ISAYA 26
26
Lwimbo lu Khwitsominya Mwami Nyasaye
1Khulitukhu lienelo, lwimbo yulu
nalwo lwa vandu valiitsa khwimba mu shivala shia Yuda:
Khuli ni litaala li tsingulu;
Nyasaye neye ukhulindanga na masisi nende tsimbinga!
2Mwalaminye vilivwa vi litaala likali,
vandu vuluhia lwi likhola liu vulunji,
lumenyanga shichila lisuuvila luvirile mushio.
3Nyasaye, nivi uchilanga vandu vaseletse nivamenya mu milembe;
mu milembe shichila vasuuvililanga mu yivi.
4Musuuvilile mu Mwami Nyasaye mihika ni mihika,
shichila neye uli lwanda lwi mihika ni mihika;
5shichila wachehitsa vandu vu vwiloli;
wapomolanyinya mataala ki tsingulu ka vamenyamu,
wayongovelitsa masisi kenako,
kakwa khuli malova.
6Vandu vakatuuvachilanga hasi nunundi,
vandu vatambitswangwa nende vamanani vakaseenelanga hasi.
7Ka vandu vi likhola liu vulunji vakholanga ni maangu;
Nyasaye wi likhola lilahi, nivi ukasitsanga ka vakholanga.
8Yivi Mwami Nyasaye, khwayaanza khulonda malako koko;
Khwikombanga mu mioyo chieru khuhaana vukhumi khu lira liolio.
9Inzi mwene khwikombanga nu mwoyo kwosi mu vutukhu,
Liiva lianje liosi likhukhavanga;
shichila lwa uliitsa khuva nukhalachilanga vandu khulilova,
nalwo lwa vandu vu mu shivala veekanga likhola liu vulunji.
10Khali niiva vandu vatamanu valakholelwa malahi,
vakhaywa khweka likhola liu vulunji;
khali vakholanga vindu vitamanu mu shivala shia vandu valahi vamenyamu
khandi valechelitsa vunyali vu Mwami Nyasaye.
11Yivi Mwami Nyasaye, wirecheshe khuvasalilitsa,
navutswa vayikalwa tsimoni khulola.
Lekha valole khuli wayaanza vandu vovo vanyole tsisoni.
Lekha mulilu kwenyekhanga khulaalitsa vatsiku vovo kuvalaalitsi.
12Yivi Mwami Nyasaye, wachila khumenyanga mu milembe,
toto, ka khwakhola koosi, nivi wakhukholela.
13Yivi Mwami Nyasaye, uli Nyasaye weru,
vami vandi khumeeta khu yivi va khwamihakhu,
navutswa khuheetsanga lira liolio lionyene luyali.
14Vandu venavo vakhutsa, valiitsa khuvula khuva mwoyo;
vakwa vinanyenzo, valiitsa khuvula khwisimukha;
shichila nivi wa vasalilitsa khandi nuvativitsa;
mundu avulakhuho uliitsa khuvitsushitsa khandi.
15Navutswa Mwami Nyasaye, nivi wa vambalalitsa shivala shieru;
kilikali, nivi wa vambalalitsa shivala shieru;
nivi wa vaheetsanga vukhumi;
nivi wa vambalalitsa mipaka chi shivala shieru.
16Yivi Mwami Nyasaye, nivali mulinyakhana,
nalwo lwa vakhukhava,
vareeva vukhonyi khurula khu yivi
lwa wa vasalilitsanga.
17Khwahulila isalila khuli mukhali waheelitsa nanyakhananga
nalila niyenyanga khwivula mwana;
Yivi Mwami Nyasaye, nindio khandi khwali shichila yivi.
18Khwahulia isalila yu khwivula mwana,
navutswa shindu shivulakhuho shia khwivula!
Khushili khunyola likuura shichila shivala shieru;
khali shindu shivulakhuho shia khwarweshitsa.
19Navutswa vandu vovo vakhutsa
valiitsa khutsililila khuva mwoyo,
mivili chiavo chiliitsa khwisimukha.
Munyi va mwayeveelwa mu shilindwa,
vushi muraanje khwimba tsinyimbo nu vuyaanzi!
Nyasaye aliitsa khuchila liime lielie liu vulamu lishinditse lilova,
khali lilova lilirulitsa vandu vali nivakhutsa khale.
20Munyi vandu vaanje, hambi, mwinjile mu tsinzu tsienyu,
mwiyikalile mutsio;
mukhole numwivisa hati vutswa
khutukha lwa vurima vwa Nyasaye vuvwa;
21shichila Mwami Nyasaye arulanga havundu hehe,
khwitsa khusalilitsa vandu mu shivala shichila vwoni vwavo;
khali lilova liliitsa khulavushitsa havulavu vandu vasuundulanga shisahi shia vandi;
vuchila khuvisa vandu viirwa khulio.
Currently Selected:
ISAYA 26: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013