-30)
53Lwa Yesu yali namali khuvoola tsinganu tsienetso, yarula havundu henaho 54natsia mu litaala lili ingo wavo; yaveechitsa mu lisinagogi liavo; wa vandu vamuhulila nivali nilichenya, nivareeva, “Ni hena wa mundu uyu yanyola vusitsa nende tsingulu tsiu khukhola viloleshitsu yivi? 55Uyu shiali neye mwana wu mufundi? Mama wewe shiali Mariya? Vamwavo veve shivali navo Yakobo, Yosefu, Simoni nende Yuda? 56Vambotso veve shivali hanu na khutsi? Ni hena wa mundu uyu yanyola vindu yivi viosi?” 57Khulwa yako, vambakhana Yesu.
Yesu yavavoolela, “Muprofeti aheelwa luyali shia havundu hosi, navutswa shianyala khuheelwa luyali mu litaala liarulamu khandi mu vandu vi inzu yeye tawe.” 58Yalekha khukhola viloleshitsu vinyishi iweneyo, shichila vandu venavo vambakhana khusuuvila.
Currently Selected:
MATAYO 13: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
MATAYO 13
13
Lukanu lu Mumitsi
(Mk 4:1-9; Luka 8:4-8)
1Khulitukhu lienelo, Yesu yarula munzu, natsia niyikhala khuluchinga lwa matsi. 2Vituma via vandu vikali vikhala himbi khuye. Yinjila mu liaro niyikhalamu, shituma shia vandu voosi nivasinjile khuluchinga lwi inyanza. 3Yesu yavavoolela vindu vinyishi khuvirila mu tsinganu, navoola: “Litukhu lindi, mumitsi yasimukha natsia khumitsa vukuutsa mu mulimi kwekwe. 4Lwa yali namitsanga, vukuutsa vulala vwakwa khunjila; manyonyi kitsa nikavuvootsa. 5Vukuutsa vundi vwakwa khu lwanda, ha lilova liali litititi; khandi vwameela vwangu shichila lilova shiliali linyishi tawe. 6Lwa mbasu kwakha kwasamba viraakwa vienevo, maniviniala shichila miili shichiali chiatsia hasi tawe. 7Vukuutsa vundi vwakwa mu mavwa, ma mavwa kameela nikavutsoma. 8Vukuutsa vundi vwakwa mulilova linuulu nuvwama tsi imu, vulala imia indala, vundi makhomi sita, khandi vundi nuvwama makhomi kavaka. 9Numuli na maroyi ku khuhulila, muhulishitsi.”
Shivune shiu Khurumishila Tsinganu
(Mk 4:10-12; Luka 8:9-10)
10Khulwa yako, veechi vatsia khu Yesu, nivamureeva, “Shichila shina ulomolomanga khu vandu khuvirila mu tsinganu?” 11Yesu yavachipa, “Munyi mwaheelwa vucheli vu khumanya makhuva khulondokhana khu vindu viaviswa mu Vwami vu mwikulu, navutswa vo shivaheelwa vucheli vwenovo tawe. 12Mundu uli ni shindu aliitsa khumeetwa, ave navio mu vunyishi; navutswa mundu uvula shindu shiosi, khali shiakanakananga ali nashio aliitsa khunuulwa. 13Nashio shivune shichilanga ninomoloma khuvo khuvirila mu tsinganu, shichila khali niiva valiitsa khuheenza valiitsa khuvula khulola; khandi niiva valiitsa khuhulishitsa, valiitsa khuvula khuhulila inoho khumanya. 14Khulwa yako, vuprofeti vwarula khu Muprofeti Isaya vwavoola makhuva khulondokhana khuvo: Nyasaye avoolanga,
‘Ni kilikali, valiitsa khuhulishitsa, navutswa valiitsa khukhaywa khumanya;
valiitsa khuheenza navutswa valiitsa khuvula khulola;
15shichila vwoongo vwavo vwalindala,
khandi maroyi kavo kayikala,
khandi vavekhula tsimoni tsiavo,
nikakhavele kario, tsimoni tsiavo tsiakhaloli,
maroyi kavo kakhahulili,
vwoongo vwavo vwakhamanyi,
vakhakalushi khwinzi,
khu vahonyinyi.’
16“Navutswa munyi, muli ni ikhaavi shichila mulolanga ni tsimoni tsienyu khandi muhulilanga na maroyi kenyu. 17Muvoolelanga kilikali ndi vaprofeti vanyishi nende vandu vi likhola liu vulunji vanyishi vikombanga muno khulola kamulolanga yaka, navutswa vakhaywa khukalola; khandi khuhulila kamuhulilanga yaka, navutswa shivakahulilakhu tawe.
Yesu Yivala Lukanu lu Mumitsi
(Mk 4:13-20; Luka 8:11-15)
18“Hulishitsi, khandi mweche shia lukanu lu mumitsi luvoolanga. 19Lwa mundu ahulilanga likhuva khulondokhana khu Vwami, khandi akorwa khumanya, Mutamanu Woyo yitsanga amunuula shiali ni shiaraakwa mu mwoyo kwekwe. Yuvu navwo vukuutsa vwamitswa khunjila. 20Vuukutsa vwakwa khu lwanda, navo vandu vahulilanga likhuva nivasangala vwangu. 21Navutswa likhaywangwa khwinjila mukari mu mioyo chiavo; khandi shivanyala khuhindila tawe. Lwa vanyolanga vutiinyu inoho vatambitswa shichila likhuva, vakhutsanga mwoyo vwangu. 22Vukuutsa vwakwa mu mavwa, navo vandu vahulilanga likhuva; navutswa khuheenda mwoyo shichila vulamu yuvu nende lienya liu khuva vahinda liononyinyanga likhuva; khandi shivanyala khwama matunda tawe. 23Vukuutsa vwamitswa mulilova lilahi, navo vandu vahulilanga likhuva khandi valimanya; vamanga matunda, valala mu vunyishi mumia, vandi makhomi sita, na vandi makhomi kavaka.”
Lukanu khu Mavanze
24Yesu yavavoolela lukanu lundi: “Vwami vu mwikulu vunyala khusasanyinywa khu mundu wamitsa vukuutsa vulahi mu mulimi kwekwe; 25navutswa lwa vandu voosi vali nivakonanga, mutsiku yitsa namitsa mavaanze mu inganu, niyilukha; 26khu, lwa viraakwa viameela niviama vukuutsa, khali mavaanze kalolekhamu khandi. 27Varumishi vu mwene mulimi vitsa nivamuvoolela, ‘Mwami, shiuwamitsa vukuutsa vulahi mu mulimi kwokwo? Shichila shina mavaanze kalimu?’ 28Yachipa, ‘Mutsiku neye wakhola kenako.’ Varumishi vamuvoolela, ‘Khu, wenyanga khutsi khurinyuli mavaanze?’ 29Navutswa yavachipa, ‘Shikali kario tawe; shichila numurinyuula mavaanze mulihilamu inganu. 30Leshi viosi inganu nende mavaanze vimeelele khulala khutukha mulichesa. Mumatukhu kukhuchesa niitsa khuvoolela vachesi: ranji muchese mavaanze mamukavohe halala mu vituma kasambwi; khandi muvunjelitsi inganu muchilere mu shiachi shianje.’ ”
Lukanu khu Lukutsa Luti Muno
(Mk 4:30-32; Luka 13:18-19)
31Yesu yavavoolela lukanu lundi: “Vwami vu mwikulu vuli khuli lukuutsa lutititi muno, lwa mundu yavukula namitsa mu mulimi kwekwe; 32nalwo nu lutititi muno khuvira vukuutsa vundi vwosi, navutswa nu lwakhameela nu lukali muno khuvira viraakwa vindi viosi. Lukwitsa musala, ma manyonyi kitsa, kumbakha vitsu viako mu tsisia tsiakwo.”
Lukanu khu Mamela
(Luka 13:20-21)
33Yesu yavavoolela khandi lukanu lundi: “Vwami vu mwikulu vuli khuli mamela ka mukhali yavukula natsukanyinya mutsilita makhomi kane tsiu vusi khutukha lwa shinokho shiosi shiavimba.”
Shivune Shiachila Yesu Nalomolomela Mutsinganu
(Mk 4:33-34)
34Yesu yavoolela vituma via vandu makhuva yaka koosi khuvirila mu tsinganu. Avulakhu shindu shiosi shia yalomoloma khuvo vuchila khurumishila tsinganu. 35Yesu yakhola kenako koosi khurweshitsa ku muprofeti yali niyavoola,
“Niitsa khulomoloma khu munyi khuvirila mu tsinganu;
niitsa khuvavoolela shindu shiaviswa khurula shivala nishiloongwa.”
Mivaalo khu Lukanu lwa Mavaanze
36Yesu yalekha shituma shia vandu, niyinjila munzu; ma veechi veve nivatsia khuye nivavoola, “Khuvoolele ka lukanu khulondokhana khu mavaanze mu mulimi luvoolanga.”
37Yesu yavachipa, “Mundu wamitsa vukuutsa vulahi neye Mwana wu Mundu; 38mulimi navo vandu vu mu shivala; vukuutsa vulahi navo vandu vu mu Vwami; mavaanze navo vandu vu Mutamanu Woyo; 39khandi mutsiku wamitsa mavaanze neye Ibilisi; lichesa nalio shiheeli shi lilova; khandi vachesi navo tsinjelosi. 40Khuli mavaanze kavunjelitswangwa makasambwa mu mulilu, nindio khandi kaliitsa khukholekha mumatukhu ki shiheeli. 41Mwana wu Mundu aliitsa khuruma tsinjelosi tsietsie; na tsiliitsa khuvunjelitsa khurula mu Vwami vwevwe shia mundu wosi uchilanga vandi nivakhola vwoni; khandi yavo voosi vakholanga vindu vitamanu, 42mavasiuvwi mu mulilu mululu kwi lijiko; mwa vandu valiitsa khulila nu khwikhula. 43Vandu vi likhola liu vulunji valiitsa khwakha khuli liuva mu Vwami vwa Tata wavo. Numuli na maroyi ku khuhulila, muhulishitsi.
Lukanu khu Livishilu Liaviswa
44“Vwami vu mwikulu vuli khuli livishilu liaviswa mu mulimi, lia mundu yanyola manavisa; khandi shichila vuyaanzi vwali navwo atsitsanga akuulitsa vindu viosi viali navio makuula mulimi kwenoko.
Lukanu khu Lichina Lilahi liu Vukuuli Vululu
45“Vwami vu mwikulu vuli khandi khuli mundu wu kholanga vukhala akhavanga machina malahi ku vukuuli vululu, 46khandi niyakhakanyola atsitsanga akuulitsa vindu viosi viali navio, makuula machina malahi ku vukuuli vululu kenako.
Lukanu khu Ineti
47“Vwami vu mwikulu vuli khandi khuli ineti ya valuvi vasiuva mu inyanza khukumila tsisutsi lukanu na lukanu. 48Lwa ineti yeneyo yitsula tsisutsi, valuvi venavo vachisiuva khuluchinga, nivikhala hasi; khandi nivaraanga khutolamu tsisutsi tsindahi nivara mu misiko; navutswa nivasiuva tsindamanu. 49Khulwa yako, nindio khandi kaliitsa khwikholekha mumatukhu ki shiheeli. Tsinjelosi tsiliitsa khwitsa khura haluveka vandu vooni khurula mu valunji, 50nu khuvasiuva mu mulilu mululu kwi lijiko; mwa vandu valiitsa khulilila nu khwikhula.”
Mechitso Mayia nende Mechitso Makhulu
51Yesu yavareeva, “Munyala khuva muhulile tsinganu yitsi tsiosi?” Vamuchipa, “Khumali khutsihulila.” 52Yavavoolela, “Shia mwechitsi wosi wa Malako wechitswa makhuva khulondokhana khu Vwami vu mwikulu anyala khusasanyinywa khu mwene inzu urulitsanga mu livishilu lielie vindu viyia nende vikhulu.”
Yesu Yambakhanwa Nazareti
(Mk 6:1-6; Luka 4:16-30)
53Lwa Yesu yali namali khuvoola tsinganu tsienetso, yarula havundu henaho 54natsia mu litaala lili ingo wavo; yaveechitsa mu lisinagogi liavo; wa vandu vamuhulila nivali nilichenya, nivareeva, “Ni hena wa mundu uyu yanyola vusitsa nende tsingulu tsiu khukhola viloleshitsu yivi? 55Uyu shiali neye mwana wu mufundi? Mama wewe shiali Mariya? Vamwavo veve shivali navo Yakobo, Yosefu, Simoni nende Yuda? 56Vambotso veve shivali hanu na khutsi? Ni hena wa mundu uyu yanyola vindu yivi viosi?” 57Khulwa yako, vambakhana Yesu.
Yesu yavavoolela, “Muprofeti aheelwa luyali shia havundu hosi, navutswa shianyala khuheelwa luyali mu litaala liarulamu khandi mu vandu vi inzu yeye tawe.” 58Yalekha khukhola viloleshitsu vinyishi iweneyo, shichila vandu venavo vambakhana khusuuvila.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013