YOSHWA 1
1
Ka Nyasaye Yavoolela Yoshwa
1Lwa Musa, wali murumishi wu Mwami Nyasaye yali niyakhutsa, Mwami Nyasaye yalomoloma nu mukhonyani wa Musa walaangwangwa Yoshwa, mwana wa Nuni. 2Mwami Nyasaye yamuvoolela, “Murumishi wanje Musa wakhutsa. Ruli nunundi, yivi nende vandu voosi mutsi khwambukha Muchela kwa Yorodani, nu khwinjila mu shivala shia nzitsanga khumuha munyi Vaisraeli. 3Shia havundu hosi ha muliitsa khuseena ni vilenje vienyu, naho ha niitsa khumuha khuva henyu, khuli nali ninalaaka Musa nakhola. 4Lusomo lwenyu luliitsa khuraanjila mu shiangalangwi khuluveka luli ikuvanda khutukha mu vikulu via Lebanoni khuluveka luli ivuluka; khandi khuraanjila khu Muchela kwa Efurate, khuvirila mu shivala shia Vaahitse khutukha khu Inyanza ya Meditarenia khuluveka luli imbo. 5Yoshwa, mundu avulakhuho, uliitsa khwitsa khukhukwana mumatukhu koosi ka uliitsa khuva nushili mwoyo. Nzitsanga khuva nivi, khuli nali na Musa. Niitsa khutsililila khuva nivi; shinyala khukhulekha inoho khukhwivilila tawe. 6Uve ni tsingulu nende ikholo indinyu, shichila utsitsanga khuchila vandu yava vamenye mu shivala, shia nali nisuuha niitsa khuha vakuuka vavo. 7Uve vutswa ni tsingulu nende ikholo indinyu; khandi uve mucheli mu likhola shia shindu shiosi khulondokhana khu malako koosi, ka murumishi wanje Musa yakhuha. Uvuli khuchayakhu likhuva liosi, inoho shindu shiosi mu malako kenako, nikanyalikha unyole likuura shia havundu hosi ha utsitsanga. 8Uchelitsi ulole ndi Shitabu shia Malako shisomwangwa shia khase khosi shia havundu hosi ha musaalilanga. Ushisome vulahi vwene mbasu nu vutukhu, khandi uchelitsi ulole ndi ulondanga shia shindu shiosi shiahandikwa mushio. Nalwo lwa uliitsa khuhindahala, khandi uliitsa khukuura. 9Witsushitse, mali khukhuvoolela ndi uve ni tsingulu khandi uve ni ikholo! Uvuli khuria inoho khukhutsa mwoyo, shichila inzi Mwami Nyasaye, uli Nyasaye wowo, niitsa khuva nivi shia havundu hosi ha uliitsa khutsia.”
Yoshwa Yavoolela Vandu ka Vakhola
10Nalwo lwa Yoshwa yavoolela vimilili 11vatsi khukhalakanyila havundu ha vandu vamenyanga mu maheemo, nivavoolela vandu, “Recheshitsi shiukhulia shienyu, shichila matukhu kavaka khurula nunundi, mutsitsanga khwambukha Muchela kwa Yorodani, khutsia khuvukula shivala shiu Mwami Nyasaye, uli Nyasaye wenyu amuheetsanga.”
12Yoshwa yavoolela vandu vi tsimbia tsia Rubeni nende Gadi, khandi inusu ya vandu vuluhia lwa Manaase, 13“Mwitsushitse khuli Musa, wali murumishi wu Mwami Nyasaye yamuvoolela ndi, Mwami Nyasaye, uli Nyasaye wenyu aliitsa khumuha vulindi vulahi, nu khumuha lusomo yulu. 14Vakhali venyu nende vaana venyu, halala ni miruku chienyu valiitsa khurikala mu shivala shia Musa yamuha, khuluveka luli ivukwi wu Muchela kwa Yorodani. Navutswa vasikali venyu, niviyavaale viuchi viu khukwanila, valiitsa khuraanga khwambukha khutsia khukhonya Vaisraeli veshie; 15khutukha lwa Mwami Nyasaye avalinda vulahi, khuli amulindanga; khandi lwa vamenya mu shivala shia ye mwene avaheetsanga. Lwa aliitsa khuva namali khukhola ndio, muliitsa khukalukha mumenye hanu mu shivala shienyu vene, lusomo lwa Musa, wali murumishi wu Mwami Nyasaye yamuha khuluveka luli ivukwi wu Muchela kwa Yorodani.”
16Vavoolela Yoshwa, “Khutsitsanga khukhola shia shindu shiosi, shia uvooli khukhole. Havundu hosi ha uliitsa khukhuruma, naho ha khuliitsa khutsia. 17Khuliitsa khulonda makhuva koko, khuli khwalondanga shia khase khosi makhuva ka Musa. Mwami Nyasaye, uli Nyasaye wowo ave nivi, khuli yali na Musa! 18Mundu uliitsa khuhinganyinya vunyali vwovwo, inoho khwambakhana khulonda makhuva koko ka umuvoolelanga alonde, aliitsa khwiirwa. Uve ni tsingulu nende ikholo indahi.”
Currently Selected:
YOSHWA 1: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013