มาระโก 15
15
อัห เอิด เยซู ซับ ตัก ปีลาด
มัดทิว 27:1-2, 27:11-14, ลูกา 23:1-5, ยอน 18:28-38
1ปัห ซะ ปึง มอ เอาซาง แกะ ปึง อาจาน ครำ ยิว เคิบ ปึง ซะ แกะ เคิบ ปึง ซะพา จ็อง มด อัห ก็ โตะ อู นอย เลือง เยซู นัน อัห ตกลง มอบ เยซู อน ตัก พูวา ปีลาด อัห ก็ ลด ท็อก ที ท็อก ลา เยซู ซับ ตัก ปีลาด 2เยซู เล็ห ตัก ปีลาด แลว ปีลาด ก็ ซ็วน นำ “มัห เป็น พะเจายูฮัว ครำ ยิว ซีเละ อัน” นำ อัง เยซู ก็ ซวัล นำ “ก็ ฮุน มัห เค็ย นะ” นำ อัง 3ปึง มอ เอาซาง แกะ ก็ จบ โตด นำ พอง นำ ดก มบลึ 4ปีลาด ก็ ซ็วน นำ คือเน วัล “ซีวะ มัห ไอ มี ซวัล อัห ดอม กา อัห พอง มัห ดก มบลึ ดุห” ปีลาด อัง 5แต เยซู เค็ด อุ ไอ มี จ็อก ซีวะ ซัง ปีลาด ก็ ญ็อก งึด อัง นำ
ปีลาด ตัดซิน มเบิล เยซู ตาม ใจ อัห
มัดทิว 27:15-31, ลูกา 23:13-25, ยอน 18:39—19:16
6จูวางๆ ตัก งิ เทซกาน เปซา เน ปีลาด ม็อด พระ นักโทด มี ล็อง อน ตัก อัห แลว แต พซาซน ครอ นำ พระ ซีเอ 7ทาเน ก็ มี นักโทด มี ล็อง ซือ ตัก บาราบัด อัห เติล ลุก นำ เลิม เคิบ เปือน ปึง อัห เน อัห เกย ซู ครำ เมือง โรม กำนา เพือ ไอ มี ระ ครำ โรม ควบคุม ออ อัห ก็ มเบิล ครำ แด 8ทาเน ปึง พซาซน ก็ ครอ ไล ปีลาด พระ นักโทด มี ล็อง ฮุน นำ ม็อด แอง จู ลบ นัน 9-10แต ปีลาด เม็จจึด แลว ปึง มอ เอาซาง แกะ ซีรอก มเบิล เยซู เพาะวา แร็ง อัห คอย เยซู ปีลาด ก็ ลด ซ็วน พซาซน คือเน “เยซู ตัก เป็น พะเจายูฮัว ครำ ยิว เน แป ซีรอก ระ เอิญ พระ นำ อน ตัก แป นอ” ปีลาด อัง 11แต ปึง พซาซน ไอ มี ปัง นำ เพาะวา ปึง มอ เอาซาง แกะ ซุย อัห แลว ระ อัห ครอ ระ ปีลาด พระ บาราบัด แตน เยซู นัน 12ปีลาด ก็ ซ็วน อัห คือเน วัล “ก็ ล็อง เน ดุห แป มพึ นำ ตัก กซัด ครำ ยิว แป ระ เอิญ แอง จังนัก เคิบ นำ” ปีลาด อัง 13ปึง อัห ก็ เลอะ นซาก งกรอ “มพำ นำ ตัก งกรัง” อัห อัง 14ปีลาด ก็ ซ็วน อัห คือเน วัล “มเบิล นำ อังวะ เต็ห นำ ไอ มี แอง ลุห ซีวะ ดุห” ปีลาด อัง อัห ก็ เฮง นซาก ติกๆ “มพำ นำ ซิห ตัก งกรัง” อัห อัง 15ปีลาด เม็จ พซาซน ซวัล ฮุนเน นำ ก็ ตาม ใจ อัห ฮัก นำ ลด พระ บาราบัด อน อัห นำ ก็ ระ ทฮาน มบัด คัล เยซู อัห คัล เยซู แลว นำ ก็ ลด มอบ เยซู อน ตัก ทฮาน ระ อัห เอิด นำ มพำ ซิห ตัก งกรัง ฮัก
ปึง ทฮาน ดูทูก เยซู
16แลว ปีลาด มอบ เยซู อน ตัก ทฮาน แลว อัห ก็ เอิด ซับ เยซู ทอก อุ บัดซะ ตัก เด็นเตะ เจิง ปีลาด นัน เจ็นนัน อัห ก็ งกรอ มวด ทฮาน โตะ มด 17อัห เอิด โกบ นซุบ ซี มวง จึห อน ตัก เยซู#ค 17 “โกบ นซุบ ซี มวง” เป็น ซี ตำแน็ง พะเจายูฮัว อัห ก็ เอิด ซีเยอะ ทัญ แอง เป็น มงกุด ซุก ซิห ตัก กึ นำ 18อัห ก็ ซีแอง ไว นำ อัห แทก นำ คือเน “พะเจายูฮัว ครำ ยิว เฮย ครอ ระ มัห จเริน ดาย” อัห อัง 19แกด ล็อง ก็ เอิด งคัล คัล กึ นำ อัห จ็วห ซิห นำ อัห ก็ ซีแอง คุกโคล ไว นำ 20แลว อัห ปิล มัด ปิล มุห นำ แลว อัห ก็ โปลก แอ็ม โกบ ซี มวง นัน อัห เอิด คัว คอง นำ จึห อน นำ วัล เจ็นนัน อัห ก็ เอิด นำ เริล อัห และ มพำ นำ ซิห ตัก งกรัง
อัห เอิด เล็ก มพำ ซิห เยซู ตัก งกรัง
มัดทิว 27:32-44, ลูกา 23:26-43, ยอน 19:17-27
21ญาม ปึง ทฮาน กำลัง เอิด เยซู เริล นัน อัห ก็ ปัก เม็จ อัหคล็อง มี ล็อง ตัก รวง ซือ นำ ตัก ซีโมน นำ เป็น เอา อาเล็กซานเดอ เคิบ รูฟัด นำ เป็น ครำ ไซรีน โตะ เจ็น งวัล ซะร็อห พอดี นำ พาน เริล รวง นัน ปึง ทฮาน ก็ คนาบ นำ ตอล งกรัง เยซู เริล 22เจ็นนัน อัห ก็ ซับ เยซู เริล โตะ มี ตี นัน ซือ ตัก โกลาโกทา โกลาโกทา ซีแล็ม เค็ย “ซีเยิง กึ” 23อัห ก็ เอิด ปุจ องุน ซุน ซิห เคิบ ยา มดยอบ#ค 23 มดยอบ เป็น ยา ตี อัห ม็อด ตา ซิห ซบ เป็น ยา มี มบลึ นัน ตี ปึง อาจาน ซับ อน ตัก เยซู ญาม นำ เป็น ควัน แย็ด นัน มดยอบ เน ซุน ซิห เคิบ ปุจ องุน แอ ออก ก็ อี จวย ระ แควน โซะ อน เยซู ออก แต นำ ไอ มี จบ ออก 24ทาเน อัห ก็ เอิด เล็ก มพำ ซิห นำ ตัก งกรัง อัห ก็ เอิด คัว นำ เญ็บ ซะลาก อ็อญ เจือ ซีเอ กุญ ซีวะ คอง นำ 25อัห ก็ มพำ ระ นำ เจ็น กาว โมง งกร็อห 26เลือง ตี อัห พอง นำ อัห ก็ เคียน ซิห ตัก ปาย คือเน “เอา เน เป็น กซัด ครำ ยิว” 27อัห ก็ เอิด โจน เปียะ ล็อง มพำ ซิห ตัก งกรัง ติๆ นดิ เยซู นัน เพียห วิ มี ล็อง เพียห เลาะ มี ล็อง 28ตี อัห มเบิล เยซู เลิม เคิบ ครำ ไอ มี เลาะ นัน ก็ กิว เป็น เล็ห มอก นังซือ เอาซาง เพีย ไล อน วาล คือเน “อัห จบ เค็ย นำ เป็น ครำ ลุห มอก อัห” นังซือ เอาซาง อัง#ค 28 ซะบับ กรีก ไล ดก ไอ มี คอ เน แญง ไท ก็ มี แต ซิห ใน วงเล็บ อัห เอิด เจ็น อิซยา 53:12 เคิบ เพลง เอาซาง 22:1 29ครำ ตี พาน เริล นัน อัห ก็ ปิล มัด ปิล มุห นำ อัห เง็ย กึ โป นำ คือเน “ทุย นัก มัห อง รึห แอ็ม วิฮาน มัห อง แอง แมะ แพะ งิ ก็ แลว มัห ซีอัง 30กัน จังนะ มัห ก็ จวย นัง ออ ระ ปน แอ็ม เจ็น งกรัง เน กา” อัห อัง 31ปึง มอ เอาซาง แกะ เคิบ อาจาน ครำ ยิว ก็ ปิล มัด นำ มอก อัห นะ อัห ไล นอย คือเน “ทุย นำ จวย อัหซอ กุญ แต นำ จวย นัง ออ ไอ มี กุญ 32นำ เค็ย ออ เป็น เมซียา นำ เค็ย ออ เป็น พะเจายูฮัว ครำ อิซราเอล แอ เน แอ เพา ดอม นำ จูล เจ็น งกรัง นอ ระ แอ เม็จ เคิบ มัด ออ ซัง แอ เจือ นำ” อัห อัง โจน ตัก อัห มพำ เลิม นัน ก็ โป ดูทูก นำ เมือนนอย
เยซู เปิล
มัดทิว 27:45-56, ลูกา 23:44-49, ยอน 19:28-30
33เจ็นนัน ก็ เตียง ก็ ญึด ม็อญ ซะ มด ทัว แพนซิก จำปอ บาย ซาม โมง 34ซาม โมง แลว เยซู ก็ นซาก แร็ง คือเน “เอโลอีๆ ลามา ซาบักทานี” นำ อัง ซีแล็ม เค็ย “เอาซาง เอาซาง งกีจ็อง คอง เอิญ มัห พระ แอ็ม เอิญ อังวะ” 35แกด ล็อง ตัก ญ็อง อุ นัน ก็ เม็จ แญง นำ จ็อก อัห อัง คือเน “ปัง นะ นำ งกรอ เอลียา” อัห อัง เพลง เอาซาง 22:1
36ทาเน ก็ มี อัหคล็อง มี ล็อง เล็ง จัก เอิด ฟองนาม จุบ ซิห ปุจ องุน แซ็ดๆ นำ โจด ซิห ตัก มแบ็จ ลำ นจืน ซิห ตัก โนด เยซู ระ นำ โจก เอา นัน ก็ ไล อัห คือเน “แอ เพา ดอม อ็อญ เจือ เอลียา โตะ จวย นำ มพลิห เจ็น งกรัง เน ฮุ” นำ อัง 37ทาเน เยซู ก็ นซาก งกรอ แร็งๆ ลด ซุด งกวย เปิล แอ็ม 38ท็อบ เปิล เยซู นัน พามาน ตัก อุ ใน วิฮาน ใน เมือง ก็ ฮัก ซาก แร็ห เจ็น นทัล ทึห จำ โตะ นทัล เซ็บ
39เจ็นนัน ก็ มี ทฮาน นายรอย มี ล็อง ญ็อง ดอม อุ ลัห มัด เยซู ติๆ นัน นำ เม็จ เยซู เปิล นำ ก็ จ็อก คือเน “บา นอ เอา เน นำ กิว เป็น ควัน เอาซาง ซีเละ” นำ อัง 40ทาเน ก็ มี ปึง อัหเม ดอม อุ เยอะ ซะ มี มารี ครำ งวัล มักดาลา เคิบ ซะโลเม เจ็นนัน ก็ มี มารี ตัก เป็น เม คอง ยากอบ แย็ด เคิบ โยเซด 41อัหเม ปึง เน อัห ม็อด เคริบ เยซู อัห ม็อด จวย นำ ญาม นำ ควะ อุ ตัก จังวัด กาลิลี เจ็นนัน ก็ มี อัหเม ซอ ดก ล็อง ตี โตะ ตัก เมือง เยรูซาเล็ม เลิม เคิบ เยซู งิ นาน อัห ก็ เพา ดอม นำ อุ เยอะ ซะ
โยเซบ เอิด ซบ เยซู ระ ตัก อุโมง
มัดทิว 27:57-61, ลูกา 23:50-56, ยอน 19:38-42
42เจ็นนัน ก็ แจ็ล แอ็ม งิ นัน เป็น วัน ซุก เป็น งิ ตี อัห ม็อด เตียม ระ ซะ ป็อง ตัก วัน เซา เพาะวา วัน เซา เป็น งิ มโบละ คอง อัห 43ทาเน ก็ มี ครำ มี ล็อง ซือ ตัก โยเซบ เป็น ครำ งวัล อารีมาเทีย นำ เป็น ครำ ใน ปึง ซะพา ครำ ยิว ดก อัห นับทือ นำ ซีเละ นำ ก็ เป็น ครำ ตี เพา โตะ เอาซาง ปกคอง โลก เน นำ ก็ ฮาน เริล ครอ ซบ เยซู ตัก ปีลาด
44ทาเน ปีลาด เม็จ คาว เค็ย เยซู เปิล แลว นำ ก็ ญ็อก งึด นำ ก็ ไล นายรอย โตะ และ ออ ลด ซ็วน นำ คือเน “เยซู เปิล แลว ซีเละ เออะ” นำ อัง 45นายรอย ก็ ไล คือเน “แมน เยซู เปิล แลว” นำ อัง ปีลาด เม็จจึด เค็ย เยซู เปิล แลว นำ ก็ อนุยาด ระ โยเซบ เอิด ซบ เยซู 46โยเซบ ก็ ทน เอิด พา ลินนิน เริล จัก มพลิห ซบ เจ็น งกรัง นำ ก็ เอิด พา ลินนิน นัน มบัล ปอก ซบ เยซู ซับ ระ ตัก อุโมง เกียง ตี นำ เจาะ ระ อน เจ็น กำนา แลว เจ็นนัน นำ ก็ โมล เกียง คลับ เติล ระ งอก มพุง นัน 47ทาเน มารี ครำ เมือง มักดาลา เคิบ มารี เม โยเซด ก็ ดอม อุ ปาม ก็ เม็จ ตี โยเซบ ระ ซบ เยซู
Currently Selected:
มาระโก 15: Prai
Highlight
Copy
Compare
Share
Want to have your highlights saved across all your devices? Sign up or sign in
Global Partners
