TITO 2
2
Mechitso Katoto
1Navutswa yivi Tito, wechitsi vindu vilondokhananga na mechitso katoto. 2Voolela vasakhulu vahindila vavuli khuva vavirililu; vave vacheli, khandi vu khwilinda munjila indahi yene; vave ni lisuuvila liatoto, vuyaanzi nende likhutsila. 3Munjila indala yeneyo, voolela vandu vakhali vahindila vave nu mwiima mulahi, khuli kwa vakhali vamenyanga limenya litakatifu. Vavuli khuva ni tsimbemba inoho khutanda. Khutukha veechitsi vindu vilahi, 4khu veechitsi vakhali vavukha khuli vanyala khuyaanza vasatsa vavo nende vaana vavo, 5khwilinda munjila indahi yene khandi khuva vanihu; khandi vave vakhali valahi vu khulinda tsinzu tsiavo khandi vichehitsilanga vasatsa vavo; khu mundu avuli khulomolomakhu shindu shitamanu khulondokhana khu likhuva lirulanga khu Nyasaye.
6Munjila indala yeneyo, tinyilitsa vayayi vavukha vave vu khwilinda munjila indahi yene. 7Yivi mwene uve nu mwiima mulahi mu shia shindu shiosi, kwa vandu vanyala khulonda. Uve mundu watoto khandi muluvililu muliechitsa liolio. 8Lomoloma vindu vilahi viatoto vikhanyala khuchaywa, nikanyalikha vatsiku vovo valole tsisoni, shichila valiitsa khukhaywa khulomoloma vutamanu khulondokhana khu khutsi.
9Voolela varukwa vave vichehitsi khu varuchi vavo, nu khuvayaanzitsa mu shia shindu shiosi shia vakholanga. Vavuli khuva vandu vu khung'ong'olitsa varuchi vavo 10inoho khuvahuuvila. Navutswa vamanyinyi ndi shia khase khosi ni valahi khandi ni vasuuvilwa; khu valombe mechitso khulondokhana khu Nyasaye uli Muhonyinyi weru khwitsominywa mu shia shindu shiosi shia vakholanga.
11Nyasaye wamanyinya tsimbavasi tsietsie, khulu khuhonyinya vandu voosi. 12Tsimbavasi tsienetso, tsikhwivaalilanga ndi khulekhane ni limenya liu khuvula khuva vatakatifu nende likomba li vindu viu mu shivala shinu, makhumenye limenya liu khwilinda munjila indahi yene, liu khuva valunji mu likhola, khandi vatakatifu mu shivala shinu, 13lwa khulindililanga Litukhu liakasitswa lia khwasuuvilitswa, lwa vukhumi vwa Nyasaye weru wi tsingulu khandi vu Muhonyinyi Yesu Kristo vuliitsa khulolekha. 14Yesu Kristo yakhutsa shichila khutsi, khu khuhonyinya khurula mu vwoni vwosi, khandi khukhukhola khuve vandu vanihu veve wonyene, vali nu mwoyo ku khukhola malahi.
15Wenyekhanga khwechitsa vindu yivi, nu khurumishila vunyali vwovwo vwosi, lwa utinyilitsanga nukondeshela vandu vakhuhulilanga. Mundu akhakhuchayakhu tawe.
Currently Selected:
TITO 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013