2 SAMWELI 7
7
Vuprofeti vwa Natsani Shichila Daudi
(1 Tsiny 17:1-15)
1Lwa Mwami Daudi yali niyakhikhala vulahi munzu yeye yu vwami, khandi Mwami Nyasaye namali khumulinda mu vulindi vulahi, khurula khu vatsiku veve voosi, 2Mwami Daudi yavoolela Muprofeti Natsani, “Lolakhu khuli menyanga hanu mu inzu yalombwa khu misala chia ceda, navutswa Lisanduku li Lilakano lia Nyasaye limenyanga mu liheemo!”
3Navutswa Natsani yachipa, “Khola shia shindu shiosi, shia ukanakananga khukhola, shichila Mwami Nyasaye ali nivi.” 4Navutswa Mwami Nyasaye yavoolela Natsani mu vutukhu vwenovo, 5“Simukha utsi khuvoolela murumishi wanje Daudi, ‘Inzi Mwami Nyasaye mbolanga, Nivi unyala khunzumbashila litempeli liamenyamu? 6Shili khumenyakhu mu litempeli, khurula khulitukhu lia narulitsa Vaisraeli mu shivala shia Misri, khutukha khali mumatukhu kanu. Namenya ninjenditswangwa shia havundu, hosi nimenya mu liheemo. 7Shia havundu hosi ha natsitsanga na Vaisraeli, nyala khuva nareevakhu khali mulala khu vimilili vavo, va narovola khuva khuli vayi va vandu vaanje: Shichila shina nu muvula khunzumbashila litempeli lialombwa khu misala chia ceda?’ ”
8“Khulwa yako, voolela murumishi wanje Daudi, ‘Inzi Mwami Nyasaye wi Mikaanda Chiliihe mbolanga, Ninzi wakhurulitsa mu lwayilu lwa wayitsamu makondi, nikhwamihitsa khuva mwimilili wa vandu vaanje Israeli. 9Nali namenya nimbetsanga nivi, shia havundu hosi ha watsitsanga; khandi ninzi wakhukuurila vatsiku vovo voosi lwa wisuundanga imbeli. Niitsa khukhukhola umanyikhane khuli vimilili vamanyikhana mu shivala. 10Niitsa khuha vandu vaanje Israeli shivala shiavo vene, wa vanyala khumenya mu milembe, khandi valivula khutechela nivaria. Vandu vatamanu shivaliitsa khuvatambitsa khuli vakhola muliraanga, 11khandi vashikholanga, khurula lwa narovola vakhalachi khwimilila vandu vaanje Israeli tawe. Niitsa khuvalinda khandi khurula khu vatsiku vavo voosi. Khumeeta khu kenako, inzi Mwami Nyasaye niitsa khuvakhola khuva inzu ya vami. 12Lwa uliitsa khuva nu wakhutsa, khandi nu wayeveelwa mu shilindwa na vakuuka vovo, niitsa khukhola mulala khu vaana vovo khuva mwami khandi mukhole khuva ni tsingulu mu vwami vwevwe. 13Neye uliitsa khunzumbashila nzu Litempeli, khandi shisoko shieshie shiu vwami shilitsa khutsililila khuvaho mihika ni mihika. 14Niitsa khuva tata wewe, naye aliitsa khuva mwana wanje. Lwa aliitsa khukhola shindu shitamanu, niitsa khumuchelihitsa, khuli tata achelihitsanga mwana wewe. 15Navutswa niitsa khutsililila khumuyaanza, khuli nalekha khuyaanza Saulu, wali mwami imbeli wowo. 16Uliitsa khuva na vitsukhulu shia khase khosi; khandi niitsa khukhukhola wamihi mihika ni mihika. Uliitsa khwamiha khumatukhu koosi.’ ”
17Natsani yavoolela Daudi shia shindu shiosi, shia yali niyamanyinywa.
Lisaala lia Daudi liu Khusanditsa
(1 Tsiny 17:16-27)
18Nalwo lwa Daudi yasimukha natsia mu Liheemo Litakatifu, niyikhala nasaala, “Mwami Nyasaye, shindushili khukholelwa kukholele inoho khali kukholele vandu vi inzu yanje tawe. 19Mwami Nyasaye, khali lwenulu ushimeetanga khukhola; ukholi ninzi lilaaka khulondokhana khu vitsukhulu vaanje mumatukhu kaliitsa khuvaho; khandi uhuchililanga mundu alola kenako. 20Ni makhuva shina kandi kanyala khumeeta khukhuvoolela! Wamanya ninzi murumishi wowo. 21Nivi wakhola yaka khulondokhana khu lienya liolio, khandi khuli walolanga ukholi vindu viu khuchenyinya yivi viosi khunzechitsa. 22Mwami Nyasaye, nivi uli ni tsingulu tsinyishi! Wundi avulakhuho khuli yivi! Shia khase khosi khwamanya ndi nivi Nyasaye wonyene. 23Luhia luvulakhuho, khulilova khunu luli khuli vandu vuluhia lwa Israeli, va warulitsa mu vurukwa khuvakhola mwene khuva vandu vovo. Vindu vi tsingulu via wa vakholela khandi viu khuchenyinya, vialanditsa vukhumi vwovwo shia havundu hosi khulilova. Lwa wakhunganyinya vandu vi tsimbia tsindi nende vanyasaye vavo, lwa vandu vovo visuundanga imbeli, vandu va wakhola khuva vavoholole lwa wa varulitsa mu shivala shia Misri, khuva vandu vovo mwene. 24Nivi warovola vandu vovo Israeli khuva vandu vovo mihika ni mihika; khandi yivi Mwami Nyasaye wamala khukwa Nyasaye wavo.
25“Khulwa yako, Mwami Nyasaye, rweshitsa ka walaaka inzi nende vitsukhulu vaanje khumatukhu koosi, khandi ukhole ka wavoola uliitsa khukhola. 26Luyali lwolwo luliitsa khulandikha, ma vandu valivoola khumatukhu koosi, ‘Mwami Nyasaye wi Mikaanda Chiliihe, neye Nyasaye wa Israeli.’ Vandu vi inzu yanje inzi murumishi wowo, valiitsa khutsililila khuva vami mihika ni mihika. 27Khali ndio, yivi Mwami Nyasaye wi Mikaanda Chiliihe, uli Nyasaye wa Israeli. Umali khusuuvilitsa inzi murumishi wowo ndi uliitsa khunzumbashila Litempeli. Nashio shivune shichilanga nisaala khu yivi, khuli lwa saalanga ndio.
28“Mwami Nyasaye, nivi Nyasaye! Umali khulaaka khumba inzi murumishi wowo, vindu vilahi muno. Makhuva koko ni katoto. 29Nuyaanza kasitsa vitsukhulu vaanje khandi uvakhole vatsililile khumatukhu koosi, khuva vami vovo va warovola. Wamala khulaaka, khandi ndi ni lisuuvila ndi uliitsa khukasitsa vandu vi inzu yanje mihika ni mihika.”
Currently Selected:
2 SAMWELI 7: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013