โยนา 4
4
โยนา อ็อด อัง เอาซาง
1ทาเน โยนา เม็จ เอาซาง ไอ มี กิว ลงโทด ครำ เมือง นีนะเว มอก นำ เพีย ไล อน วาล นัน โยนา ก็ อ็อด นำ ไอ มี ปอใจ ซัก มี ติด เตาะ 2โยนา แร็ง อ็อด ซีเละ นำ ก็ ไล เอาซาง คือเน “เอาซาง เฮย เอิญ ไล มัห แลว วาล ไอ ตัน เอิญ ทอก เจ็น เจิง ออ เอิญ ก็ ไล มัห แลว เค็ย มัห ไอ มี กิว ลงโทด อัห ตี เอิญ ซีรอก ปัด เริล เมือง ทาซิด เวิดๆ นัน ก็ ญอน เอิญ เม็จจึด มัห เป็น เอาซาง ตี เลาะ ตี ซอดแซ็ง มัห ตึ อัง ครำ มัห รัก ครำ มด จู ล็อง จู นัง ญอน มัห แอง เลาะ นัน มัห ก็ เปียน ใจ ออ มัห ก็ ไอ มี กิว มเบิล อัห เตาะ เอิญ กึด จังเน แลว เอิญ ก็ ลด ไอ มี ซีรอก เริล ไล อัห เตาะ 3เอิญ ไอ มี ปอใจ เตาะ ดาย เอาซาง เฮย มัห มเบิล แอ็ม เอิญ นทึห เตาะ เอิญ เม็จจึด แลว รีด อุ ได ก็ ไอ มี คิ ซีวะ ซัง เอิญ เปิล แอ็ม ก็ เลาะ กวา วัล” โยนา อัง
4เอาซาง ก็ ไล โยนา คือเน “โอ เต็ห มัห อ็อด อัง เอิญ ฮุนเน ก็ ไอ มี จบ แคระ ดาย” เอาซาง อัง
5เจ็นนัน โยนา ก็ ทอก เริล ลัห โตะ งิ งคม โตะ งคม แลว นำ ก็ แอง ปาง ปอ มี งูด เปิง อุ เคิง นัน แลว นำ แอง ปาง นัน แลว นำ ก็ ต็อม คุด อุ ดอม เมือง นีนะเว นัน นำ เพา ดอม อ็อญ เจือ เอาซาง ลงโทด เมือง นัน จังนัก 6ทาเน เอาซาง ก็ แอง ระ ปลัด เกา แพละ ฮุง มี เกา อี ก็อห โตะ ปุก ปาง โยนา นัน ระ มี งูด นเดิด อาก โยนา ระ เลาะ เล็ห ใจ โยนา แด โยนา ก็ ซอบ เกา แพละ ฮุง นัน ซีเละ
7แต ญาม ปัห ซะ ตัก งกร็อห งิ ทอก แลว เอาซาง ก็ ไล เคาะคำ มี นัง โตะ แกรด แอ็ม เกา แพละ ฮุง นัน ระ มเบิล แอ็ม 8แลว โตะ งิ แลว เอาซาง ก็ แอง ระ เล็ห งกริม เจ็น งคม งกริม เจ็น งคม นัน ก็ แร็ง ฮอน แร็ง ยาก ซีเละ อาก ก็ แร็ง โยนา ก็ แร็ง ฮอน ซะ ญ็อก ม็อญ มัด ม็อญ มุห แมด นัง นซัก ตัก อาก อัง นำ ซีรอก เปิล ระ ปน ตุก ปน ญาก นัน นำ ก็ จ็อก ฮุนเน “บัห นอ เอิญ เปิล แอ็ม ก็ เลาะ” นำ อัง
9แต เอาซาง ก็ ไล โยนา คือเน “มัห จบ อ็อด อัง เกา นัน ตัก มเบิล แอ็ม นัน ก็ ไอ มี จบ แคระ ดาย” เอาซาง อัง
ทาเน โยนา ก็ ซวัล เอาซาง ฮุนเน “ตี เอิญ แร็ง อ็อด แร็ง ซีรอก เปิล ฮุนเน ก็ เลาะ แลว ดาย” โยนา อัง
10เอาซาง ก็ ไล โยนา คือเน “เกา แพละ ฮุง นัน เวิด ปลัด เวิด มเบิล ดาย ปลัด อี ฮัก มัห ไอ มี กุญ เทิล แต มัห ก็ เซียดาย อัง นอ 11ทาเน กัน เอิญ มเบิล แอ็ม ครำ นีนะเว เน เอิญ ก็ เซียดาย อัง อัห เมือนนอย นีนะเว เป็น เมือง จ็อง มี ควัน แย็ด 120,000 ล็อง ตี ไอ มี ตัน เม็จจึด ซีวะ เลาะ ซีวะ ลุห เจ็นนัน ก็ มี งัว มี ลา คอง อัห วัล ดก ซีเละ เอิญ ตึ อัง อัห ก็ เลาะ กัน อัห เปิล แอ็ม มด เอิญ ก็ เซียดาย อัง อัห ซีเละ” เอาซาง อัง
Currently Selected:
โยนา 4: Prai
Highlight
Share
Copy
Want to have your highlights saved across all your devices? Sign up or sign in
Global Partners