TITO 3
3
Mwiima ku Mukristayo Alalonda
1Yitsushitsa vandu vovo vave vichehitsi khu vamihi nende vu vunyali, valonde malako kavo, nu khwirechekha munjila yosi khukhola malahi. 2Vavoolele vavuli khulomolomakhu shindu shitamanu khulondokhana khu mundu; navutswa vamenye mu milembe khandi mu vulina. Shia khase khosi valolele vandi mwoyo ku vuseletse ku vuhoma. 3Khali khutsi vene khale, khwali vandu vayiingwa, nu khwambakhana khulonda malako, nu khukhola vindu vitamanu. Khwali khuli varukwa vu khwikomba nu khuyaanzilila khukhola shia shindu shiosi lukanu na lukanu. Khwali khwakorela mu vindu vitamanu, khandi mu imbotokha; vandu valala vali vakhuhima, khali khutsi nu khuvahima khandi. 4Navutswa lwa vulahi nende vuyaanzi vurulanga khu Nyasaye uli Muhonyinyi weru vwamanyinywa, 5yakhuhonyinya. Shikanyala khuva yakhuhonyinya khulondokhana khu vikholwa vilahi, via khwali nukhukholi tawe; navutswa shichila tsimbavasi tsietsie mwene, tsiachila nakhuhonyinya, khuvirila mu Roho Mutakatifu, uchilanga nu khwivulwa vuyia, khandi nu khuva nu vulamu vuyia lwa akhwochitsanga. 6Nyasaye yakhutsushila Roho Mutakatifu mu vunyishi khuvirila mu Muhonyinyi weru Yesu Kristo, 7khu khuvirila mu tsimbavasi tsietsie, khukholwi khuva valunji imbeli wewe khandi khunyole vulamu vwi mihika ni mihika, vwa khulindililanga mu lisuuvilitswa. 8Livoola yili ni liatoto.
Nakhayaanzi utsililile khuvavoolela makhuva khulondokhana khu vindu yivi, khu yavo vasuuvila Nyasaye vave nu vucheli vu khukhola vikholwa vilahi. Vindu yivi ni vilahi, khandi vili nu vukhala khu vandu voosi. 9Navutswa ulekhane na mahangalitsani ku vusilo mulilomoloma, mira kahandikwa manyishi ka vakuuka, khulembana, khandi khukwana shichila Malako. Ni ku vusilo, khandi kavula vukhala vwosi, ni ki shikhaya. 10Chelihitsa mundu uleranga liavukhana hali khavili nikanyalikha, khandi uleshe khukhola naye shindu shiosi. 11Wamanya ndi mundu khuli mwenoyo wakoyana; khandi vwoni vwevwe vumanyinyanga ndi nu mundu mutamanu.
Mivaalo Kukhumalilikha
12Lwa niitsa khuruma khu yivi Aratema inoho Tukika, chelitsa khwitsa khundola mu litaala lia Nikapoli, shichila ndi ninganakani yu khumenyayo mumatukhu ku vushindu. 13Chelitsa khuli unyala ukhonye Zena, nali mundu wechela malako nende Apolo khu luchendo lwavo; khandi ulole ndi vali ni vindu viosi via venyanga. 14Khutukha vandu veru veeche khurumishila vwiyangu vwavo khukhola vikholwa vilahi, khulu khwinyolela vindu viu khuvakhonya mu limenya liavo. Vavuli khumenya limenya li shikhaya, livula vukhonyi vwosi.
15Vandu voosi vandi navo hanu, vamuheele milembe chiavo. Haana milembe chieru khu valina veru khuvirila mu lisuuvila.
Tsimbavasi tsia Nyasaye tsive na munyi voosi.
Currently Selected:
TITO 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013