มัดทิว 14
14
เฮโรด เยา เยซู เป็น ยอน ตี จุบ อัห ตัก นอก
มาระโก 6:14-29, ลูกา 9:7-9
1ญาม นัน พะเจายูฮัว เฮโรด#ค 1 เน เฮโรด แอนติปา นำ เป็น ควัน เฮโรด ล็อง แรก เฮโรด ล็อง แรก และ มเบิล เยซู ญาม นำ ควะ แย็ด นัง ตัก เมือง เบ็ดเลเฮ็ม เฮโรด เน นำ ปกคอง กาลิลี เคิบ ปีเลีย งิ แทะ พูวา ปีลาด ไล อัห ซับ เยซู ตัก เฮโรด ล็อง เน ระ นำ ตัดซิน เยซู ก็ ปกคอง อุ ตัก จังวัด กาลิลี นัน ทาเน เฮโรด ก็ เม็จ คาว เยซู แอง ซะ แปลก ดก มบลึ 2นำ เม็จ คาว ฮุนนัน แลว นำ ก็ ซ็วน ลูกนอง ออ ฮุนเน “ล็อง ตี แป เค็ย นะ นำ เป็น ยอน ตี จุบ อัห ตัก นอก นัน ก้า นำ รีด เล็ห วัล ก้า ซัง นำ แอง ซะ แปลก ดก มบลึ กุญ” เฮโรด อัง
เลือง เฮโรด มเบิล ยอน
3-5เลือง พะเจายูฮัว เฮโรด ซงไซ เยซู เป็น ยอน ก็ มอก เน กำนา พะเจายูฮัว เฮโรด เน นำ แอง ลุห อัง กด เอาซาง นำ เอิด ยัห ควน ออ ควน เฮโรด เน ซือ ตัก ฟีลิบ ยัห ฟีลิบ ซือ ตัก เฮโรเดีย ทาเน เฮโรด เน ก็ เอิด เฮโรเดีย ยัห ฟีลิบ เน เป็น ยัห ออ วัล ยอน เม็จ เฮโรด เอิด ยัห ควน ออ จังนัน ยอน ก็ โป เฮโรด นำ เค็ย เฮโรด ลุห อัง กด เอาซาง ลุห ตี นำ เอิด ยัห ฟีลิบ นัน ยอน โป เฮโรด จังนัน เฮโรด ก็ อ็อด อัง ยอน นำ ซีรอก มเบิล แอ็ม ยอน แต นำ ไอ มี ฮาน นำ นเจิก อัง พซาซน เพาะวา พซาซน อัห เจือ เค็ย ยอน ล็อง เน เป็น ลาม เอาซาง เฮโรด ก็ นเจิก เป็น เลือง จ็อง นำ ก็ ลด เญ็บ ยอน เติล ตัก ลุก ไอ มี งเคาะ มเบิล ยอน เตาะ#กด เอาซาง 18:16, 20:21, ลูกา 3:19-20
6ทาเน ก็ เล็ห งิ เกิด เฮโรด อัห ก็ จัด งาน ซะลอง งิ เกิด เฮโรด นัน ควัน เฮโรเดีย ก็ พอน นำ พอน เลาะลัห เฮโรด ก็ มัก ตี นำ พอน เลาะลัห นัน 7เฮโรด ก็ ซันญา อน รางวัน ตัก ควัน เฮโรเดีย นัน ควัน เฮโรเดีย ครอ ซีวะ เฮโรด ก็ เค็ย อน ตัก นำ มด เฮโรด ก็ ซาบาน เคิบ มัด แคก นัน “มัห ครอ ซีวะ ตัก เอิญ เอิญ ก็ อน มัห มด ดาย” เฮโรด อัง
8ทาเน ควัน เฮโรเดีย นัน ก็ ซ็วน เม ออ วาล เม นำ ก็ ไล นำ ครอ กึ ยอน นำ ก็ เริล ไล เฮโรด คือเน “เอิญ ครอ กึ ยอน ตี จุบ อัห ตัก นอก ครอ เอิด กึ ยอน ซิห ตัก ทาด ซับ ตัก เอิญ แต็ห เน ดาย” นำ อัง 9พะเจายูฮัว เฮโรด เม็จ ควัน เฮโรเดีย ครอ กึ ยอน นำ ก็ เซียใจ ซีเละ ตี นำ จวด จ็อก ตัก มัด ครำ ดก แลว นัน แต นำ ก็ แอง มอก ควัน มอน เฮโรเดีย ครอ นัน เพาะวา จวด นำ จ็อก เคิบ มัด อัห แลว 10นำ ก็ ลด ไล ลูกนอง ออ เริล โค็ห งคอ ยอน ตัก ลุก เจ็นนัน ลูกนอง นำ ก็ เริล โค็ห งคอ ยอน 11อัห ก็ เอิด กึ ยอน ซิห ตัก ทาด ซับ อน ตัก ควัน เฮโรเดีย ควัน นัน ก็ เอิด ซับ อน ตัก เม ออ
12เจ็นนัน ลูกนอง ยอน ก็ โตะ เอิด นัง ยอน เทิ๊บ แอ็ม อัห ก็ เริล ไล เยซู เค็ย เฮโรด มเบิล แอ็ม ยอน แลว เลือง ยอน ก็ มอก เน (ทาเน ญาม เฮโรด เม็จ คาว เค็ย เยซู แอง ซะ แปลก กุญ ดก มบลึ นัน นำ ก็ นเจิก นำ เยา เยซู เป็น ยอน เน รีด เล็ห วัล)
เยซู เลียง ครำ ดก
มาระโก 6:30-44, ลูกา 9:10-17, ยอน 6:1-14
13แลว เยซู เม็จ คาว เค็ย ยอน เปิล แลว เยซู ก็ ต็อก เฮือ เริล มี ตี นะ เยอะ ซะ เจ็น งวัล นำ ซีรอก อุ มี ล็อง ฮัก นำ เริล มี ล็อง ฮัก ไอ มี ซีรอก อุ เคิบ ครำ ดก เตาะ แต ปึง พซาซน เม็จ คาว เค็ย เยซู เริล ตัก นัน อัห ก็ เคริบ และ นำ อัห นจาง เริล ตัก เปล นอก ทะเล นัน จำปอ เล็ห ตี เยซู และ เริล ออ นัน ครำ ปึง นัน ก็ ดก ซีเละ อัห เล็ห เจ็น ดก เมือง ดก งวัล อัห ซีรอก อุ เคิบ เยซู นัน 14ทาเน เยซู ก็ ต็อก เฮือ โตะ แทะ อัห โตะ ตัก นัน แลว เยซู ก็ ทอก เจ็น เฮือ นำ ก็ เม็จ ดก ครำ เพา นำ อุ นัน แลว นำ ก็ ตึ อัง อัห ซีเละ นำ เม็จ ครำ โซะ นำ ก็ จวย รักซา อัห ระ งาล โซะ มด
15อุ เจ็นนัน วัล ก็ บัก และ แจ็ล แลว ลูกนอง เยซู ก็ โตะ ไล เยซู คือเน “อาจาน บัก และ แจ็ล แอ็ม แลว นอ ปึง พซาซน เน อัห ก็ โซะ จะ ตัก เน ไอ มี งวัล ครำ นอ ครอ ระ มัห ไล อัห วัล ดาย มัห ไล อัห เริล ทน ซะ ป็อง ตาม งวัล มานะ เน ก็ เลาะ” ลูกนอง นำ อัง 16แต เยซู ไล ลูกนอง คือเน “ไอ มี จำเป็น ไล อัห เริล ทน ซะ ป็อง เตาะ แป เน และ ซะ ป็อง อน อัห ฮัก” นำ อัง 17อัห ก็ ไล นำ “ฮีเอิห อาจาน อิห มี คนมปัง ฮา แพ็น มี คา เปียะ นัง เตานะ ดาย แอ แอง จังนัก ซัง ปอ ป็อง บ็อห” อัห อัง
18ทาเน เยซู ก็ ไล อัห เอิด คนมปัง เคิบ คา นัน ซับ ตัก ออ 19เยซู ก็ ไล ปึง พซาซน คุด อุ ตัก แญ็น เมียลๆ นัน เจ็นนัน นำ ก็ เอิด คนมปัง เคิบ คา นัน นำ ก็ ง็อห มัด ดอม วาง ทึห นำ ก็ คอบคุน เอาซาง แลว นำ คอบคุน เอาซาง แลว นำ ก็ อน ตัก ลูกนอง ออ นำ ไล อัห แบง อน ตัก พซาซน ป็อง 20ปึง พซาซน อัห ก็ ป็อง อิม มด จู ล็อง แลว อิม อัห ป็อง แลว ก็ ควะ เลือ วัล ซิบซอง บุง ปิ วัล 21งิ นัน เยซู เลียง อัห ดก ล็อง นับ ปึง อัหคล็อง ลือๆ ก็ มี ปะมาน 5,000 ล็อง อุ แลว เจ็นนัน ก็ มี ปึง อัหเม เคิบ ปึง ควัน แย็ด วัล ไอ มี นับ เตาะ
เยซู นจาง คอม นอก ลัห ทึห
มาระโก 6:45-52, ยอน 6:16-21
22เจ็นนัน เยซู ก็ ลด ไล ลูกนอง ต็อก เฮือ คาม นอก เริล พาโนน วาล แต นำ ไอ มี ตัน เริล นำ ไล ปึง พซาซน วัล เจิง ออ มด วาล 23ซุด พซาซน วัล เจิง ออ มด แลว นำ ก็ ก็อห ล็อห ทึห นำ เริล ครอ วอน เอาซาง มี ล็อง ฮัก แจ็ล เดิก แลว นำ ก็ ควะ อุ ตัก นัน มี ล็อง เดียว ฮัก
24ทาเน ปึง ลูกนอง นำ อัห ก็ ต็อก เฮือ เริล ปน แอ็ม เยอะ ซะ เจ็น เปล ซิก แลว เจ็นนัน อัห ก็ มี ปันฮา จ็อง พด เล็ห งกริม ลุกพุก จ็อง นอก ก็ มพัห กุด เฮือ นัน ไอ มี เลาะ ลาย งกริม อัห ซับ เฮือ ก็ ญาก ซีเละ 25ทาเน ก็ เดิก แลว ปะมาน ตี ซาม เน ปาโท็ห อัห ก็ เม็จ เยซู นจาง โตะ และ ออ นำ นจาง โตะ ตัก นอก ลัห ทึห นัน
26ญาม ปึง ลูกนอง เม็จ เยซู นจาง โตะ ตัก นอก ลัห ทึห นัน อัห เยา เยซู เป็น ปรอง อัห ก็ แร็ง นเจิก อัห ก็ นซาก 27เยซู เม็จ อัห แร็ง นเจิก คือนัน นำ ก็ ไล อัห คือเน “อำ นเจิก เตาะ เอิญ เยซู ดาย” นำ อัง 28เปโตร เม็จ เยซู ไล ออ จังนัน นำ ก็ งกรอ ซิห เยซู “งกีจ็อง เฮย กัน มัห กิว เป็น เยซู ซีเละ ก็ มัห ไล เอิญ นจาง เริล คอม นอก โตะ และ มัห ดาย” เปโตร อัง 29“เออะ ดิห โตะ แต็ห กา” เยซู อัง เปโตร เม็จ เยซู ไล ออ คือนะ แลว นำ ก็ มพลิห เจ็น เฮือ นจาง เริล คอม นอก ลัห ทึห นำ นจาง เริล และ เยซู นัน 30แต ญาม เปโตร นจาง เริล บัก และ ติ เล็ห ตัก เยซู แลว นำ เม็จ แร็ง งกริม นำ ก็ นเจิก นำ ก็ บัก และ จม แอ็ม ตัก นอก นเซ็บ นำ ก็ ลด งกรอ เยซู จวย ออ “อาจาน จวย เอิญ เดอ กา” นำ อัง
31เยซู เม็จ เปโตร งกรอ ซิห ออ มอก นัน แลว นำ ก็ ลด ท็อจ เด็ง เอิด เปโตร นำ ก็ ซ็วน เปโตร คือเน “บา นอ ซีวะ มัห ไอ มี ปอ เจือ เอิญ บ็อห นอ ซีวะ มัห ซงไซ เอิญ” เยซู อัง 32เจ็นนัน ปาม ก็ เริล โตะ ตัก เฮือ ท็อบ ปาม ก็อห เฮือ แลว งกริม ก็ ลด เค็ด งาล แอ็ม 33ลูกนอง เยซู ตี อุ ใน เฮือ นัน อัห ก็ กราบ ไว เยซู อัห ก็ ไล เยซู คือเน “ฮีเอิห มัห เป็น ควัน เอาซาง ซีเละ นอ” อัห อัง
เยซู จวย ครำ โซะ ตัก เยนเนซาเร็ด
มาระโก 6:53-56
34เจ็นนัน อัห ก็ ต็อก เฮือ เริล ติกๆ พด โตะ งวัล เยนเนซาเร็ด 35ทาเน ครำ ตัก งวัล นัน อัห เม็จ เยซู อัห ก็ จำ เยซู กุญ อัห ก็ เลาะใจ อัห ก็ นท็อล ไล นอย ทัว มด อัห เม็จ คาว เยซู โตะ แลว อัห ก็ ซับ ครำ โซะ ทึดๆ ระ เยซู รักซา ระ งาล 36ครำ โซะ นัน ก็ ครอ เคิบ เยซู คือเน “อาจาน ครอ ระ อิห กุญ เปลิบ นทัล โกบ มัห ตีดต็อง อิห ก็ งาล โซะ” อัห อัง จู ล็อง ตี กุญ เปลิบ นทัล โกบ นำ อัห ก็ งาล โซะ มด จู ล็อง
Currently Selected:
มัดทิว 14: Prai
Highlight
Share
Copy
Want to have your highlights saved across all your devices? Sign up or sign in
Global Partners
